Maʻu ʻAonga Kakato mei he Fakataha-Lahi Fakavahe “Kau Fanongonongo Faivelenga ʻo e Puleʻangá”
1 Ko ha Polokalama Fakaueʻiloto: Ko ha polokalama fakaueʻiloto moʻoni ē naʻa tau maʻu ʻi heʻetau fakataha-lahi fakavahe fakamuimuí! Naʻa tau fakatahataha ai ki ha taumuʻa tatau, ke hoko ʻo mateuteu lelei ange ke fanongonongo faivelenga ʻa e Puleʻanga ʻo e ʻOtuá. ʻOkú ke manatuʻi ʻa e founga ʻo hono fakamatalaʻi ʻe he ʻuluaki tokotaha malangá ʻa e kupuʻi lea “ke fanongonongó”? ʻOkú ke manatuʻi ʻa e fekumi naʻe fakalototoʻaʻi ke tau fai ʻi he malanga “Taʻemanavahē ʻi Hono ʻIloʻi ʻOku Kau ʻa Sihova mo Kitautolu”? Ko fē ʻa e ngaahi talanoa moʻoni ki he moʻuí kuo aʻu ki ai hoʻo sivisiviʻí?
2 Ko e malanga fakakongokonga “Ko e Tuʻunga ʻo ʻEtau Tuí ʻi Hono Siviʻi ʻe he Ngaahi ʻAhiʻahi Kehekehe” naʻe ʻomai ai ʻa e ʻuhinga tefito ʻe tolu ʻoku fakaʻatā ai ʻe Sihova ʻa e fakatangá. ʻE lava ke ke fakamatalaʻi pe ko e hā kinautolu? Ko e hā ʻa e makatuʻunga Fakatohitapu ki heʻetau tuʻu-ʻatā faka-Kalisitiané? Ko e hā naʻe fakalototoʻaʻi kitautolu ke faí ke teuʻi ai kitautolu ki he ngaahi pole ko e tupu mei hotau tuʻunga tuʻu-ʻataá? ʻOku anga-fēfē hono ʻoatu ʻa e fakahīkihiki kia Sihová ʻi heʻetau kātakiʻi loto-tōnunga ʻa e ngaahi ʻahiʻahí?
3 Ko e konga fē ʻi he tulama “Tuʻu Mālohi ʻi he Ngaahi Taimi Faingataʻá” naʻe tautefito ʻene fakaivimālohiʻi koé? ʻE lava fēfē ke tau hoko ʻo hangē ko Selemaiá?
4 Ko e malanga maʻá e kakaí, “Kuo Kamata Liliu ʻa e Anga ʻo e Maama ko Eni,” naʻe fakamatalaʻi ai ʻa e ngaahi liliu ʻaonga ʻoku tuʻu mei muʻá pea ʻoku taki atu ai ki he ʻaho fakamanavahē ʻo e ʻOtuá? Lolotonga ʻa e fanongo ki he malanga fakaʻosí, “Mohu ʻi he Ngaahi Ngāue Lelei ʻi he Tuʻunga ko e Kau Fanongonongo Faivelenga ʻo e Puleʻangá,” naʻe anga-fēfē hoʻo fakafelāveʻi ʻa e fakamatalá ki hoʻo ngāue fakafaifekau fakafoʻituituí?
5 Ngaahi Poini Tefito ke Ngāueʻaki: Hangē ko ia ne fakamatalaʻi ʻi he malanga “Fakahaaʻi ʻOku Mou Houngaʻia,” ʻe lava fēfē ke tau fakahāhā ʻa e loloto ʻo ʻetau houngaʻia kia Sihová? ʻI he malanga he tefitoʻi fakakaukaú, “Ueʻi ʻe he Faivelengá ʻa e Kau Fanongonongo ʻo e Puleʻangá,” ko e faivelenga ʻa hai naʻe fakalototoʻaʻi mai ke tau faʻifaʻitaki ki aí? Ko e hā ʻa e sivisiviʻi-kita naʻe kole mai ke tau faí?
