Ko ha Tali Loto-Māfana!
1 ʻOku fakahaaʻi ʻe he ngaahi fāmili Kalisitiane ʻi he feituʻu kotoa pē ʻenau houngaʻia loto-māfana ki he foʻi vitiō ko e Young People Ask—How Can I Make Real Friends? Naʻe pehē ʻe ha tamai ʻi he ʻIunaite Seteté ʻi he hili ʻa e mamata aí naʻe tangutu fakalongolongo ʻa hono ngaahi fohá—naʻa nau lava ke mahinoʻi pea tali lelei ʻa e meʻa kotoa ʻi he foʻi vitioó! ʻOku pehē ʻe ha līpooti mei Malauī ko e kau talavou mo e kau finemui ʻi aí ʻoku malava foki ke nau lāulea ki ai koeʻuhí he ʻoku nau maʻu ʻa e ngaahi tenge tatau mei honau ngaahi toʻumeʻa ʻi he ʻapiakó. Naʻe pehē ʻe ha tamai ʻi Siamane fekauʻaki mo e foʻi vitioó: “ʻOku ou ongoʻi ko e tali ia ki heʻeku ngaahi lotú.” Naʻe pehē ʻe ha finemui: “Fakamālō atu ʻi hoʻomou fakamanatu mai kiate au ʻoku tokanga mai ʻa Sihova fekauʻaki mo au.” Naʻe līpooti ʻe ha tokotaha mātuʻa ʻi Nuʻu Sila: “Naʻe tokoni ia ki ha taha ʻo ʻemau kau taʻu hongofulutupú ke toe foki mai ki he hala ʻo e moʻuí.” Ko ha fefine ʻosi mali naʻá ne mamata ai peá ne pehē: “He fakaʻamu ē ka ko au, ke mamata ʻa e kau talavou kotoa pē ʻi he moʻoní ʻi he foʻi vitiō ko ʻení pea ueʻi ai kinautolu ke ʻai ʻa e moʻoní ko ʻenau meʻa tonu!” Ngaahi fāmili, fēfē ke mou toe mamata ai? Hili iá, lāulea fakataha ki he ngaahi fehuʻi hoko haké.
2 Talateu: Ko e hā ʻa e kaumeʻa moʻoní?—Pal. 18:24.
3 Ngaahi Fakafaingataʻaʻiaʻanga ki he Kaumeʻá: ʻE lava fēfē haʻo ikuʻi ʻa e ongoʻi ʻo e hoko ʻo tuēnoá? (Fili. 2:4) Ko e hā kuo pau ai ke ke loto-lelei ke fakaleleiʻi ʻa ho angaʻitangatá, pea ko hai ʻe lava ke ne tokoniʻi koe ke ke fai iá? Ko e hā te ne fakatupulekina ha ngaahi faingamālie ke maʻu ai ha ngaahi kaumeʻa lahi angé, pea ko fē ʻe lava ke maʻu mei aí?—2 Kol. 6:13.
4 Kaumeʻa mo e ʻOtuá: ʻE lava fēfē ke ke fakatupulekina ha vahaʻangatae mo Sihova, pea ko e hā ʻoku tuha ai mo ha feingá? (Sāme 34:8) Ko hai te ne lava ke fakaivimālohiʻi lelei taha ʻa ho kaumeʻa mo e ʻOtuá?
5 Ko e Faʻahinga Kaumeʻa ʻOku Halá: Ko hai ʻa e ngaahi feohi koví? (1 Kol. 15:33) ʻE lava fēfē ke taki atu ʻe ha ngaahi kaumeʻa hala ha taha ki ha maumau fakalaumālie? Ko e hā ʻoku akoʻi atu kiate koe ʻe he fakamatala faka-Tohitapu fekauʻaki mo Tainá?—Sen. 34:1, 2, 7, 19.
6 Ko ha Tulama ʻi Onopooni: Naʻe anga-fēfē hono uesia ʻa Tara ʻe he taʻelatá? Naʻe anga-fēfē ʻa ʻene fakatonuhiaʻi ʻa ʻene feohi mo e kau talavou ʻo e māmaní? Ko e hā ʻa e ngaahi fakatuʻutāmaki naʻa nau fakaeʻa ange kiate iá? Ko e hā naʻe ʻikai malava ai ʻe heʻene ongo mātuʻá ke ʻilo ʻa e fakatuʻutāmaki naʻá ne ʻi aí, ka ko e hā ʻa e fakakaukau naʻá na tokoniʻi ʻaki ia ke toe sai fakalaumālié? Naʻe anga-fēfē hono fakamoʻoniʻi ʻa e hoko ha tuofefine tāimuʻa ko ha kaumeʻa moʻoni kia Tara? Ko e hā kuo pau ai ke tokanga ʻa e kau Kalisitiané ki he Palovepi 13:20 mo e Selemaia 17:9? Ko e hā ʻa e lēsoni mahuʻinga naʻe ako ʻe Tara?
7 Fakaʻosí: Ko e hā ʻa e ngaahi lēsoni kuó ke ako mei he foʻi vitiō ko ʻení? ʻE anga-fēfē haʻo ngāueʻaki ia ke tokoniʻi ai ha niʻihi kehe?—Sāme 71:17.