Puha Fehuʻi
◼ Ko e hā ʻa e faʻahinga vala ʻoku feʻunga mo e taimi ʻoku fai ai ha ʻaʻahi ki he ngaahi fale ʻoku ngāueʻaki ki he ngāue ʻa Sihová?
Takatakai ʻi he māmaní, ko e ngaahi Fale Fakatahaʻangá, Holo ʻAsemipilií, ʻapi Pētelí mo e ngaahi ʻōfisi vaʻá ko e ngaahi feituʻu makehe ia kuo ʻosi fakatapui ki he ngāue ʻa Sihová. ʻOku lahi feʻunga, maʻa, pea fokotuʻutuʻu maau, ʻo tapua atu ai ʻa e fōtunga fakangeingeia. ʻOku kehe moʻoni ia mei he meʻa ʻoku tau faʻa mātā ʻi he fokotuʻutuʻu ʻa Sētané. Ko e faʻahinga ʻoku nau ʻaʻahi ki he ngaahi feituʻu ʻoku ngāueʻaki ki he ngāue ʻa Sihová ʻoku toe totonu ke ʻiloʻi ʻoku nau kau kia Sihova, ko e faʻahinga ʻoku nau fai ʻa hono finangaló.
ʻI he tuʻunga ko e kau Kalisitiané, ʻoku tau “fai ʻa e meʻa ʻoku tāu mo e kau sevaniti ʻa e ʻOtua ke fai” ʻi he tafaʻaki kotoa pē, ʻo kau ai hotau vala mo e teuteu taau mo leleí. (2 Kol. 6:3, 4) ʻOku toe ʻamanekina mai ke tau tauhi maʻu ʻa e ʻulungāanga leleí. ʻI he taimi kotoa pē, ʻoku totonu ke tapua atu mei hotau valá mo e teuteú ʻoku taau mo lelei ʻo feʻunga mo e kau sevāniti ʻa Sihova ko e ʻOtuá. ʻOku tautautefito ʻene moʻoni ʻení ʻi he taimi ʻoku tau ʻaʻahi ai ki he ʻuluʻi ʻapitanga ʻi Niu ʻIoké pea pehē ki he ngaahi vaʻa takatakai ʻi he māmaní.
ʻI he lāulea ki he mahuʻinga ʻo e valá mo e teuteu tāú, ʻoku fakamatala ʻa e tohi Fokotuʻutuʻu Maau ke Fai ʻa e Finangalo ʻo Sihová ki he fiemaʻu ʻo e maʻa fakaesino, vala fakanānā mo e teuteu lelei ʻi heʻetau kau ki he ngāue fakamalangá mo hono maʻu ʻo e ngaahi fakataha faka-Kalisitiané. Pea ʻi he peesi 138, palakalafi 3, ʻoku pehē ai: “Manatuʻi, ko e hingoa Pētelí ʻoku ʻuhinga iá ko e ‘Fale ʻo e ʻOtua.’ Ko ia ai, ko hotau valá, teuteú mo e ʻulungāangá ʻoku totonu ke tatau ia mo e meʻa ʻoku ʻamanekina meia kitautolu ʻi he taimi ʻoku tau maʻu ai ʻa e ngaahi fakataha ki he lotu ʻi he Fale Fakatahaʻangá.” Ko e tuʻunga māʻolungá ni ʻoku totonu ke muimui ki ai ʻa e kau malanga ʻo e Puleʻangá ʻa ia ʻoku nau ʻaʻahi ki he Pētelí mei he ngaahi feituʻu fakalotofonuá pea pehē ki ha faʻahinga mei he ngaahi feituʻu mamaʻo angé. ʻI he founga ko ʻení, ʻoku fakahaaʻi ai ʻe he tokotaha ʻaʻahí ʻa e houngaʻia moʻoni mo e fakaʻapaʻapa.—Sāme 29:2.
Ko hotau valá ʻoku totonu ke ʻiloʻi ai kitautolu ko e faʻahinga “oku nau fakaha koe kau lotu akinautolu ki he Otua.” (1 Tim. 2:10, PM) Ko e vala mo e teuteu tāú ʻoku ʻi ai ʻene tākiekina lelei ki he anga ʻo e vakai ʻa e niʻihi kehé ki he lotu moʻoni ʻa Sihová. Kae kehe, kuo fakatokangaʻi mei he ʻaʻahi ki he ngaahi fale ʻoku ngāueʻaki ki he ngāue ʻa Sihová, ko e fanga tokoua mo e fanga tuofāfine ʻe niʻihi ʻoku nau hehema ʻaupito ke vala siʻi, fakalālāfuaʻa, pe tui ʻa e vala ʻoku ʻasi lahi ai honau sinó ki tuʻa. Ko e vala peheé ʻoku ʻikai ke feʻunga ia ki he kau Kalisitiané ʻi ha faʻahinga taimi pē. ʻI he meʻa ko ʻení, pea pehē ki he tafaʻaki kehe kotoa pē ʻo ʻetau moʻui faka-Kalisitiané, ʻoku tau holi ke tauhi maʻu ʻa e ngaahi tuʻunga māʻolunga ʻoku fakafaikehekeheʻi ai ʻa e kakai ʻa e ʻOtuá mei he māmaní, ʻo fai ʻa e meʻa kotoa pē ke ongoongolelei ai ʻa e ʻOtuá.—Loma 12:2; 1 Kol. 10:31.
Ko ia ʻi he ʻaʻahi ki he ʻuluʻi ʻapitanga mo e vaʻa ʻi Niu ʻIoké pe ko e ngaahi vaʻa kehé, pe ko ha ʻaʻahi ʻosi palani pe ko e lolotonga ʻo ha mālōlō ʻeveʻeva ki ha ngaahi feituʻu mātanga, ʻeke hifo kiate koe: ‘ʻOku tapua atu mei hoku valá mo e teuteú ʻa e anga-fakanānā, maʻa mo e ngeia ʻo e feituʻu te u ʻaʻahi ki aí? ʻOku tapua lelei atu ai ʻa e ʻOtua ʻoku ou lotu ki aí? ʻE fakahohaʻasi pe fakatūkiaʻi ʻe hoku fōtunga hāmaí ʻa e niʻihi kehé?’ ʻI hotau valá mo e teuteú, ʻofa ke hoko ai pē ʻo ‘teungaʻia ʻiate kitautolu ʻi he meʻa kotoa pe ʻa e tokateline ʻa hotau ʻOtua Fakamoʻuí’!—Tai. 2:10.