Puha Fehuʻi

◼ Ko hai ʻoku totonu ke ne fakafonu ʻa e ngaahi kūponí mo e ngaahi kole ʻi he ʻInitanetí?

Ko ʻetau ʻū tohí ʻoku faʻa ʻi ai ʻa e ngaahi kūponi ʻa ia ʻe lava ke fakafonu pea ʻave ki he ʻōfisi vaʻá ke kole ha ʻū tohi pe ko ha ʻaʻahi mei he Kau Fakamoʻoni ʻa Sihová. Tānaki atu ki ai, ko ʻetau Uepisaiti www.watctower.org ʻe lava ke ngāueʻaki ke kole ha ako Tohi Tapu. Ko e ongo tokonaki ko ení ʻoku tokoniʻi ai ʻa e tokolahi ke nau ako ʻa e moʻoní. Kae kehe, kuo hoko e ngaahi palopalema ʻi hono ngāueʻaki ʻe he kau malangá ʻa e ongo meʻangāue ko ení ke fai ai e fokotuʻutuʻu ki honau ngaahi kāingá pe niʻihi kehé ke nau maʻu ha tokoni fakalaumālie.

Ko e niʻihi kuo ʻave kia kinautolu ʻa e ʻū tohi naʻe ʻikai te nau kole mei he ʻōfisi vaʻá kuo nau lāunga, ʻi he ongoʻi ʻoku fakahohaʻasi kinautolu heʻetau kautahá pea fokotuʻu kinautolu ʻi ha faʻahinga lisi feʻaveʻaki meili. Ko e kau malanga kuo nau maʻu ha nouti ke ʻaʻahi ki ha taha naʻe ʻikai te ne kole fakafoʻituitui ke fai ange ha ʻaʻahí kuo nau mā ʻi hono fakahaaʻi ʻa e ʻita ʻe he tokotahá. Ko ia ai, ko e ngaahi kole kuo fai ʻi heʻetau Uepisaití pe fakafou he ngaahi kūponí ʻoku totonu ke haʻu ia mei he faʻahinga mahuʻingaʻiá tonu ʻo ʻikai ko e fai ʻe he kau malangá maʻá e niʻihi kehé. ʻI hono ʻiloʻi ko e ngaahi kole ko iá ko e ʻave ia maʻa ha taha kehe, ʻoku ʻikai faʻa tali ia.

ʻE lava fēfē leva ke tau tokoniʻi fakalaumālie ha kāinga pe ko ha maheni? Kapau te ke saiʻia ke ne maʻu ha ʻū tohi, ko e hā ʻoku ʻikai te ke ʻave hangatonu ai kiate ia ko ha meʻaʻofá? Kapau kuó ne fakahaaʻi ha mahuʻingaʻia pea fakaʻamu ke ʻaʻahi ange ha Kau Fakamoʻoni ka ʻoku ʻikai te ke ʻiloʻi e founga ke fetuʻutaki ai ki he kau mātuʻa he fakatahaʻanga fakalotofonuá, ʻoku totonu ke ke ʻave ha foomu Please Follow Up (S-43) ki hoʻo sekelitali ʻi he fakatahaʻangá, ʻa ia te ne vakaiʻi pea ʻave ia ki he ʻōfisi vaʻá. Kae kehe, kapau ko e tokotaha mahuʻingaʻiá ʻoku tuku ʻi ha pilīsone, ko ha ʻapi pōpula, ko ha feituʻu ʻoku tauhi ai e faʻahinga ʻoku nau ngāuekoviʻaki e faitoʻo kona tapú, pe ko ha falemahaki, ʻoku ʻikai totonu ke fetuʻutaki ki he vaʻá maʻanautolu. ʻI hono kehé, ʻe lava ke ke fakaʻaiʻai ia ke fetuʻutaki ki he fanga tokoua ʻoku nau ʻaʻahi atu ki he feituʻú pe tohi fakafoʻituitui ki he ʻōfisi vaʻá.