Tohi mei he Vaʻá

Siʻi Kau Malanga ʻo e Puleʻangá:

Naʻa mau fakakaukau te mou mahuʻingaʻia ke fanongo fekauʻaki mo e tuʻunga lelei ʻo e fanga tokoua mo e fanga tuofāfine ʻe laui afe naʻe uesia ʻe he ngaahi afā naʻá ne haveki ʻa e Matāfonua ʻo e Kūlifa Fakatonga ʻo ʻAmeliká ʻi he 2005. Naʻe ʻomai ʻe he ʻōfisi Vaʻa ʻi ʻAmeliká ʻa e līpooti ko ʻení, ʻo fakahaaʻi ai ʻa e poupou anga-ʻofa naʻe fai ʻe he fetokouaʻakí.—Sione 13:35.

Naʻe pehē ʻe ha tokoua naʻe fakaʻauha hono ʻapí ʻe he Afā Kataliná: “Naʻa mau ʻalu halaʻatā ko e ngaahi vala pē naʻa mau tuí. Naʻe fai ʻe he fanga tokouá mo e fanga tuofāfiné ʻa e ngaahi ngāue naʻe fiemaʻú. Naʻa nau ʻai kimautolu ke mau ongoʻi lata. Naʻa nau loto ke mau nofo.”

Laka hake ʻi he fanga tokoua mo e fanga tuofāfine ʻe toko 8,000 ʻoku nau ngāue fakataha mo e ngaahi Kōmiti Langa Fakafeituʻu kehekehe ʻe 60 naʻa nau foaki atu honau taimí, ngaahi pōtoʻí mo ʻenau ngaahi koloá ʻi he ngāue tokoní. Kuo nau tokoni ki hono monomono pe toe langa ʻa e Fale Fakatahaʻanga ʻe 86 mo e ngaahi fale ʻe 4,178. ʻOku kei toe ʻa e ngāue ke fai ki he Fale Fakatahaʻanga ʻe 5 mo e ʻapi ʻe 722. Naʻe fononga mamaʻo mai ʻa e fanga tokoua ʻe niʻihi mei he vahefonua ko Maine mo Uāsingatoní ke tokoni. He fakamālō lahi ē ko kitautolu kotoa ʻi heʻenau ngaahi ngāue ʻofá!—1 Tes. 5:18.

Naʻe pehē ʻe ha tokotaha ngāue pole ʻe taha mei Michigan: “Naʻá ku fiefia lahi ke sio ki he fofonga malimali ʻo e ngaahi fāmilí ʻi heʻenau vakai atu ki he ngaahi fale foʻou naʻa mau langa maʻanautolú. ʻOku ʻikai te u maʻu ha lea feʻunga ke fakamatalaʻiʻaki ʻa e anga ʻo ʻeku ongoʻí ʻi heʻeku hoko ko ha konga ʻo e fetokouaʻaki fakaofo peheé.”

ʻOku mau kole atu ke hokohoko ai pē ʻa hoʻomou lotu maʻá e siʻi fanga tokoua ko ʻení—ʻa e faʻahinga naʻe uesiá pea mo e faʻahinga ʻoku nau fai ʻa e tokoní.—2 Kol. 1:11.

Mei homou fanga tokoua,

ʻŌfisi Vaʻa ʻi Nuʻu Silá