Kātaki ʻo ʻAʻahi Vave

ʻAʻahi vave kia hai? Ki he faʻahinga ʻoku nau kole ke ʻoange ha ʻū tohi pe ko ha makasini tuʻumaʻú, pe ʻoku nau saiʻia ke ʻaʻahi ange ha tokotaha Fakamoʻoni ki honau ʻapí. ʻOku haʻu mei fē ʻa e ngaahi kole ko iá? Mei he faʻahinga tāutaha ʻoku nau fetuʻutaki ki he ʻōfisi vaʻá ʻi he meilí pe telefoní pe fakafou ʻi heʻetau tuʻuʻanga Uepi ʻInitaneti fakaʻofisialé. ʻI hono fakahaaʻi ʻa e mahuʻingaʻia peheé, ʻoku fakahā ia ʻe he ʻōfisi vaʻá ki he fakatahaʻanga fakalotofonuá fakafou ʻi he foomu S-70, ʻa ia ko ha lauʻipepa ko hono kaveingá ko e “Kātaki ʻo Fokotuʻutuʻu ki ha Tokotaha Malanga Taau ke ʻAʻahi ki he Tokotahá Ni.” ʻI he taimi ʻoku maʻu ai ʻe he kau mātuʻá ha foomu S-70, ʻoku totonu ke nau ʻave vave ia ki ha tokotaha malanga ʻoku toe foki tōtōivi ki he tokotaha mahuʻingaʻiá. Kapau ʻoku faingataʻaʻia ʻa e tokotaha malangá ʻi hono maʻu ʻi ʻapi ʻa e tokotahá, ʻe feinga nai ʻa e tokotaha malangá ke fetuʻutaki kiate ia ʻi he telefoní pe ʻoku fakapotopoto ke tuku ai ha nouti. Kapau ʻoku kole atu ke ke fai ha ʻaʻahi pehē, kātaki ʻo fakapapauʻi ke fetuʻutaki vave ki he tokotaha mahuʻingaʻiá.