Ko e Folofola ʻa e ʻOtuá ʻa e Moʻoní
1. Ko e hā ʻa e fakamatala mahuʻinga ʻoku ʻi he Tohitapú?
1 “Ka tanaki hoʻo folofola ko hono ola ko e moʻoni ʻatā,” ko e tohi ia ʻa e tokotaha-tohi-sāmé. (Sāme 119:160) Fakafou ʻi heʻene Folofola fakamānavaʻí, ʻoku ʻomai ai ʻe Sihova ʻa e ngaahi tali fakanonga ki he ngaahi fehuʻi mahuʻinga taha ʻi he moʻuí. ʻOkú ne ʻomai ai ʻa e fakafiemālie mo e ʻamanaki ki he faʻahinga ʻoku faingataʻaʻiá. Pea ʻokú ne fakahaaʻi mai ai kia kitautolu ʻa e founga ʻe lava ke tau ʻunuʻunu ofi ai kiate iá. “Ko hono ako ʻa e moʻoni mei he Tohitapú ʻoku hangē ia ko hono liʻaki ha feituʻu mātuʻaki fakapoʻuli mo poʻuli lōlō pea hū atu ki ha loki maama, ulo, mo fakamānako,” ko e lea ia ʻa ha fefine houngaʻia ʻe taha. ʻOkú ke feinga ke vahevahe atu ʻa e moʻoni mei he Folofola ʻa e ʻOtuá ʻi he faingamālie kotoa pē?
2. ʻOku anga-fēfē hono fakaleleiʻi ʻe he Tohitapú ʻa e moʻui ʻa e kakaí?
2 Mālohi Fakaeliliu mo Fakamānako ki he Kakai Kotoa: ʻOku maʻu ʻe he moʻoni faka-Tohitapú ʻa e mālohi ke aʻu ki he lotó pea liliuʻi ʻa e moʻuí. (Hep. 4:12) Ko ha finemui ko hono hingoá ko Rosa naʻá ne hoko ʻo kau ʻi he feʻauaki totongí pea pehē ki hono ngāuekoviʻaki ʻa e ʻolokaholó mo e faitoʻo kona tapú. “ʻI he ʻaho ʻe taha, ʻi he ʻikai ʻaupito toe ʻi ai haʻaku ʻamanakí,” ko ʻene leá ia, “naʻe talanoa mai ai ha ongo meʻa Fakamoʻoni kiate au fekauʻaki mo e founga ʻe lava ke tokoniʻi ai kitautolu ʻe he Tohitapú ke solova ʻetau ngaahi palopalemá. Naʻá ku kamata ako ʻa e Folofola ʻa e ʻOtuá, ʻa ia naʻe fakamānako ʻaupito kiate au. ʻI loto ai ʻi ha māhina naʻá ku maʻu ʻa e mālohi ke moʻui ʻi ha moʻui ʻulungaanga maʻa mo foʻou. ʻI heʻeku maʻu he taimí ni ha taumuʻa ʻi he moʻuí, ʻoku ʻikai te u kei fiemaʻu ʻa e tokoni ʻa e ʻolokaholó pe ko e ngaahi faitoʻo kona tapú. Pea koeʻuhi naʻá ku fiemaʻu lahi ke hoko ko e kaumeʻa ʻo Sihova, naʻá ku fakapapauʻi ke moʻuiʻaki ʻene ngaahi tuʻungá. Ka ne taʻeʻoua ʻa e poto ʻaonga ʻo e Folofola ʻa e ʻOtuá, ʻoku ou tui ʻi he taimi ní kuó u ʻosi taonakita.”—Sāme 119:92.
3. Ko e hā ʻoku ʻikai totonu ai ke tau fakaʻehiʻehi mei hono vahevahe atu ʻa e pōpoaki ʻo e Tohitapú ki he niʻihi kehé?
3 ʻI he ʻikai tatau mo e ʻū tohi lahi he ʻaho ní, ʻoku fakamānako ʻa e Tohitapú ki he kakai ʻo e ‘puleʻanga kotoa pē, matakali, faʻahinga mo e ngaahi lea.’ (Fkh. 7:9) Ko e finangalo ʻo e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) Ko ia ai, ʻoku ʻikai ʻaupito totonu ke tau fakamahalo ʻe ʻikai fiefanongo ha tokotaha ki he ongoongo leleí koeʻuhi pē ko hono ʻātakaí. ʻI hono kehé, vahevahe atu ki he tokotaha kotoa ʻa e pōpoaki ʻo e Puleʻangá, ʻo fai hangatonu ia mei he Tohitapú ʻi ha taimi pē ʻe ala lava aí.
4. ʻE lava fēfē ke tau ngāueʻaki ʻa e Tohitapú ʻi hono fai ha fakamoʻoní?
4 Fakamamafaʻi ʻa e Ngaahi Konga Tohitapú: ʻOku lahi ʻa e ngaahi faingamālie ke ngāueʻaki ai ʻa e Tohitapú ʻi he ngāue fakafaifekaú. ʻI hono tuʻuaki ʻa e ngaahi makasiní, feinga ke fakakau ai ʻa e konga Tohitapu ʻoku hā ʻi he tuʻuaki ʻoku fokotuʻu maí. ʻI hono ngāueʻaki ʻa e tohi ʻoku tuʻuaki ʻi he māhiná, ʻoku ʻiloʻi ʻe he niʻihi ʻoku ola lelei ke fakakau ai ʻa hono lau ʻo ha konga Tohitapu kuo filifili lelei ʻi heʻenau lea kamatá. ʻI hono fai ʻa e ngaahi toe ʻaʻahí, vahevahe ha konga Tohitapu ʻe taha pe lahi ange ʻi he taimi taki taha, ke tokoniʻi ʻa e tokotaha ʻapí ke laka ki muʻa ʻene maʻu ʻa e ʻilo totonú. ʻI hono fai ha ako Tohitapú, fakahangataha ʻa e fetalanoaʻakí ki he ngaahi konga Tohitapu tefitó. ʻI he ʻikai kau ʻi he ngāue fakafaifekau anga-mahení, ʻai ke ala maʻu ha Tohitapu ke ngāueʻaki ʻi he taimi ʻoku malanga hake ai ʻa e ngaahi faingamālie ke faifakamoʻoni ʻi he founga ʻikai anga-mahení.—2 Tim. 2:15.
5. Ko e hā ʻoku totonu ai ke tau feinga ke ngāueʻaki ʻa e Tohitapú ʻi heʻetau ngāue fakafaifekaú?
5 ʻOfa ke tau tokoniʻi ʻa e niʻihi kehé ke nau maʻu ʻaonga mei he mālohi fakaueʻiloto ʻo e Folofola ʻo e moʻoni ʻa e ʻOtuá ʻaki hono ngāueʻaki ʻa e Tohitapú ʻi he faingamālie feʻungamālie kotoa pē ʻi heʻetau ngāue fakafaifekaú.—1 Tes. 2:13.