Ngāue Langa ʻOkú Ne Tokoniʻi Kitautolu ke Malanga

ʻOku vēkeveke ʻa e Kulupu Pulé ke ngāueʻaki ʻa e paʻanga tokoní ke tokonaki ha ngaahi fale ʻa ia ʻe tokoni kiate kitautolu ke fakahoko ʻa e ngāue malangaʻi ʻo e Puleʻangá. Ko e fakatātaá, lolotonga ʻa e taʻu fakangāue 2023, naʻe fakamoleki ʻe he ngaahi kautaha fakalao naʻe ngāueʻaki ʻe he ngaahi ʻōfisi vaʻa ʻo e Kau Fakamoʻoni ʻa Sihová ʻa e paʻanga laka hake ʻi he 500 milioná ke fakatau mai, langa, fakaleleiʻi pea tauhi ʻa e ngaahi Fale Fakatahaʻanga mo e ngaahi Holo ʻAsemipilī takatakai ʻi he māmaní.a Ko e mahuʻinga ko ení ʻoku tānaki atu ia ki he fakamole ʻa e ngaahi fakatahaʻanga ʻi he māmaní ke tokangaʻi honau ngaahi Fale Fakatahaʻangá.

Tānaki atu ki aí, ko e ngaahi paʻanga tokoní ʻoku toe ngāueʻaki ke langa mo tokangaʻi ʻa e ngaahi ʻōfisi vaʻá, ʻa ia ʻoku tokoni ia ki hono fokotuʻutuʻu mo poupouʻi ʻa e ngāue fakamalanga ʻi māmani lahí. Kuo tau fakasiʻisiʻi ʻa e ngaahi ngāue ʻoku fakahoko ʻi he vaʻá koeʻuhí ke lava ʻo tau ʻave ʻa e paʻangá ke tokoni ki hono langa mo monomono ʻa e ngaahi Fale Fakatahaʻangá mo e Holo ʻAsemipilií. Neongo ia, ʻoku kei fiemaʻu pē ʻa e paʻanga lahi ke fakaleleiʻi, monomono pe hiki ʻa e ngaahi fale ʻi he vaʻá. Ko e hā ʻoku mahuʻinga ai ʻa e ngaahi poloseki ko ení? ʻOku anga-fēfē hono poupouʻi ʻe he ngaahi vaʻá ʻa e ngāue mahuʻinga ʻi he feituʻu ngāué? Tau vakai angé ki aí.

“Tokoni ke Tolonga ha Langa”

Ko e ngaahi ʻōfisi vaʻa lahi ʻoku laka hake he taʻu ʻe 30 pe 40 honau motuʻá! Ko Nicholas, mei he Potungāue Tisaini/Langa ʻi Māmani Lahí, ʻokú ne fakamatala: “Naʻa mo e ngaahi langa ʻoku tokangaʻi leleí ʻoku faai atu pē ʻo motuʻa pea kamata ke maumau. Ko e ngāue fakaleleiʻí ʻoku tokoni ki he tolonga ha langa koeʻuhí ke lava ʻo kei ngāueʻaki.”

Ko e ngaahi ʻapi Pētelí ʻoku fiemaʻu foki ke nau feʻunuʻaki ke laka fakataha mo e ngaahi fiemaʻu ʻa e kautahá. ʻI māmani lahi, kuo tupulaki lahi ʻa e tokolahi ʻo e kau malangá talu mei hono langa ʻo e ngaahi ʻōfisi vaʻa lahi. Ke poupou ki he tupulaki ko ení, kuo tau fiemaʻu ʻa e kau ngāue pole tokolahi ange ʻi he ngaahi ʻōfisi ko ení. Ko hono olá, ko e ngaahi fale naʻe lahi feʻunga ki muʻá kuo fuʻu siʻisiʻi ia he taimí ni!