6 Ko e malanga fakakongokonga “ʻOku Fakaivimālohiʻi Kitautolu ʻe he Kikite ʻa Maiká ke ʻAʻeva ʻi he Huafa ʻo Sihová” naʻe fakamamafaʻi ai ʻa e ngaahi fiemaʻu ʻe tolu ko e hā, ʻa ia kuo pau ke tau aʻusia ke maʻu ai ʻa e hōifua ʻa Sihová? ʻOku ala aʻusia eni? (Mai. 6:8) Fakatatau ki he malanga “Tauhi Maʻu ʻa e Anga-Maʻá ʻAki Hono Maluʻi Ho Lotó,” ko e ngaahi founga fē kuo pau ke tau tauhi ai ke maʻa fakaeʻulungāngá? ʻI he ngaahi tafaʻaki fē naʻe fakatokanga mai ai kia kitautolu ʻa e malanga “Maluʻi mei he Kākaá” ke ʻoua naʻa hoko ʻo kākaaʻi kitautolu pea ʻoua ʻe kākaaʻi ʻa e niʻihi kehé?
7 Ko e hā ʻa e ngaahi poini ʻaonga mei he malanga fakakongokonga “Kau Fanongonongo ʻo e Puleʻangá ʻA Ia ʻOku Nau Fakalāngilangiʻi ʻEnau Ngāue Fakafaifekaú” kuó ke kamata ngāueʻaki ʻi hoʻo ngāue fakafaifekaú? ʻI he malanga “ʻOku Fakatupu Langa Hake ʻa e Fetalanoaʻaki Fakalaumālié,” naʻe ʻanalaiso ai ʻa e Filipai 4:8. ʻOku anga-fēfē hono tokoniʻi kitautolu ʻe he konga Tohitapu ko iá ke ʻai ʻetau ngaahi fetalanoaʻakí ke fakalaumālié, pea ko fē taimi ʻoku totonu ke tau fai ai iá?
8 Ko e malanga “Falala Kakato kia Sihova ʻi he Taimi ʻo e Faingataʻá” naʻe lāulea ai ki he founga ʻe lava ke tau fekuki ai mo e ngaahi meʻa fakamamahí, ngaahi faingataʻaʻia fakapaʻangá, mahamahakí, ngaahi palopalema fakafāmilí, mo e ngaahi tōnounou hokohokó. ʻE lava fēfē ke tau fakahāhā ʻa e falala kia Sihova ʻi he fehangahangai mo e ngaahi tuʻunga ko ení?
9 Ngaahi Koloa Foʻou Fakalaumālie: Naʻa tau fiefia ke maʻu ʻa e tohi foʻou ko e Lotu ki he ʻOtua Moʻoni Pē Tahá. Naʻe anga-fēfē hono ueʻi koe ʻe he fanongonongo ko ia naʻe fakamatalaʻi ai ʻa hono taumuʻá? Ko e hā ʻe hoko ai ʻo ʻaonga ʻi heʻetau ngāue ngaohi-ākongá ʻi he tuʻunga ko e tohi ako hono uá?
10 Ko hono hokó naʻa tau maʻu ai ʻa e tohi fakaʻofoʻofa ko e Draw Close to Jehovah. Ko e hā ʻa e niʻihi ʻo hono ngaahi tafaʻaki makehé? Ko e hā ʻa e ngaahi talanoa fakatātā ʻoku tautefito ʻa hoʻo fiefia aí? Kuo hanga ʻe hoʻo lau iá ʻo tohoakiʻi koe ke ke ofi ange ai kia Sihova? Ko hai ʻe toe malava nai ke maʻu ʻaonga mei aí?
11 Ko e Fakataha-Lahi Fakavahe “Kau Fanongonongo Faivelenga ʻo e Puleʻangá” naʻe tokonaki mai ai kia kitautolu ʻa e fakalototoʻa fakalaumālie ʻoku fiemaʻu ke tau fehangahangai ʻaki mo e ngaahi taimi faingataʻa ko ení. Koeʻuhi ke maʻu ʻaonga kakato mei he tokonaki fakalaumālie tuʻu-ki-muʻa ko ení, ʻofa ke tau fai ʻetau lelei tahá ke manatuʻi ʻa e meʻa naʻe leaʻakí, houngaʻia ʻi he meʻa naʻa tau maʻú, pea ngāueʻaki ʻa e meʻa kuo tau akó. (2 Pita 3:14) Ko hono fai iá ʻe fakaivimālohiʻi ai kitautolu ke tauhi maʻu ʻetau anga-tonú pea ke hoko ko e kau fanongonongo faivelenga ʻo e Puleʻangá ʻi he faʻifaʻitaki ki hotau ʻEiki ko Sīsū Kalaisí, ʻo fai kotoa ia ki he lāngilangi ʻo Sihová.—Fili. 1:9-11.