Fakalototoʻaʻi ʻa Hono Ngāueʻaki ʻo e Tohitapú

KO ʻETAU holí ia ke fakahanga ʻa e tokanga ʻa e tokotaha kotoa ki he Folofola ʻa e ʻOtuá, ko e Tohitapú. Ko e tohi toputapu ko iá ʻa e makatuʻunga ki he pōpoaki ʻoku tau malangaʻí, pea ʻoku tau loto ke ʻiloʻi ʻe he kakaí ko e meʻa ʻoku tau leaʻakí, ʻoku ʻikai tupu ia meiate kitautolu pē, ka mei he ʻOtuá. ʻOku fiemaʻu ke fakatupu ʻe he kakaí ha tuipau ki he Tohitapú.

ʻI he Malaʻe Fakafaifekaú. ʻI he teuteu ki he malaʻe fakafaifekaú, fili maʻu pē ha konga Tohitapu ʻe taha pe lahi ange ke vahevahe atu ki he kakai ʻoku nau loto-lelei ke fanongó. Neongo kapau ʻokú ke palani ke fai ha tuʻuaki nounou ʻo e tohi faka-Tohitapú, ʻoku faʻa lelei ke lau ha konga Tohitapu feʻungamālie. ʻOku maʻu ʻe he Tohitapú ʻa e mālohi lahi ange ke tataki ʻa e kakai hangē ha sipí ʻi ha meʻa pē nai te tau lea fakafoʻituitui ʻaki. ʻI he ʻikai malava moʻoni ke lau mei he Tohitapú, te ke fili nai ke lave ki ai. ʻI he ʻuluaki senitulí, naʻe ʻikai ala maʻu lahi ʻa e ngaahi tatau ʻo e ngaahi takainga Konga Tohitapú. Neongo ia, ko Sīsū mo ʻene kau ʻapositoló naʻa nau fakamatala lahi mei he ngaahi konga Tohitapú. Ko kitautolu foki ʻoku totonu ke tau fai ha feinga ke maʻuloto ʻa e ngaahi konga Tohitapú pea ngāueʻaki feʻungamālie ia ʻi heʻetau ngāue fakafaifekaú, ʻo lave pē ki ai ʻi he taimi ʻe niʻihi.

ʻI hoʻo malava ke lautohi mei he Tohitapú, pukepuke ia koeʻuhi ke lava ʻo muimui ʻa e tokotaha-ʻapí ʻi hoʻo laú. Kapau ʻe muimui ʻa e tokotaha-ʻapí ʻi heʻene tatau Tohitapu ʻaʻaná, ʻe toe lelei ange ai ʻa ʻene tali ki he meʻa ʻokú ne laú.

Kae kehe, kuo pau ke ke ʻiloʻi ko e kau liliu Tohitapu ʻe niʻihi kuo nau ngāue faʻiteliha ʻaki ʻa e Folofola ʻa e ʻOtuá. Ko ʻenau ngaahi liliú ʻoku ʻikai nai fai ia ʻi he tafaʻaki kotoa pē ki he meʻa naʻe ʻi he muʻaki ngaahi lea ʻo e Tohitapú. Ko ha ngaahi liliu fakaeonopooni lahi kuo tāmateʻi ai ʻa e huafa fakafoʻituitui ʻo e ʻOtuá, ʻo toʻo ai ʻa e meʻa ʻoku leaʻaki ʻe he konga tohi ʻo e muʻaki leá ʻo fekauʻaki mo e tuʻunga ʻo e kau maté, pea fufū ʻa e meʻa ʻoku leaʻaki ʻe he Tohitapú fekauʻaki mo e taumuʻa ʻa e ʻOtuá ki he foʻi māmaní. Koeʻuhi ke fakahaaʻi ki ha tokotaha ʻa e meʻa kuo faí, ʻe fiemaʻu nai ke ke fakahoa ʻa e ngaahi konga tohi tefitó mei ha ngaahi Tohitapu kehekehe pe mei he ngaahi liliu ki muʻa ange ʻi he lea tatau. ʻI ha ngaahi tuʻunga-lea lahi, ʻoku tokonaki mai ʻe he Reasoning From the Scriptures ha fakahoa ʻo e ngaahi founga ʻoku fakahokoʻaki ʻe he kau liliu kehekehe ʻa e ngaahi kupuʻi lea tefito ʻi he ngaahi veesi ʻoku faʻa ngāueʻakí. Ko ha taha pē ʻoku ʻofa ʻi he moʻoní ʻe houngaʻia ia ʻi hono ʻiloʻi ʻa e ngaahi moʻoniʻi meʻá.