Ko e tuʻunga malú ko ha toe tafaʻaki ia ʻe taha. Koeʻuhi ʻoku tau lolotonga moʻui ʻi he ngaahi ʻaho fakaʻosí, ʻoku tau fehangahangai mo e ngaahi fakatamaki fakanatula ʻokú ne fakamanamanaʻi lahi ange ʻetau moʻuí. (Luke 21:11) ʻI hono ngāueʻaki ʻa e ngaahi founga langa foʻoú lolotonga ha ngāue fakalelei, ʻoku tau tokoni ai ke toe malu ange ʻa e ngaahi falé ki he faʻahinga ʻoku nau ngāue aí. Ko e ngaahi fakalakalaka ko ení ʻokú ne toe ʻai nai ʻa e ngaahi falé ke feʻungamālie ange ko ha ngaahi senitā ke fokotuʻutuʻu ai ʻa e ngaahi ngāue tokoní pea ke hokohoko atu hono poupouʻi ʻa e ngāue ʻi he feituʻu ngāué hili ʻa e hoko ha fakatamaki fakanatula.

“Kuo Tāpuakiʻi ʻe Sihova ʻa e Fili ko Ení”

ʻI he malumalu ʻo e tataki ʻa e Kulupu Pulé, naʻe fakahoko ʻa e ngaahi ngāue langa lahi ʻi he ngaahi vaʻa ʻe 43 lolotonga ʻa e taʻu fakangāue 2023. ʻOku ʻuhinga ení ko e meimei vaeua ʻo e ngaahi ʻapi Pēteli takatakai ʻi he māmaní naʻe fakahoko ai ha ngāue langa. Kātaki ʻo fakatokangaʻi ha ngaahi fakatātā ʻe niʻihi ʻoku fakamamafaʻi ai ʻa e mahuʻinga hono fakahoko ʻo e ngāue ko ení.

ʻEngikola. Ko Matt, ko ha mēmipa ʻo e Kōmiti Vaʻa ʻEngikolá, ʻokú ne pehē: “ʻOku mau maʻu ʻa e monū ʻo e sio ki hono fakahoko ʻa e kikite ʻi he Hākeai 2:7 ʻi ha founga makehe. ʻI ha taʻu pē ʻe hongofulu, naʻa mau vakai ki ha tupu pēseti ʻe 60 ʻi he kau malangá! Ke poupou ki hení, naʻe fiemaʻu ke liunga tolu ʻa e tokolahi ʻo e fāmili Pētelí. Kae kehe, ko e lahi ʻo homau ngaahi falé naʻe fakangatangata ai ʻa e tokolahi ʻe lava ke mau fakaafeʻi ke ngāue ʻi hení. Naʻe iku eni ki hono fua ʻe he kau Pēteli tokolahi ha kavenga mamafa pea lahi mo ʻenau ngāue ʻovataimí.”

Naʻe vaheʻi ʻa e fanga tokoua ke nau vakaiʻi ʻa e founga ke feau ai ʻa e fiemaʻu ko ení. ʻI he kamatá, naʻa nau ongoʻi ko e fakaleleiʻanga vave mo ʻaongá ko hono fakaleleiʻi ʻa e fale naʻe ʻosi langá. Ka ʻi he hili hono fai ha fekumi lahi, naʻa nau ʻiloʻi ko hono fakaleleiʻí ʻoku ʻikai ko e founga lelei taha ia hono ngāueʻaki ʻa e paʻanga tokoní. ʻI hono kehé, naʻa nau fokotuʻu ke fakatau mai pea fakaleleiʻi ha langa ofi mai. “ʻI he taimi naʻe fuofua fakahā ai ki he Kōmiti Vaʻá ʻa e fili ke fakatau mai pea fakaleleiʻi ʻa e fale naʻe ʻosi langá, naʻa mau hohaʻa naʻa ʻikai ke fuʻu lelei ia ʻo hangē ko ha fale naʻa mau langa pē ʻe kimautolu,” ko e lea ia ʻa Matt. “Ka ʻi he hili ʻemau fakakakato ʻa e ngāué ni ʻoku mau vakai ʻoku feʻungamālie ia mo ʻemau fiemaʻú. Kuo tāpuakiʻi ʻe Sihova ʻa e fili ko ení.”

