Ko ha Foʻi Vitiō ʻOku Taau ke Fakakaukau Fakamātoato ki Ai
“ʻOku ʻai moʻoni koe ʻe he foʻi vitiō ko ení ke ke fakakaukau!”
“Naʻe maongo loloto ia ki hoku lotó!”
“Naʻe ueʻi moʻoni ai au!”
1 Ko e anga ia hoʻo ongoʻí ʻi he hili ʻa hoʻo fuofua mamata ʻi he foʻi vitiō Young People Ask—How Can I Make Real Friends? ʻI he ngaahi taʻu nai kuohilí, naʻe tofanga ai ha kiʻi tokoua kei siʻi ʻi ha taimi faingataʻa ʻi heʻene moʻuí, ko e ʻuhingá pē ko e ngaahi kaumeʻa naʻá ne filí. Naʻa nau ʻai ke mole ʻa ʻene mahuʻingaʻia ʻi he moʻoní, pea naʻe mole meiate ia ʻa hono vahaʻangatae mo Sihová. Naʻe tukuange mai ki mui ai ʻa e foʻi vitiō Real Friends. Naʻá ne tohi: “ʻI heʻeku toutou sio ʻi he foʻi vitioó, naʻe lele noa pē ʻa hoku loʻimatá. Naʻá ku fakamālō kia Sihova koeʻuhi ko e tokoni ʻi hono taimi totonú.” Naʻe ueʻi ia ʻe he foʻi vitioó ke ne fai ʻa e ngaahi liliu lahi ʻi heʻene moʻuí pea maʻu mo e faʻahinga kaumeʻa totonú. Naʻá ne tānaki mai: “ʻOku hā mahino ʻoku mou ʻalu fakataha mo e taimí ʻi he fekauʻaki mo e meʻa ʻokú ne uesia ʻa e fānaú.” Ngaahi mātuʻa mo e toʻutupu, ko e hā ʻoku ʻikai ai te mou toe sio ʻi he foʻi vitioó ʻi hoʻomou ako fakafāmili hoko maí? Kiʻi taʻofi fakataimi ʻi he hili ʻa e konga taki taha, pea fetalanoaʻaki fakataha tauʻatāina mo faitotonu ki he ngaahi fehuʻi ʻi he ngaahi palakalafi ko ʻení.
2 Talateú: Ko e hā ʻa e kaumeʻa moʻoni?—Pal. 18:24.
3 Ngaahi Fakangatangata ki he Kaumeʻá: ʻE lava fēfē ke ke ikuʻi hoʻo ongoʻi tuēnoá? (Fili. 2:4) Ko e hā kuo pau ai ke ke loto-lelei ke fakaleleiʻi ho angaʻitangatá, pea ko hai ʻe lava ke ne tokoniʻi koe ke ke fai iá? Ko e hā te ne fakaʻatā ke ʻi ai ha ngaahi faingamālie ki ha ngaahi kaumeʻa lahi angé, pea ʻe lava ke maʻu kinautolu ʻi fē?—2 Kol. 6:13.
4 Kaumeʻa mo e ʻOtuá: ʻE lava fēfē ke ke fakatupulekina ha vahaʻangatae vāofi ange mo Sihova, pea ko e hā ʻoku taau ai ʻa e feinga ke fai peheé? (Sāme 34:8) Ko hai ʻe lava ke ne ʻai ke mālohi ange ʻa hoʻo kaumeʻa mo e ʻOtuá?
5 Ko e Faʻahinga Kaumeʻa ʻOku Halá: Ko hai ʻa e ngaahi kaungāmeʻa koví? (1 Kol. 15:33) ʻE lava fēfē ke taki atu ha taha ʻe he ngaahi kaungāmeʻa halá ki ha tuʻunga maumau fakalaumālie? Ko e hā ʻoku akoʻi kiate koe ʻe he fakamatala Fakatohitapu fekauʻaki mo Tainá?—Sen. 34:1, 2, 7, 19.
6 Ko ha Tulama ʻi Onopooni: Naʻe anga-fēfē hono uesia ʻe he taʻelatá ʻa Tara? Naʻe anga-fēfē ʻa ʻene fakatonuhiaʻi ʻa ʻene feohi mo e toʻutupu he māmaní? Ko e hā ʻa e ngaahi tuʻunga fakatuʻutāmaki naʻa nau ʻai ke ne tō ki aí? Ko e hā naʻe ʻikai ke fakatokangaʻi ai ʻe heʻene ongo mātuʻá ʻa e tuʻunga fakatuʻutāmaki naʻá ne ʻi aí, ka ko e hā ʻa e fakakaukau naʻá na tokoniʻiʻaki ia ke ne toe fakaakeake fakalaumālié? Naʻe fakamoʻoniʻi fēfē ʻe ha tuofefine tāimuʻa ʻa ʻene hoko ko ha kaumeʻa moʻoni ʻo Tara? Ko e hā kuo pau ai ki he kau Kalisitiané ke nau talangofua ki he Palovepi 13:20 mo e Selemaia 17:9? Ko e hā ʻa e lēsoni mahuʻinga naʻe ako ʻe Tara?
7 Fakaʻosí: Ko e hā ʻa e ngaahi lēsoni kuó ke ako mei he foʻi vitiō ko ʻení? ʻE lava fēfē ke ke ngāueʻaki ia ke tokoniʻi ʻa e niʻihi kehe?—Sāme 71:17.