Puha Fehuʻi

◼ Ko e hā ʻoku ʻaonga ai ki he kau fanongó ke nau sio ki he ngaahi konga Tohitapú ʻi he taimi ʻoku fakaafeʻi mai ai ʻe he tokotaha malangá he lolotonga ʻo ʻene malangá ke nau fai peheé?

Ko e ngaahi meʻa tefito hangē ko e kaveinga ʻoku fai ki ai ʻa e lāuleá pea mo e malangá pe ʻoku fakakau ai pe ʻikai ha lāulea fakafoʻi veesi ki ha konga ʻo e Folofola ʻa e ʻOtuá ʻe fakapapauʻi ai ʻa e lahi ʻo e ngaahi konga Tohitapu ʻe fakaafeʻi mai nai ʻa e kau fanongó ke nau sio ki aí.

ʻOku mahuʻinga ke manatuʻi ko e ʻuhinga ʻe taha ke sio ai ki he ngaahi konga Tohitapú ke fakapapauʻi ko e meʻa ʻoku leaʻakí ʻoku mei he Tohitapú. (Ng. 17:11) Ko e taumuʻa ʻe tahá ke sivisiviʻi ai ʻa e fakamoʻoni Fakatohitapu ʻokú ne poupouʻi ʻa e meʻa ʻoku fakamatalaʻí koeʻuhí ke fakaivimālohiʻi ai ʻa e tui ʻa e tokotaha kotoa pē. Ko e sio ki he meʻa ʻoku lea moʻoni ʻaki ʻe he Tohitapú he lolotonga ʻo hono lau ha konga tohi tefitó ʻe lōua ai ʻene maongo ki he ʻatamaí. Tānaki atu ki he sio ki he ngaahi konga Tohitapú, ko hono hiki ha ngaahi nouti pea muimui ʻi he hokohoko ʻo e ngaahi foʻi fakakaukau ʻoku fakahaaʻí ʻoku ʻaonga.

Lolotonga ʻoku hiki nai ʻi he ʻautilaine ʻa e Sōsaietí ha ngaahi konga lahi ʻo e ngaahi konga tohi Fakatohitapú ke fakatupulekina ha kaveinga, ʻoku tokonaki mai pē ia maʻá e lelei ʻa e tokotaha malangá, ke tokoniʻi ia ʻi heʻene teuteú. ʻOku ʻomai nai heni ʻa e fakamatala ʻoku poupou ki ai pea mo tokoniʻi ia ke ne maʻu lelei ʻa e ngaahi tefitoʻi moʻoni Fakatohitapú ʻi hono ʻatamaí pea ke ne mahinoʻi ʻa e fakalakalaka ʻa e kaveingá. ʻOku fakapapauʻi ʻe he tokotaha malangá pe ko fē ʻa e ngaahi konga tohi ʻoku mātuʻaki mahuʻinga ki he fakatupulekina ʻo e malangá pea fakaafeʻi ʻa e kau fanongó ke nau muimui fakataha mo ia ʻi hono lau mo fakamatalaʻi ʻa e ngaahi konga tohi peheé. Ko e ngaahi konga tohi kehe ʻoku poupou ki he fakamatalá ʻe lave ke fakamatalaʻi pē nai ʻe he tokotaha malangá, ka ʻi he ngaahi tuʻunga peheé ʻoku ʻikai fiemaʻu ki he kau fanongó ke nau sio ki ai.

ʻI he taimi ʻoku lau ai ʻe he tokotaha malangá ʻa e ngaahi konga Tohitapu kuo ʻosi filifilí, te ne lau fakahangatonu mei he Tohitapú, ʻikai mei ha tatau ʻoku ʻomai mei he komipiutá. ʻI he taimi ʻoku fakaafeʻi ai ʻe he tokotaha malangá ʻa e kau fanongó ke nau lau fakatahá, te ne fakahaaʻi mahino ʻa e tohi Tohitapú, ʻa e vahé, pea mo e (ngaahi) vēsí. ʻI he kiʻi longo ke langaʻi hake ha fehuʻí pe ke fakamatalaʻi nounou ʻa e ʻuhinga ʻe lau ai ʻa e konga tohí, ʻokú ne tuku ai ha taimi ki he kau fanongó ke nau kumi ʻa e konga Tohitapú. Ko e toe leaʻaki ʻa e konga tohí te ne toe tokoniʻi ai ʻa e kau fanongó ke nau manatuʻi ʻa e fakamatalá. Kae kehe, ʻoku ʻikai fokotuʻu mai ke lave ki he fika ʻo e pēsí, koeʻuhi ko e faikehekehe ʻa e ngaahi pēsí makatuʻunga ʻi he pulusinga Tohitapu tefito ʻoku ngāueʻaki ʻe he faʻahinga tāutaha ʻi he kau fanongó. Ko e sio ki he ngaahi konga Tohitapú ʻi he taimi ʻoku fakaafeʻi mai ai ke fai peheé ʻoku tokoni ia ki he kau fanongó ke nau maʻu ai ha ʻaonga mei he mālohi ʻo e Folofola ʻa e ʻOtuá ʻi hono fakamatalaʻi ko ia he lolotonga ʻo e malangá.—Hep. 4:12.