ʻOku ngalingali ʻe fiemaʻu ʻe he vaʻa ʻi ʻEngikolá ha feituʻu lahi ange ʻi he kahaʻú. Kae kehe, ko e langa foʻoú, fakataha mo e ngaahi nofoʻanga ʻi he loto Pētelí ʻe lava ke hiki holo mo e ngaahi ʻapaatimeni nofo totongi ʻi tuʻa, kuo maʻu ai ʻe he ʻōfisi vaʻá ʻa e feituʻu feʻunga ke hokohoko atu ai hono poupouʻi ʻa e tupu fakamanavahē ʻi he feituʻu ngāué.

Siapani. Ko e ngaahi langa tefito ʻi he vaʻá naʻe langa ia ʻi he meimei taʻu ʻe 40 kuo maliu atú pea ko e lahi tahá naʻe teʻeki ai ʻaupito fai hano fakaleleiʻi lahi. Kuo fai ʻa e ngāue lahi ke tauhi ʻa e vaʻá, ka neongo ʻa e ngaahi feinga fakamātoato ko ení, ko e ngaahi langá kuo fuʻu fuoloa ʻene tuʻú. ʻI he ʻuhinga ko ení, ʻoku lolotonga lele hano fakaleleiʻi lahi ʻi he taimí ni.

Ko e moʻui ʻi he Pētelí kuo toe liliu ʻi he faai mai ʻa e ngaahi taʻú. Ki muʻa ʻi he 2015, ko e ngaahi houa kaí kotoa naʻe teuteu maʻá e fāmili Pētelí. Ko ia ko e ngaahi loki Pēteli lahi ʻi Siapani naʻe langa fakataha mo ha kiʻi “peito.” ʻI he taimí ni, ʻoku teuteu ʻe he kau Pētelí ʻa e lahi taha ʻo ʻenau ngaahi houa kaí. Ko e ngāue fakalelei ko ení kuo toe fakalahi ai ʻa e peito ʻi he ngaahi loki Pētelí, ʻo ʻai ke faingofua ange ʻenau kuki aí. Ko Kumiko, ko ha tuofefine ʻoku ngāue ʻi he vaʻa ʻi Siapaní, ʻokú ne pehē, “Ko e peitó ʻokú ne ʻai au ke u lata moʻoni, pea ʻoku tokoniʻi ai au ke u poupou kakato ki he ngaahi fokotuʻutuʻu foʻou ʻi he Pētelí.”

Ko e ngāue ʻoku fakahoko ʻi he vaʻa ʻi Siapaní ʻoku mātuʻaki mahuʻinga ki he ngāue ʻi māmani lahí. (Mātiu 28:19, 20) Ko Siapani ko e taha ia ʻi he vaʻa pē ʻe ua ʻoku pulusi kakato ai ʻa e Tohi Tapú. Ko ia ai, ko e tafaʻaki ʻe taha ʻo e poloseki langa ʻoku lolotonga lelé ko hono fokotuʻu ha sisitemi ke ne tuʻutuʻu ʻa e pepá mo tānaki ʻa e efú ke maluʻi ʻa e faʻahinga kotoa ʻoku ngāue ʻi he Fale Pulusí. Ko hono fakatau mai mo hono fokotuʻu ʻo e sisitemi ko ení naʻe ofi hono fakamolé ki he paʻanga ʻe taha miliona, ka ʻoku fakapapauʻi ai ko e vaʻá ʻe lava ke hokohoko atu ʻene pulusi mo fakafolau ʻa e meʻakai fakalaumālié.