ʻI he Ngaahi Fakataha ʻa e Fakatahaʻangá. ʻOku totonu ke fakalototoʻaʻi ʻa e tokotaha kotoa ke ngāueʻaki ʻenau Tohitapú ʻi he ngaahi fakataha ʻa e fakatahaʻangá. ʻOku fakahoko ʻe he meʻá ni ʻa e tuʻunga lelei ʻi ha ngaahi founga lahi. ʻOku tokoni ia ke tauhi maʻu ʻa e tokanga ʻa e kau fanongó ʻi he meʻa ʻoku fai ki ai ʻa e lāuleá. ʻOku tānaki atu ki ai ʻa e maongo fakaesio ki he fakahinohino tala ngutu ʻoku fai ʻe he tokotaha malangá. Pea ʻokú ne ʻai ʻo maongo ki he ʻatamai ʻo e faʻahinga mahuʻingaʻia foʻoú ko e moʻoni, ko e Tohitapú ʻa e matavai ʻo ʻetau ngaahi tuí.

Pe ʻoku muimui moʻoni ʻa e faʻahinga ʻi hoʻo kau fanongó ʻi hoʻo lau ʻa e ngaahi konga Tohitapú ʻi heʻenau Tohitapú tonu ʻe fakatuʻunga ia ʻi he tuʻunga lahi ʻi he fakalototoʻa ʻokú ke faí. Ko e fakaafeʻi hangatonú ʻa e taha ʻo e ngaahi founga lelei tahá.

Ko e meʻa pē ia ʻaʻau ko e tokotaha malangá, ke fili pe ko fē ʻa e ngaahi konga tohi ʻokú ke loto ke fakamamafaʻí ʻaki hono ʻai ke kumi ki ai ʻa e kau fanongó. ʻOku lelei tahá ke lau ʻa e ngaahi konga Tohitapu ʻa ia te ne tokoniʻi koe ke ke fakatupulekina hoʻo ngaahi poini tefitó. Pea ʻi he fakaʻatā ʻe he taimí, tānaki atu ki ai ha ngaahi konga tohi siʻi kehe ʻoku poupou ki hoʻo fakamatalá.

Ko e moʻoni, ko e lave pē ki he konga tohí pe fakaafeʻi ʻa e kau fanongó ke nau sio ki ha konga Tohitapú ʻoku ʻikai ke faʻa feʻunga pē ia. Kapau ʻokú ke lau ha konga tohi ʻe taha pea hoko atu leva ki ha toe konga tohi ʻe taha ki muʻa ke aʻu ʻo maʻu ha taimi ʻe hoʻo kau fanongó ke maʻu ai ʻa e ʻuluaki konga tohí, ʻe vave ʻenau hoko ʻo loto-siʻí, pea ʻe tuku ai ʻenau feinga ke muimui ʻi he Tohitapú. Hoko ʻo fakatokanga meʻa. ʻI hono ʻiloʻi ʻe he tokolahi tahá ʻa e konga tohí, lau leva ia.

Fakakaukau ki muʻa. Lave feʻunga ki hoʻo konga Tohitapú ki muʻa ʻi hono lau iá. ʻE fakasiʻisiʻi ʻe he meʻá ni ʻa e mole ʻo e taimi ʻoku hoko ʻi he tatali ki he kau fanongó ke kumi ʻa e konga tohí. Lolotonga ko e fakamatala siʻisiʻi pē ʻe kāpui kapau te ke fakaʻatā ʻa e kau fanongó ke nau kumi ʻa e ngaahi konga Tohitapú, ko e ngaahi ʻaongá te ne ʻai ia ke mahuʻinga.