LĒSONI 22

Ko e Hā ʻOku Fai ʻi ha ʻŌfisi Vaʻa?

Fanga tokoua ‘oku nau fokotu‘utu‘u ‘a e ngāue ki he va‘a ‘i he ‘Otu Motu Solomoné — ʻOtu Motu Solomone

Taha ‘o e Kau Fakamo‘oni ‘a Sihová ‘oku ngāue ‘i he ‘ōfisi va‘a ‘i Kānatá — Kānata

Loli ki hono ‘ave ‘o e ‘ū tohí — ʻAfilika Tonga

Ko e ngaahi mēmipa ʻo e fāmili Pētelí ʻoku nau ngāue ʻi ha potungāue kehekehe, ʻi hono tokangaʻi ʻa e ngāue fakamalangá ʻi he fonua ʻe taha pe lahi ange. ʻOku nau ngāue nai ʻi he ngaahi timi liliu leá, pulusi ʻo e ngaahi makasiní, fakatakafi ʻo e ʻū tohí, tokangaʻi hono feʻaveʻaki ʻa e ʻū tohí, fai ʻa e hiki-leʻo mo faʻu ʻa e vitiō, pe tokangaʻi ʻa e ngaahi meʻa kehe ʻi he feituʻú.

ʻOku tokangaʻi ʻa e ngāué ʻe ha Kōmiti Vaʻa. ʻOku tuku ʻe he Kulupu Pulé ʻa hono fakalele ʻo e ʻōfisi vaʻa taki taha ki ha Kōmiti Vaʻa ʻoku faʻuʻaki ʻa e kau mātuʻa taau moʻoni ʻe toko tolu pe tokolahi ange. ʻOku toutou fakahā ʻe he kōmití ki he Kulupu Pulé ʻa e tuʻunga ʻoku ʻi ai ʻa e ngāué ʻi he fonua taki taha ʻi he malumalu ʻo e mafai ʻo e kōmiti ko iá pea mo ha ngaahi palopalema pē ʻoku malanga hake nai. Ko e ngaahi līpooti peheé ʻoku tokoni ia ki he Kulupu Pulé ke nau fili ai ʻa e ngaahi kaveinga ʻoku totonu ke lāulea ki ai ʻi he ʻū tohi he kahaʻú, pea ʻi he ngaahi fakatahá mo e ngaahi ʻasemipilií. Ko e kau fakafofonga ʻo e Kulupu Pulé ʻoku fekauʻi atu maʻu pē kinautolu ke nau ʻaʻahi ki he ngaahi vaʻá pea ʻoange ʻa e tataki ki he ngaahi Kōmiti Vaʻá ʻi hono fakahoko ʻenau ngaahi ngāué. (Palōveepi 11:14) ʻOku fokotuʻutuʻu ha polokalama makehe ʻoku kau ai ha malanga ʻoku fai ʻe he fakafofonga ʻo e ʻuluʻi ʻapitangá ki hono fakalototoʻaʻi ʻa e faʻahinga ʻoku nofo ʻi he feituʻu vaʻá.

ʻOku ʻoatu ʻa e poupou ki he ngaahi fakatahaʻanga fakalotofonuá. Ko e fanga tokoua fua fatongia ʻi he ʻōfisi vaʻá ʻoku nau tali ʻa hono fokotuʻu ʻo e ngaahi fakatahaʻanga foʻoú. ʻOku toe tataki ʻe he fanga tokouá ʻa e ngāue ʻa e kau tāimuʻá, kau misinalé mo e kau ʻovasia sēketi ʻoku nau ngāue ʻi he feituʻu vaʻá. ʻOku nau fokotuʻutuʻu maau ʻa e ngaahi ʻasemipilií mo e ngaahi fakataha-lahí, fokotuʻutuʻu ʻa e langa ʻo e ngaahi Fale Fakatahaʻanga foʻoú, pea fakapapauʻi ʻoku fakaheka ʻa e ʻū tohí ki he ngaahi fakatahaʻangá ke feau ʻa ʻenau ngaahi fiemaʻú. Ko e meʻa kotoa ʻoku fai ʻi ha vaʻá ʻoku tokoni ia ki he lavameʻa ʻi he tuʻunga maau ʻa e ngāue fakamalangá.—1 Kolinitō 14:33, 40.

ʻOku anga-fēfē tokoni ʻa e ngaahi Kōmiti Vaʻá ki he Kulupu Pulé?
Ko e hā ʻa e ngaahi fatongia ʻoku tokangaʻi ʻi ha ʻōfisi vaʻa?