Naʻe fai hono fakapapauʻi ke kei hokohoko atu pē hono pulusi ʻa e Tohi Tapú lolotonga ʻa e langá. Ko Trey, ko ha mēmipa ʻo e Kōmiti Vaʻa ʻi Siapaní, ʻokú ne pehē: “Lolotonga ʻa e langá, naʻe tuku ange ʻe heʻetau kautahá ʻa e ngaahi liliu Tohi Tapu lahi ange, pea ko e fiemaʻu ʻo e Tohi Tapú naʻe tupulaki ʻi māmani lahi. Ko hono fakataimitēpileʻi ʻo hono fokotuʻu ʻa e meʻangāue foʻoú pea mo hono pulusi ʻo e ʻū tohí naʻe fiemaʻu ki ai ʻa e fengāueʻaki fakataha ʻi he ngaahi potungāue lahi pea mo e tokotaha konitulekí.” Neongo ʻa e ngaahi fakangatangata faingataʻa ko ení, naʻe pulusi ʻa e Tohi Tapu ofi ʻi he 220,000 ʻi he māhina taki taha ʻi he vahaʻa ʻo Maʻasi mo ʻAokosi 2023​—ko e taimi ia naʻe lolotonga fakahoko ai ʻa e konga lahi taha ʻo e langa ʻi he Fale Pulusí. Ko e kotoa ʻo e ngāue ko ení naʻe fakakakato ia ʻo ʻikai fakalahi ʻa e fakamole ki he langá.

Ko hono fakatolonga ʻo e maʻuʻanga iví ko ha toe tafaʻaki tefito ia ʻo e poloseki fakalelei ko ení. ʻE fokotuʻu ʻa e ngaahi sola, ʻa ia ʻoku fakafuofua ʻe fakahaofi ai ʻa e $120,000 ʻi he fakamole ki he maʻuʻanga iví ʻi he taʻu taki taha. ʻE fokotuʻu mo e ngaahi matapā sioʻata ʻotu tolu, ʻe toe fakasiʻisiʻi ai hono ngāueʻaki ʻo e maʻuʻanga iví, ʻa ia ʻoku fakafuofua ʻe fakahaofi ai ʻa e $10,000 ʻi he taʻu. Neongo ko e ngaahi naunau fakatolonga ko eni ʻo e maʻuʻanga iví ʻoku fakalahi ai ʻa e fakamole ki he poloseki ko ení, ʻoku fakafuofua ke fakahaofi ai ʻa e paʻanga laka hake ʻi he 3.5 milioná ʻi he vahaʻa taimi ʻe ngāueʻaki ai ʻa e ngaahi sola mo e matapā sioʻatá. ʻE toe fakasiʻisiʻi ai hono uesia ʻe he ngaahi langa ko ení ʻa e ʻātakaí.

“ʻOku Kei Toe Lahi ʻa e Meʻa ke Fakahoko”

Ko e poloseki ʻi he ongo vaʻa ko ení ʻoku fakahaaʻi ai ʻa e lahi ʻo e ngāue ʻoku fiemaʻu ke fai ke fakapapauʻi ai ʻoku lava ʻe hotau ngaahi ʻapi Pētelí ʻo poupouʻi ʻa e fiemaʻu ʻi he feituʻu ngāué. Neongo ia, ko e ngāué ʻoku teʻeki ai ke ʻosi. “Kuo fakahoko ʻa e meʻa lahi, ka ʻoku kei toe lahi ʻa e meʻa ke fakahokó,” ko e lea ia ʻa Aaron, mei he Potungāue Tisaini/Langa ʻi Māmani Lahí. ʻE anga-fēfē hono fakahoko ʻa e ngāue ko ení? ʻOkú ne hoko atu: “Tānaki atu ki he ngaahi foaki nima-homó, ʻa ia ʻoku tokoni ke fakapaʻanga ʻa e ngaahi poloseki mahuʻinga ko ení, ʻoku mau toe houngaʻia ʻi he laumālie loto-lelei ʻa e faʻahinga kotoa kuo nau pole ʻi he kuohilí pea mo e faʻahinga ʻoku nau feʻunuʻaki ʻenau moʻuí ke fakafaingamālieʻi kinautolu ʻi he kahaʻú. Ko e poupou fakaesino mo fakapaʻanga mei hotau fanga tokouá ko e fakamoʻoni tuʻu-ki-muʻa ia ʻo e tāpuaki ʻa Sihová.”​—Saame 110:3.

Ko e kotoa ʻo ʻetau ngāue langa mo e fakaleleí ʻoku poupouʻi ʻaki ʻa e ngaahi tokoni loto-fiefoaki, ko e lahi ʻo e ngaahi tokoni ko ení ʻoku fai ia fakafou ʻi he donate.jw.org. Mālō ʻaupito ki hoʻomou tokoni nima-homo hokohokó.