Akoʻi ki he Niʻihi Kehé ʻa e Lea Maʻá

¹ Neongo ʻa e haʻu mei he ‘puleʻanga, matakali, faʻahinga, mo e ngaahi lea’ lahí, ko e Kau Fakamoʻoni ʻa Sihová ko ha kakai fāʻūtaha ia, ko ha fetokouaʻaki fakavahaʻapuleʻanga moʻoni. (Fkh. 7:9) ʻI he māmani māvahevahe ʻo e ʻaho ní, ʻoku fakaofo ia. ʻOku malava fēfē ia? Koeʻuhí kuo ʻomai kia kitautolu “a e liliu ki ha lea maʻa.”​—Sef. 3:​9, NW.

² Ngaahi Ola Fakaofo: Ko e hā ʻa e lea maʻa ko ení? Ko e mahinoʻi totonu ia ʻo e moʻoni ʻoku maʻu ʻi he Folofola ʻa e ʻOtuá fekauʻaki mo Sihova mo ʻene ngaahi taumuʻá, tautefito ki he moʻoni ʻo fekauʻaki mo e Puleʻanga ʻo e ʻOtuá. Hangē ko ia naʻe tomuʻa tala ʻe Sīsuú, ko e moʻoni ko ení ʻoku tufaki ia fakafou ʻi he fouʻanga hāmai fakaemāmani, ko e “tamaioeiki agatonu mo boto,” fakataha mo e ola ko hono tali lelei ʻa e lotu moʻoní ʻe he kakai “mei he ngaahi lea kehekehe ʻo e ngaahi puleʻanga.”​—Mt. 24:​45, PM; Sak. 8:​23.

³ ʻI he ako ʻe he kakaí ʻa e lea maʻá, ʻoku ueʻi ai kinautolu ke liliu ʻenau moʻuí ki he ngaahi tuʻunga ʻa Sihová. ʻOku nau ako ai ke “maʻopoʻopo, ʻo loto taha mo fakakaukau taha.” (1 Kol. 1:10) Ko e akonaki fakaʻotuá ʻoku toe fakatupu ai ʻia kinautolu ʻa e ʻulungaanga faitotonu mo e lea lelei mo moʻoni, tautefito ʻi he fekauʻaki mo hono tala ki he niʻihi kehé ʻa e ongoongo leleí. (Tai. 2:​7, 8; Hep. 13:15) Ko e ngaahi liliu fakaofo ko ení ʻoku fakalāngilangiʻi ai ʻa Sihova.

⁴ Ko e fakatātaá, ko ha tangata ʻa ia naʻe fanongo ki he ongoongo leleí naʻe lahi ʻene ngaahi fehuʻí, ʻa ia naʻe tali kotoa mei he Tohitapú. ʻI hono ueʻi ʻe he meʻa naʻá ne fanongo ki aí, naʻá ne kamata ai ke ako tuʻo ua ʻi he uike mo maʻu ʻa e ngaahi fakatahá. Naʻá ne ʻohovale ʻi he talitali lelei māfana naʻá ne maʻu ʻi he Fale Fakatahaʻangá, koeʻuhi ko e tokolahi naʻe ʻi aí naʻa nau mei ha matakali kehekehe. ʻI ha taimi nounou, ko ia mo hono uaifí naʻá na fai ha ngaahi liliu ʻi heʻena moʻuí pea papitaiso. Talu mei ai kuó ne tokoniʻi nai ha toko 40 kehe, ke nau tauhi kia Sihova, ʻo kau ai ʻa e ngaahi mēmipa tokolahi ʻi hono fāmilí. Neongo ʻene tofanga ʻi he faingataʻaʻia fakasinó, naʻá ne kamata ki muí ni ke ngāue ko ha tāimuʻa.

⁵ Akoʻi ʻa e Niʻihi Kehé: ʻOku fakatupunga ʻe he ngaahi meʻa ʻoku hoko ʻi he māmaní ʻa e kakai faitotonu tokolahi ke nau toe sivisiviʻi ʻenau fakakaukaú mo ʻenau moʻuí. ‘Hangē ko Sīsuú, ʻoku totonu ke tau holi ke tokoniʻi kinautolu. Ko e ngaahi toe ʻaʻahi mo e ngaahi ako Tohitapu ola leleí ko ha kī ia ki hono tokoniʻi ʻa e faʻahinga loto-totonú ke nau ako ʻa e lea maʻá.

⁶ Ko ha fakaofiofi kuo fakamoʻoniʻi ʻa ʻene ola lelei ʻi he kakai femoʻuekiná ko hono fai ha ako Tohitapu nounou ʻi honau matapaá tonu. (km 5/02 p. 1) Kuó ke ʻahiʻahiʻi eni? ʻI hoʻo teuteu ke fai ha toe ʻaʻahí, filifili mei he fakalahi ʻo ʻEtau Ngāue Fakafaifekau ʻo e Puleʻanga ʻo Sanuali 2002 ha tuʻuaki ʻa ia ʻoku feʻunga mo e tokotaha-ʻapí. Ko e lahi ʻo e ngaahi tuʻuaki ʻi he fakalahi ko ení kuo faʻufaʻu ia ke tataki fakahangatonu ki ha fetalanoaʻaki ʻi he polosiua Fiemaʻu pe ko e tohi ʻIlo. ʻAhiʻahiʻi ʻa e tuʻuakí koeʻuhi ke ke lava ʻo hiki lelei ai mei he talateú ki ha fetalanoaʻaki ʻi he taha ʻo e ngaahi palakalafí. Fili ha konga Tohitapu ʻe taha pe ua mei he palakalafí ke lau pea fetalanoaʻaki ki ai, pea teuteu ha foʻi fehuʻi ke fakaʻosiʻaki. ʻE tokoni ia ke tataki ki he palakalafi ʻokú ke palani ke lāulea ki ai ʻi he ʻaʻahi hoko maí.

⁷ ʻOku hokosia ʻe he kakai ʻa Sihová ʻa e ngaahi tāpuaki lahi ko e tupu ia mei hono ako ʻa e lea maʻá. ʻOfa ke tau tokoniʻi tōtōivi ʻa e niʻihi kehé ke nau kau fakataha mo kitautolu ʻi he ‘ui ki he huafa o Jihová’ pea ʻi he “tauhi kiate ia i he uouagataha.”—Sef. 3:​9, PM.