Ko e Ako Fakafaifekau Fakateokalati ki he 2002
1 ʻOku fakamaʻamaʻaʻi ʻe he tokolahi taha ʻo e kakaí ʻa e malava ke leá. Kae kehe, ko e leá ko ha meʻaʻofa ia meia Sihova. ʻOkú ne ʻai kitautolu ke tau fetalanoaʻaki mo e niʻihi kehé pea fakahaaʻi ʻetau ngaahi fakakaukaú mo ʻetau ngaahi ongoʻí. Kae sinoemeʻa, ko e leá ʻoku lava ke tau fakahīkihikiʻi ai hotau ʻOtuá.—Sāme 22:22; 1 Kol. 1:4-7.
2 ʻOku akoʻi ʻi he Ako Fakafaifekau Fakateokalatí ha kau tangata, kau fefine pea mo e fānaú ke nau talaki ʻa e huafa ʻo Sihová. (Sāme 148:12, 13) Ko e polokalama ako ki he 2002 ʻokú ne kāpui ha tafaʻaki lahi ʻo e ngaahi tuʻunga-lea faka-Tohitapu, ʻa ia ʻoku lava ke tau maʻu ʻaonga fakafoʻituitui mei ai pea ngāueʻaki ʻi he ngāue fakafaifekaú. ʻI he teuteu ki he akó pea kau ki aí, ʻe lava ke tau fakatupulekina ai ʻetau ʻiló mo ʻetau pōtoʻí ʻi he tuʻunga ko e kau faiako ʻo e Folofola ʻa e ʻOtuá.—Sāme 45:1.
3 Lau Fakaʻaho ʻa e Tohitapú: Kapau ʻoku tau ʻai ke ala maʻu maʻu pē ha Tohitapu, ʻe lava ke tau ngāueleleiʻaki ha faʻahinga taimi ʻatā pē ke tau lau ai ia. Ko e tokolahi taha ʻo kitautolú ʻoku tau maʻu ha kiʻi taimi ʻatā he lolotonga ʻo e ʻahó ʻa ia ʻe lava ke tau ngāueʻaki ia ʻi he foungá ni. He ʻaonga ē ke lau ʻo ʻoua ʻe toe siʻi hifo ʻi he peesi ʻe tahá ʻi he ʻaho kotoa, ʻa ia ʻoku feʻungamālie ia ke ʻalu fakataha ai mo e polokalama lau Tohitapu ʻoku ʻomai ʻi he taimi-tēpile akó!—Sāme 1:1-3.
4 Ko e malava ke lau lelei ʻa e Tohitapú ʻoku lava ke tokoni ia kiate kitautolu ke aʻu ai ki he loto ʻo ʻetau kau fanongó pea ueʻi kinautolu ke nau fakahīkihikiʻi ai ʻa Sihova. Ko e fanga tokoua ʻoku kau ki he Konga Fika 2 ʻi he akó, ʻoku totonu ke nau toutou lau leʻo-lahi ʻa ʻenau konga kuo vaheʻi angé. ʻE fai ʻe he ʻovasia ʻo e akó ha fakaongoongolelei pea ʻoatu mo ha ngaahi fokotuʻu ke fakaleleiʻiʻaki ʻa e lautohí.
5 Ngāueʻaki ʻa e Tohi ʻIlo: Ko e Konga Fika 3 mo e Fika 4 ʻoku makatuʻunga ia ʻi he tohi ʻIlo. Ko e tokolahi taha ʻo kitautolú, ʻoku tau ʻiloʻilo lahi ange nai ki hono ngāueʻaki ʻa e tokoni ʻaonga ko ʻení ʻi he malaʻe fakafaifekaú. ʻOku totonu ke fili ʻe he fanga tuofāfiné ha ngaahi fokotuʻutuʻu ʻe ʻaonga ki he feituʻu ngāué. ʻOku totonu ke tokanga tefito ʻa e ʻovasia ʻo e akó ki he founga ʻoku nau faiakoʻakí mo hono ngāueʻaki ʻa e ngaahi Konga Tohitapú.
6 ʻOfa ke tokoniʻi kotoa kitautolu ʻe he Ako Fakafaifekau Fakateokalatí ke tau hokohoko atu ʻa hono ngāueʻaki ʻa ʻetau meʻaʻofa ko e leá, ʻa ia kuo foaki mai ʻe he ʻOtuá ke talaki ʻaki ʻa e ongoongo leleí pea ke fakahīkihikiʻi ʻa hotau ʻOtua lahí, ʻa Sihova!—Sāme 34:1; Ef. 6:19.