Maʻu ʻAonga Hokohoko mei he Taua Leʻo mo e ʻĀ Hake!
Koeʻuhi ko e ngaahi tukuhau ki he ngaahi makasini Taua Leʻo mo e ʻĀ Hake! ʻe ʻikai ke toe hoko atu ia, ʻe fiemaʻu ai ke fai ha feinga ke fakapapauʻi ko kitautolu, pea mo e faʻahinga ʻoku tau malanga ki aí, ʻe ʻikai ke tau taʻemaʻu ha foʻi ʻīsiu ʻe taha.
Ngaahi Tatau Fakafoʻituitui: ʻI he ʻosi ʻa e taimi ʻo hoʻo tukuhau fakafoʻituituí, fakalahi ʻa hoʻo ʻota lolotongá ʻi he kānita makasiní. ʻOku totonu ki he ngaahi mātuʻá ke nau ʻota ha ngaahi makasini feʻunga koeʻuhí ke maʻu ʻe he mēmipa taki taha ʻo e fāmilí haʻane tatau tonu pē ʻaʻana. Ko hono hikiʻi ho hingoá ʻi hoʻo tatau fakafoʻituituí ʻe fakapapauʻi ai heʻikai te ke matavalea ʻo tufa ia ʻi he ngāue fakafaifekaú. ʻI he aʻu mai ʻa e uta makasiní, ko e tokoua ʻokú ne tokangaʻi kinautolú te ne ʻai ke ala maʻu leva ʻi he Fale Fakatahaʻangá ʻa e ʻīsiu taki taha.
Ngaahi Tufaʻanga Makasini Pau: ʻOku totonu ke feinga ʻa e kau malangá ke fokotuʻu ha tufaʻanga makasini pau ki he faʻahinga mahuʻingaʻia kotoa ʻoku loto ke maʻu ʻa e ʻīsiu taki taha. Ko hono tufa fakafoʻituitui ʻa e ngaahi makasiní ki he faʻahinga peheé ʻe ʻomai ai ha ngaahi faingamālie ke fakatupulekina ʻa e mahuʻingaʻia kuo haá pea ke kamata ha ngaahi ako Tohitapu.—Sio ki he ʻEtau Ngāue Fakafaifekau ʻo e Puleʻanga ʻo ʻOkatopa 1998, peesi 8.
Faʻahinga ʻOku ʻI Ai ha Ngaahi Fiemaʻu Makehe: Kapau ʻoku fakahāhā ʻe ha faʻahinga tāutaha ha mahuʻingaʻia moʻoni ka ʻoku nau nofo ʻi ha feituʻu ʻoku teʻeki ai ke vaheʻi, ʻe lava ke fai ha liliu ke fakaʻatā ai ia ke ne maʻu ʻa e ngaahi makasiní fakafou he tukuhaú. Kapau ko ha tokotaha ʻoku nofo ʻi he feituʻu ngāue ʻa e fakatahaʻangá ʻoku ʻikai malava ke aʻu atu ki ai ʻa e tufaʻanga makasini paú ka ʻokú ne mahuʻingaʻia moʻoni ʻi hono maʻu ʻa e ngaahi makasiní, fetalanoaʻaki ki he meʻá mo e Kōmiti Ngāue ʻa e Fakatahaʻangá. Kapau ʻoku nau loto ki ai, ʻe lava ke ʻoatu ki he tokotaha mahuʻingaʻiá ha tukuhau. ʻE lava ke ngāueʻaki ki he taumuʻa ko ʻení ʻa e ongo foomu tukuhau (M-1 mo e M-101).
ʻOku lava ke tau tuipau ʻe hokohoko atu hono tāpuakiʻi ʻe Sihova ʻa e kotoa ʻo ʻetau feinga ko ia ke fanongonongo ʻa e Puleʻangá fakafou ʻi he Taua Leʻo mo e ʻĀ Hake!