Faʻifaʻitaki kia Kalaisi ʻi Hoʻo Ngāue Fakafaifekaú
1 Naʻe fokotuʻu ʻe Sīsū ʻa e faʻifaʻitakiʻanga ke tau muimui ai ʻi heʻetau ngāue fakafaifekaú. Ko ʻene ʻofa lahi ki he ʻOtuá pea mo e kakaí naʻe fakahāhā ia ʻi he ngaahi taimi mo e ngaahi founga lahi. Naʻá ne akoʻi ʻa e moʻoní ki he anga-vaivaí pea fai manavaʻofa ki he faʻahinga naʻe faingataʻaʻia mo tāpalasiá.—Mt. 9:35.
2 Faʻifaʻitakiʻanga mo e Akonaki ʻa Sīsuú: Naʻe ʻikai ke ofeʻi ʻa e tokanga ʻa Sīsuú ʻi haʻane kau ʻi he ngaahi meʻa fakapolitikalé pe ngaahi ngāue lelei fakaetangata ke fakaleleiʻi ʻa e nofó. Pea naʻe ʻikai te ne fakaʻatā ha ngaahi ngāue fakataumuʻa lelei kehe ke ne fakaleluʻi ia pe muʻomuʻa ia ʻi heʻene ngāue tefitó. (Luke 8:1) Naʻá ne tokangataha ki hono malangaʻi ʻa e ongoongo lelei ʻo e Puleʻanga ʻo e ʻOtuá ʻi he tuʻunga ko e fakaleleiʻanga tuʻuloa pē ia ki he ngaahi palopalema ʻa e tangatá. Naʻe ʻi ai ʻa e ngāue mahuʻinga ʻa Sīsū ke fai pea naʻe fakangatangata ʻa e taimi ke fai ai iá. ʻI he loto ʻa e kakai ʻi Kāpaneumé ke ne nofo ange aí, naʻe pehē ʻe Sīsū ki heʻene kau ākongá: “Tau ō ki ha potu kehe . . . koeʻuhi ke u malanga ki ai foki: he ko ia ia naʻa ku haʻu ai.”—Mk. 1:38.
3 Hili hono akoʻi ʻe Sīsū ʻa ʻene kau ākongá, naʻá ne tuku atu kinautolu mo e ngaahi fakahinohino ko ení: “Mou fanongonongo, ʻo pehē, Kuo ofi ʻa e Puleʻanga ʻo Hevani.” (Mt. 10:7) Naʻá ne akoʻi ʻa hono kau muimuí ʻoku totonu ke muʻomuʻa ʻa e ngaahi meʻa ʻo e Puleʻangá ʻi heʻenau moʻuí. (Mt. 6:33) Ko e ngaahi lea tuku ʻa Sīsū ki heʻene kau ākongá peá ne mavahe hake ki hēvaní naʻe hā mahino ai ʻa e meʻa naʻe pau ke nau faí. Naʻá ne pehē: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako.”—Mt. 28:19.
4 Mahuʻinga ʻo e Puleʻangá: Ko e Puleʻanga ʻo e ʻOtuá ʻa e kaveinga tefito ʻo e talanoa ʻa Sīsuú, pea naʻá ne fakaʻaiʻai ʻa ʻene kau ākongá ke nau muimui ʻi heʻene faʻifaʻitakiʻangá. Ko e ngaahi feinga fakaetangata ke solova ʻa e ngaahi palopalema ʻa e tangatá ʻe ʻikai ke lavameʻa ia. (Sel. 10:23) Ko e Puleʻanga pē ʻo e ʻOtuá te ne fakamāʻoniʻoniʻi ʻa e huafa ʻo e ʻOtuá pea ʻomai ʻa e fakafiemālie tuʻuloa ki he faʻahinga ʻo e tangatá. (Mt. 6:9, 10) Ko hono akoʻi ʻa e ngaahi moʻoni ʻo e Puleʻangá ki he kakai ʻoku “mapuhoi mo toʻe koeʻuhi ko e ngaahi fakalielia ʻoku fai” ʻoku tokoniʻi ai kinautolu ke nau maʻu ha moʻui fiefia mo lavameʻa he taimí ni pea pikimaʻu ki ha ʻamanaki falalaʻanga ki he kahaʻú.—Isi. 9:4.
5 ʻOku hokohoko atu ʻa e kau ʻa Sīsū ʻi hono malangaʻi ʻa e ongoongo lelei ʻo e Puleʻanga ʻo e ʻOtuá pea ʻokú ne fakapapauʻi mai ʻa ʻene poupoú. (Mt. 28:20) Ko e hā hono lahi ʻo e fehoanaki ʻetau ngāue fakafaifekaú mo e sīpinga naʻe fokotuʻu mai ʻe Sīsuú? (1 Pita 2:21) ʻI he ngaahi ʻaho fakaʻosi mahuʻinga ko ení, ʻofa ke tau fai ʻa e meʻa kotoa ʻoku ʻi hotau mafaí ke muimui ofi ki he faʻifaʻitakiʻanga naʻe fokotuʻu ʻe Sīsū ʻi he ngāue fakafaifekaú!