Puha Fehuʻi

◼ ʻOku totonu ke lahi hono ngāueʻaki ʻe he kau malangá ʻa e ʻInitanetí ki he faifakamoʻoni pe ako mo ha sola ʻi ha fonua kehe?

Kuo ngāueʻaki ʻe he kau malanga ʻe niʻihi ʻa e ʻInitanetí ke fai ha ngaahi ako Tohi Tapu ʻi he ngaahi fonua ʻoku tapui ai ʻetau ngāué pe tokosiʻi ai ʻa e kau malangá. ʻI he ngaahi tuʻunga ʻe niʻihi, kuo maʻu ai ha ngaahi ola lelei. Kae kehe, ʻoku ʻi ai ʻa e ngaahi fakatuʻutāmaki ʻi he taimi ʻoku feʻīmeiliʻaki ai ʻa e kau malangá pe fetohiʻaki he ʻInitanetí mo e kau solá. (Sio ki he Ko ʻEtau Ngāue Fakafaifekau ʻo Siulai 2007, p. 3.) ʻI he taumuʻa ke aʻu ʻa e pōpoaki ʻo e Puleʻangá ki he faʻahinga loto-totonú ko e ngaahi fetuʻutaki peheé ʻe iku atu nai ha tokoua pe tuofefine ke feohi kovi, kau ai ʻa e kau tafoki ʻo fakafepaki ki he moʻoní. (1 Kol. 1:19-25; Kol. 2:8) ʻIkai ngata aí, ko e ngaahi fonua ʻoku fakangatangata pe tapui ai ʻa e ngāue ʻo e Puleʻangá, ko e fetuʻutakí ʻe lava ke muimuiʻi ia ʻe he kau maʻu mafaí. Ko e fetuʻutaki peheé ʻe lava ke fakatuʻutāmaki ia ki he fanga tokoua mo e fanga tuofāfine fakalotofonuá. Ko ia, ʻoku ʻikai totonu ki he kau malangá ke nau ngāueʻaki ʻa e ʻinitanetí ke kumi ai ki he kakai ʻi ha fonua kehe ke vahevahe atu ki ai ʻa e ongoongo leleí.

Tuku kehe ʻo ka ʻomai ʻe he ʻōfisi vaʻa fakalotofonuá ha fakahinohino, kapau ʻoku tau faifakamoʻoni ʻi he founga ʻikai anga-mahení ki ha sola ʻoku ʻaʻahi mai mei ha fonua kehe, ʻoku ʻikai totonu ke tau feinga ke fakatupulekina ʻene mahuʻingaʻiá hili ʻene fokí. ʻI hono kehé ʻoku lava ke tau fakahaaʻi kiate ia ʻa e founga ʻe lava ke ne ngāueʻaki ai ʻa e jw.org ke maʻu ʻa e ngaahi fakamatala lahi ange mo e founga ke ne fetuʻutaki ai ki he ʻōfisi vaʻa fakalotofonuá. ʻOku lava ke tau toe fakalototoʻaʻi ia ke ʻaʻahi ki ha Fale Fakatahaʻanga ofi ki hono ʻapí. Ko e moʻoni, ʻoku ʻikai ha ngaahi Fale Fakatahaʻanga ʻi he ngaahi fonua ʻe niʻihi. Kapau ʻokú ne loto ke ʻaʻahi ki ai ha Fakamoʻoni ʻi hono feituʻú, ʻoku totonu ke tau ʻave ʻa hono tuʻasilá ki he sekelitalí, pea te ne ʻave ia ʻo fakafou ʻi he jw.org. ʻOku maheni ʻa e ʻōfisi vaʻa ʻokú ne tokangaʻi ʻa e ngāue ʻi he fonua ʻoku ʻi ai ʻa e tokotaha mahuʻingaʻiá mo e ngaahi tuʻunga moʻoni ʻi aí pea ʻoku nau ʻi ha tuʻunga lelei ke tokonaki ha tokoni fakalaumālie.—Sio ki he Ko ʻEtau Ngāue Fakafaifekau ʻo Sune 2014, p. 7 mo e Ko ʻEtau Ngāue Fakafaifekau ʻo Nōvema 2011, p. 2.

Kapau ʻe hiki ha tokotaha ʻoku tau lolotonga ʻaʻahi ki ai ki ha fonua kehe pe ʻoku tau lolotonga ako mo ha taha ʻi ha fonua kehe ʻa ia naʻa tau ʻiloʻi pē ʻi he ʻInitanetí, ʻoku totonu ke tau muimui ki he fakahinohino ʻoku hā ʻi ʻolungá. Kae kehe, te tau hokohoko atu nai ke fakatupulekina ʻene mahuʻingaʻiá kae ʻoleva ke fetuʻutaki kiate ia ha tokotaha malanga fakalotofonua. Neongo ia, kapau ʻoku nofo ha tokotaha ʻi ha fonua ʻoku fakangatangata pe tapui ai ʻetau ngāué, ʻoku totonu ke tau tokanga lahi ʻi he taimi ʻoku ngāueʻaki ai ʻa e ngaahi kaveinga Fakatohitapú ʻi he faitohí, telefoní pe ʻi ha founga fakaʻilekitulōnika pē.—Māt. 10:16.