Ko e Ngāue Fakafaifekau Faka-Kalisitiané—ʻEtau Ngāue Tefitó
1 Ko kitautolu kotoa ʻoku tau maʻu ʻa e faʻahinga ngāue kehekehe ʻa ia kuo pau ke tau fai. Ko e tokonaki maʻa hoto fāmilí ko ha fiemaʻu fakaʻotua ia. (1 Tim. 5:8) Kae kehe, ko e ngāue ʻoku kau ki he fiemaʻu fakaʻotua ko iá ʻoku ʻikai totonu ke mahuʻinga ange ia ʻi he ngāue ko hono malangaʻi ʻo e Puleʻangá mo e ngaohi-ākongá.—Mt. 24:14; 28:19, 20.
2 Naʻe tokonaki mai ʻe Sīsū ha faʻifaʻitakiʻanga kia kitautolu ke tau muimui ai ʻi he “fuofua kumi ae buleaga.” (Mt. 6:33, PM; 1 Pita 2:21) Neongo ʻa hono maʻu ʻa e meʻa fakamatelie siʻisiʻí, naʻá ne nōfoʻi kakato ki hono fai ʻa e finangalo ʻo ʻene Tamaí. (Luke 4:43; 9:58; Sione 4:34) Naʻá ne fakafitefitaʻa ʻi hono fai ha fakamoʻoni ʻi he faingamālie kotoa pē. (Luke 23:43; 1 Tim. 6:13) Naʻá ne fakaʻaiʻai ʻene kau ākongá ke nau maʻu ʻa e mahuʻingaʻia lahi tatau ʻi he ngāue utu-taʻú.—Mt. 9:37, 38.
3 Faʻifaʻitaki kia Sīsū ʻi he ʻAhó Ni: ʻE lava ke tau faʻifaʻitaki ki he faʻifaʻitakiʻanga ʻa Sīsuú ʻaki ʻa e feinga ke moʻui ʻi ha moʻui faingofua ʻa ia ʻoku fakatefito ʻi he ngāue fakafaifekau faka-Kalisitiané. Kapau ʻoku tau maʻu ʻa e ngaahi meʻa ʻoku fiemaʻu ki he moʻuí, tau tokanga ki he akonaki ʻa e Tohitapú ke ʻoua ʻe feinga ke toe maʻu mai ʻa e meʻa lahi ange ʻi he koloa ʻo e māmani ko ení. (Mt. 6:19, 20; 1 Tim. 6:8) He lelei lahi ange ē ke feinga ke fakalahi ʻetau kau ʻi he ngāue fakamalangá! Kapau ʻoku tau fehangahangai mo ha ngaahi tuʻunga faingataʻa, ʻofa ke tau fakafitefitaʻa ʻo hangē ko ia ne fai ʻe Sīsuú, ʻo ʻikai fakaʻatā ʻa e ngaahi loto-moʻua ʻo e moʻuí ke hoko ʻo mahuʻinga ange ia ʻi heʻetau ngāue tefito ko hono talaki ʻa e ongoongo lelei ʻo e Puleʻangá.—Luke 8:14; 9:59-62.
4 Naʻa mo e faʻahinga ʻoku lahi honau ngaahi fatongiá ʻoku nau fakamuʻomuʻa ʻa e ngāue fakamalangá. Ko ha tokoua ʻoku ʻi ai hano fāmili tokolahi, ʻa ia ʻokú ne maʻu ha ngāue fua fatongia, pea ngāue ko ha mātuʻa ʻi he fakatahaʻanga Kalisitiané ʻokú ne pehē: “ʻOku ou vakai ki he ngāue fakafaifekaú ko ʻeku ngāue tefitó ia.” ʻOku pehē ʻe ha tuofefine tāimuʻa: “Ko e ngāue tāimuʻá ʻoku mahuʻinga mamaʻo ange ia ʻi ha ngāue fakamāmani lavameʻa.”
5 Tatau ai pē pe ko e hā hotau ngaahi tuʻungá, ʻofa ke tau muimui ʻi he faʻifaʻitakiʻanga ʻa Sīsuú. Anga-fēfē? ʻAki hono ʻai ʻa e ngāue fakafaifekau faka-Kalisitiané ko ʻetau ngāue tefitó ia.