ʻOkú Ke Poupouʻi ʻa e Folofola ʻa e ʻOtuá?

¹ ʻI ha māmani ʻoku ʻikai te nau faʻa tui ki he Tohi Tapú, ʻoku poupouʻi faivelenga ai ʻe he kau Kalisitiane moʻoní ʻa e Folofola ʻa e ʻOtuá. ʻI he tuipau “ko e potu Folofola kotoa pe ne fakamanava mei he ʻOtua,” ʻoku tau loto-tatau ai mo Sīsū Kalaisi, ʻa ia naʻá ne fakamoʻoni ʻi heʻene lotu kia Sihová: “Ko e folofola aʻau ko e moʻoni ia.” (2 Tim. 3:16; Sione 17:17) ʻE anga-fēfē haʻatau poupouʻi ola lelei ʻa e Folofola ʻa e ʻOtuá?

² Ako ʻa e Tohi Tapú: ʻOku ʻikai ha veiveiua naʻe tokangataha ʻa Sīsū ki hono ako ʻa e Folofola ʻa e ʻOtuá. Naʻe malava ai heni ke ne faiako ʻaki ʻa e Tohi Tapú ʻi he kotoa ʻo ʻene ngāue fakafaifekaú. (Luke 4:​16-21; 24:​44-46) ʻE lava fēfē ke tau fakalahi ʻa e ngaahi konga Tohi Tapu ʻoku tau manatuʻí? ʻOku tau fai ia ʻaki hono lau ʻa e Tohi Tapú ʻi he ʻaho taki taha pea fakalaulauloto leva ki ha veesi ʻoku tau ʻilo ʻe fakalototoʻa mo ʻaonga tefito ki he ngāue fakafaifekaú. ʻI he teuteu ki he ngaahi fakatahá, ʻoku totonu ke tau sio pea lau hangatonu ʻa e ngaahi konga Tohi Tapu ʻoku haá mei he Tohi Tapú pea fakamatala nai fekauʻaki mo ia. ʻI hono maʻu ʻa e ngaahi fakatahá, ʻoku totonu ke tau muimui fakataha ʻi heʻetau Tohi Tapú ʻi hono lau ʻe he tokotaha malangá ʻa e ngaahi konga Tohi Tapú. Ko hono ako ʻa e ngaahi konga Tohi Tapú ʻe teuʻi ai kitautolu ke “tofa totonu ʻa e folofola ʻo e moʻoni.”—2 Tim. 2:15.

³ Tuku ke Lea ʻa e Tohi Tapú: ʻI he kau ki he ngāue fakafaifekaú, ʻoku totonu ke tau tuku ke lea ʻa e Tohi Tapú. Ko e fakatātaá, kapau ʻoku fakaʻatā ʻe he ngaahi tuʻungá, ʻoku totonu ke tau feinga ke lau mo fakamatalaʻi ha konga Tohi Tapu ki he tokotaha-ʻapí. Kapau te ne ʻeke ha fehuʻi pe langaʻi hake ha fakafepaki, ʻoku lelei tahá ke ngāueʻaki ʻa e Tohi Tapú ki hono ʻoatu ʻa e talí. ʻI he taimi ʻoku femoʻuekina ai ʻa e tokotaha-ʻapí, te tau kei lava pē ke fakamatalaʻi ha foʻi fakakaukau Fakatohitapu ʻaki ʻa e pehē, “Ki muʻa ke u ʻalú, fēfē ke u lau atu ʻa e konga Tohi Tapu ʻe taha ko ʻení.” Kapau ʻe malava, lau hangatonu mei he Tohi Tapú, pea ʻai ʻa e tokotaha fanongó ke mo sio ʻi he konga Tohi Tapu te ke laú.

⁴ ʻI he taimi naʻe fakahaaʻi ange ai ki ha tokotaha-ʻapi ʻe taha ha ngaahi konga Tohi Tapu ke fakahalaki ʻaki ʻa e Tolu-Tahaʻi-ʻOtuá, naʻá ne pehē, “Talu ʻeku ʻalu ki he lotú, naʻe ʻikai te u ʻiloʻi moʻoni ʻoku leaʻaki ʻeni ʻe he Tohi Tapú!” Naʻá ne tali lelei ha ako Tohi Tapu. Naʻe pehē ʻe Sīsū ko ʻene fanga sipí te nau fanongo ki hono leʻó. (Sione 10:​16, 27) Ko e founga lelei taha ke ʻiloʻi ai ʻe he faʻahinga loto-totonú ʻa e moʻoní ko ʻenau sio hangatonu ki he Tohi Tapú. Ko ia ai, tau poupouʻi ʻa e Folofola moʻoni ʻa e ʻOtuá!