Ko ha Foʻi Vitiō Te Ne Fakamāmaʻi mo Ueʻi Koe!

Ko ʻEpeleli 1951 ia. Ko e laui afe ʻo e Kau Fakamoʻoni ʻa Sihova ʻi he Sovieti ʻIunioni ki muʻá—ko e ngaahi fāmilí fakakātoa—naʻe fakatahatahaʻi fakataha mai, ʻo fakaheka ki he ngaahi lēlue, pea fakaheeʻi ki Saipīlia. Ko e hā naʻe fakapapauʻi ai ʻe he puleʻanga Sovieti mālohí ke fakaʻauha kinautolú? Naʻe anga-fēfē ʻa e hao moʻui ʻa hotau fanga tokouá pea aʻu ʻo nau lakalakaimonū neongo ʻa e ngaahi hongofuluʻi taʻu ʻo e fakatanga taʻetukú? Te ke maʻu ʻa e talí ʻi he foʻi vitiō Faithful Under Trials​—Jehovah’s Witnesses in the Soviet Union. Sio ai, pea tuku ʻa ʻene pōpoaki fakamāmá ke ne ueʻi koe ke ke tauhi maʻu hoʻo faitōnunga kia Sihová, ʻo tatau ai pē pe ko e hā ʻe hokó!

ʻE lava ke ke tali ʻa e ngaahi fehuʻi ko ení? (1) Ko fē ʻa e taimi naʻe ʻuluaki maʻu ai ʻe he Kau Fakamoʻoni ʻa Sihová ʻa e fakangofua fakapuleʻanga ʻi Lūsiá? (2) Ki muʻa pea ʻi he hili ʻa e Tau II ʻa Māmaní, naʻe anga-fēfē ʻa e hoko ʻa e Sovieti ʻIunioní ʻo maʻu ʻa e toe ngaahi fāmili Fakamoʻoni ʻe laui afé? (3) Naʻe anga-fēfē ʻene fepaki fakahangatonu ʻenau ngaahi tuí mo e filōsofia ʻa Lēniní? (4) Ko e hā ʻa e Fakahoko-Ngāue Tokelaú, pea ko e hā naʻe ʻamanaki ʻa Sitālini ke fakahoko fakafou ʻi aí? (5) Naʻe ʻuhinga ki he hā ʻa e fakahēʻí ki he Kau Fakamoʻoní, pea ko e hā naʻe tala kia kinautolu ke nau fai koeʻuhi ke kalofi ai ʻa e hoko ʻo fakahēʻí? (6) ʻI he fononga lēlue lōloa ki Saipīliá, naʻe anga-fēfē ʻa e fefakalototoʻaʻaki ʻa hotau fanga tokouá mo e fanga tuofāfiné ʻo nau fakaʻohovaleʻi ai ʻa e faʻahinga ne nau puke kinautolú? (7) Ko e hā ʻa e ngaahi faingataʻa naʻe kātakiʻi ʻe he Kau Fakamoʻoní ʻi Saipīliá? (8) Ko e hā ʻa e tokonaki fakalaumālie naʻe fakamahuʻingaʻi lahi ʻe he kakai ʻa Sihová, pea ko e hā hono ʻuhingá? (9) Ko e hā naʻe loto-lelei ai hotau fanga tokouá ke tuku ʻenau moʻuí ki he tuʻunga fakatuʻutāmaki koeʻuhi ke maʻu ʻenau ʻū tohí, pea naʻe anga-fēfē ʻenau lavameʻa ʻi he ngaahi feinga taʻetuku ʻa e kau maʻu mafaí ke taʻofi ʻenau maʻu iá? (10) Naʻe anga-fēfē ʻa e hokohoko atu ʻe Khrushchev ʻa hono ʻohofi ʻo e kakai ʻa e ʻOtuá? (11) Naʻe anga-fēfē ʻa e feinga ʻa e kau maʻu mafaí ke fakaʻauha ʻa e tui ʻa e fānau Fakamoʻoní? (12) Ko e hā ʻa e mahino māʻalaʻala naʻe maʻu ʻe hotau fanga tokouá ki he ʻuhinga naʻe fakatangaʻi ai kinautolú? (2002 Yearbook, peesi 203-4) (13) Naʻe anga-fēfē hono maʻu ha ola kehe ʻe he kau fai fakatangá ʻi he ʻohofi kotoa naʻe fai ki he kautaha ʻa e ʻOtuá? (2002 Yearbook, peesi 220-1) (14) Ko e hā ʻa e ngaahi meʻa naʻe fakahoko ʻa ia ko ha ngaahi fakaʻamu pē ia ʻi ha taimi ki he Kau Fakamoʻoni ʻi he Sovieti ʻIunioni ki muʻá? (15) Ko e hā ʻa e meʻa naʻá ne tokoniʻi hotau fanga tokouá ʻi honau ngaahi ʻahiʻahí, pea ʻoku anga-fēfē hono fakahaaʻi ʻi he konga fakaʻosi ʻo e foʻi vitioó ʻa e moʻoni ʻo e Selemaia 1:​19? (16) Fakamatala ki he taha ʻo e ngaahi meʻa naʻe hokosia moʻoni ʻi he moʻui loto-tōnunga ʻi he malumalu ʻo e ʻahiʻahí ʻa ia ʻoku tautefito ʻene ueʻi koé.