Manatuʻi ʻa e Faʻahinga Taʻumotuʻa Loto-Tōnungá

¹ Neongo ko ha uitou pea neongo ʻa hono taʻumotuʻá, ko e taʻu 84 ko ʻAná “naʻe ʻikai mahuʻi ia mei he Temipale.” Ko ʻene loto-tōnungá naʻe ueʻi ai ʻa Sihova ke ne ʻoange kiate ia ha tāpuaki makehe. (Luke 2:​36-38) ʻI he ʻahó ni, ʻoku fakahāhā ʻe he fanga tokoua mo e fanga tuofāfine tokolahi ha laumālie hangē ko ia naʻe ʻia ʻAná neongo ʻa e fehangahangai mo e ngaahi tuʻunga faingataʻá. ʻI he taimi kuo pau ai ke fetakai ʻa e faʻahinga loto-tōnunga ko iá mo e ngaahi palopalema fakaemoʻui leleí pe ngaahi fakangatangata tupu mei he taʻumotuʻá, te nau ongoʻi loto-siʻi nai ai ʻi he taimi ʻe niʻihi. Tau vakai angé ki ha ngaahi founga ʻaonga ʻe niʻihi ʻa ia ʻe lava ke tau fakalotolahiʻi ai kinautolu pea tokoniʻi kinautolu ke tauhi maʻu ha founga-tuʻumaʻu lelei fakalaumālie.

² Ngaahi Fakatahá mo e Ngāue Fakafaifekaú: ʻI he taimi ʻoku fokotuʻutuʻu anga-ʻofa ai ʻe he niʻihi kehé ke tokonaki mai ha meʻalelé, ʻoku lavangofua ai ʻa e faʻahinga taʻumotuʻa loto-tōnunga tokolahi ke maʻu tuʻumaʻu ʻa e ngaahi fakataha faka-Kalisitiané. ʻOku langa hake fakalaumālie ʻe he meʻá ni ʻa e kau sevāniti loto-tōnunga fuoloa ko ení, pea maʻu ʻaonga foki mei ai ʻa e fakatahaʻangá. Kuó ke kau ʻi he ngāue lelei ko ení?​—Hep. 13:16.

³ Ko e kau tuʻumaʻu ʻi he ngāue fakafaifekaú ʻoku ʻomai ai ʻa e fiefia mo e fiemālie ki he kau Kalisitiane moʻoní. Ka ko hono fai iá ʻe lava ke hoko ia ko ha pole ki he kau taʻumotuʻá mo e mahamahakí. ʻOku malava ke ʻalu fakataha mo koe ha taha ʻo e siʻi faʻahingá ni ko ha “kaungāngaue” ʻi ha tafaʻaki ʻo e ngāue fakaefakamoʻoní? (Loma 16:​3, 9, 21) Mahalo pē ʻe lava ke ke fakaafeʻi ia ke kau fakataha mo koe ʻi he faifakamoʻoni telefoní pe ko e ʻalu mo koe ʻi ha toe ʻaʻahi pe ko ha ako Tohitapu. Kapau ko e tokotaha taʻumotuʻá ʻoku nofo maʻu ʻi ʻapi, ʻe lava ke ʻalu ha tokotaha ako Tohitapu ki he ʻapi ʻo e tokotaha ko iá ki he ngaahi akó?

⁴ Akó mo e Feohí: ʻI he taimi ki he taimi, ʻoku fakaafeʻi ai ʻe ha niʻihi ha tokotaha taʻumotuʻa pe mahamahaki ke kau ki heʻenau ako fakafāmilí, naʻa mo hono fai ʻa e akó ʻi he ʻapi ʻo e tokotaha ko iá. Naʻe ʻave ʻe ha faʻē ʻe taha ʻa ʻene ongo tamaiki īkí ki ha ʻapi ʻo ha tuofefine taʻumotuʻa ki heʻenau ako ʻi he ʻEku Tohi ʻo e Ngaahi Talanoa Faka-Tohitapú, pea naʻe fakalototoʻaʻi ʻa e tokotaha kotoa ʻe he feohí. ʻOku toe fiefia ʻa e faʻahinga tāutaha peheé ʻi hono fakaafeʻi ki ha kai pe ko ha taimi fakasōsiale kehe. Kapau ko e faʻahinga mahamahakí ʻoku nau fuʻu vaivai ki ha ʻaʻahi fuoloa, mahalo pē ʻe lava ke ke ʻaʻahi ki ai pe tuʻu nounou atu ai ke lautohi kia kinautolu, lotu fakataha mo kinautolu, pe vahevahe ha meʻa fakatupu langa hake naʻe hokosia.​—Loma 1:​11, 12.

⁵ ʻOku koloaʻaki ʻe Sihova ʻa e faʻahinga taʻumotuʻa loto-tōnungá. (Hep. 6:​10, 11) ʻOku lava ke tau faʻifaʻitaki kiate ia ʻaki hono fakahāhā ʻetau houngaʻia ʻia kinautolú pea ʻi hono tokoniʻi kinautolu ke tauhi maʻu ha founga-tuʻumaʻu lelei fakalaumālie.