Puha Fehuʻi

◼ Ko e hā ʻa e tuʻunga ʻo e valá mo e teuteú ʻoku totonu ke tau tauhi ʻi he taimi ʻoku ʻaʻahi ai ki he ngaahi ʻapi Pētelí mo e ngaahi fale ʻo e vaʻá?

ʻI heʻetau ʻaʻahi ki Pēteli, ke mamata ʻi he falé pe ʻaʻahi ki he kau mēmipa ʻo e fāmili Pētelí, “ko hotau valá, teuteú mo e ʻulungāngá ʻoku totonu ke tatau ia mo e meʻa ʻoku ʻamanekina meiate kitautolu ʻi hono maʻu ʻa e ngaahi fakataha ki he lotu ʻi he Fale Fakatahaʻangá.” (om-E 131) Kae kehe, kuo fakatokangaʻi ʻi he taimi ʻoku ʻaʻahi ai ki he ngaahi ʻōfisi vaʻá, ʻoku hehema ai ʻa e fanga tokoua mo e fanga tuofāfine ʻe niʻihi ke fuʻu ʻaiʻainoaʻia ʻaupito honau valá. ʻOku ʻikai feʻunga ia ʻi he taimi ʻoku ʻaʻahi ai ki he ngaahi fale ko ení. Ko hotau fōtungá ʻoku totonu ke alafaʻifaʻitakiʻanga, maau mo fakanānā, ʻo tapua atu mei ai ʻa e tuʻunga taau mo molumalu ʻoku taau mo e kau sevāniti ʻa Sihova ko e ʻOtuá.​—1 Tim. 2:​9, 10.

ʻOku tautefito ʻa e mahuʻinga ʻo e meʻá ni ʻi he taimi ʻoku ʻaʻahi ai ki he ngaahi ʻapi Pētelí mo e ngaahi fale ʻi he vaʻá koeʻuhi he ʻokú ne tohoakiʻi ʻa e tokanga ʻa e kau mamata tokolahi ʻoku ʻikai ko e Kau Fakamoʻoní. Ko e kau mamata ko iá te nau fai nai haʻanau lau fekauʻaki mo e kakai ʻa e ʻOtuá mo ʻene kautahá ʻo makatuʻunga ʻi he meʻa ʻoku nau mamata ki aí. ʻE lelei ke talanoa mo e kau ako Tohitapú pea mo e niʻihi kehe nai te nau ʻaʻahí ke fakamanatu kia kinautolu ʻa e mahuʻinga ʻo e fai ha tokanga ki he vala mo e teuteu tāú. ʻE houngaʻia ʻa e fāmili Pētelí ʻi hoʻo fai ʻa e meʻá ni.

ʻI he tuʻunga ko e kau faifekau Kalisitiané, kuo pau ke tau tokanga ke ʻoua ʻe ʻoatu ʻe hotau fōtungá ha fakatupunga ki ha tūkia. (2 Kol. 6:​3, 4) ʻI hono kehé, ʻi heʻetau hā tāú, ʻofa ke tau hanga maʻu pē ʻo “fakaogolelei ae akonaki oe Otua, ko ho tau Fakamoui, i he mea kotoabe.”​—Tai. 2:​10, PM.