Ngaahi Tokoni ki Hono Poupouʻi ʻa e Fakalahi ʻo e Ngāue ʻa e Sōsaietí ʻi Māmani Lahí
Hangē ko ia naʻe tala ki muʻa ʻia ʻAisea 54:2, 3, ko e founga-lotu maʻa ʻa Sihová ʻoku hokohoko atu ʻene tupulakí ʻi he māmaní kātoa. ʻOku fakakau heni ʻa e ngaahi fonua kehekehe ʻi he konitinēniti ʻo ʻAfiliká pea mo e ngaahi motu ofi aí. ʻI he lolotonga ʻa e taʻu ʻe hongofulu kuohilí, ko e ngaahi fakataputapui ʻi he ngāue ʻo e Puleʻangá kuo toʻo atu ia ʻi he ngaahi feituʻu hangē ko Kameloni, Malauī, Matakasikā, Mosemipīki, Toko, ʻEkiuātoliolo Kīnia, ʻEngikola, pea mo ʻItiopea. ʻI hení pea mo e ngaahi fonua kehe kuo taimi ai ʻa e ututaʻú, ko e kau misinale Kiliatí, kau maʻu tohi fakamoʻoniako mei he Akoʻanga Ako Fakafaifekaú, ngaahi mēmipa ʻo e fāmili Pētelí, pea mo e niʻihi kehe kuo nau fua ʻa e ngaahi fatongiá.—Mt. 9:37, 38.
ʻOku hā mahino, ko e tupulaki ʻo e kau lotu moʻoní ʻi he kautaha ʻa Sihová ʻoku fiemaʻu ai ke langa ʻa e ngaahi Fale Fakatahaʻanga foʻou ʻe laui teau. ʻOku toe ʻi ai ʻa e fiemaʻu ke palani ha ngaahi Fale ʻAsemipilī, pea mo e ngaahi fale foʻou ʻo e vaʻá pe ko hono fakalahí. Ko hono fakapaʻanga ʻa e ngaahi ngāué ni pea pehē ki hono hanganaki fakavaveʻi ʻa e ngāue ʻo e Puleʻangá ke laka ki muʻá ʻo ʻikai ʻi ʻAfilika pē kae pehē foki ki he ngaahi konga kehe ʻo e māmaní, kuo ngāueʻaki lahi ai ʻa e ngaahi tokoni ki he ngāue ʻa e Sōsaietí ʻi māmani lahí.
Ko e ngaahi ʻata mo e ngaahi tā ʻi he peesi ʻe ua ʻo e fakalahí ni te ne ʻoatu ai kiate koe ʻa e fakakaukau ʻe niʻihi ki he meʻa ʻoku feinga ʻa e Sōsaietí ke fakahoko ʻi he vāhenga ʻAfiliká. Ko e meʻa ʻoku haá ko e niʻihi ia ʻo e langa ʻoku lolotonga faí pea mo e ngaahi ngāue ʻe kamata ʻamui angé.
ʻI hono sivisiviʻi ʻa e siate ngāue fakamalangá ʻi he 1996 Yearbook, ʻe lava ke ke sio loto atu ai ki he meʻa ʻoku fai ʻe he kau malanga ʻi he ngaahi fonua ko iá ʻi he ngāue fakafaifekaú. ʻOku hoko ʻa e ngaahi tupulekina tuʻu-ki-muʻa ʻi he ngaahi fonua lahi, pea mo e tupu kāfakafa ʻamui ʻoku hā ʻi he tokolahi ʻo e kau maʻu Fakamanatú. ʻI heʻetau manatuʻi ʻa e meʻa ʻoku fakahoko ko e konga ʻo hono malangaʻi ʻo e Puleʻangá takatakai ʻi he kolopé pea mo e ngāue ngaohi ākongá ʻi he ngaahi konitinēniti kehé, ʻokú ne ʻai ai ke maongo kiate kitautolu ʻa e monū ʻoku tau maʻú ke poupouʻi ʻi ha founga fakamatelie ʻa hono langa hake ʻo e lotu moʻoní.—Luke 16:9; 1 Tīm. 6:18.
[Fakatātā ʻi he peesi 3]
Fale Fakatahaʻanga ʻi KwaZulu-Natal, ʻAfilika Tonga, langa he ʻaho ʻe 9
[Fakatātā ʻi he peesi 3]
Fale Fakatahaʻanga langa fakaʻekonōmika ʻi Naisīlia
[Fakatātā ʻi he peesi 3]
Fale ʻAsemipilī ʻi Mosemipīki fakataha mo e ngaahi sea ki he toko 1,500, ke fakakakato he fakaʻosinga ʻo e 1996
[Fakatātā ʻi he peesi 3]
Ngaahi fale ʻo e vaʻa ʻi Mosemipīkí, mateuteu ke nofoʻi ʻi he faʻahitaʻu failau ʻo e 1996
[Fakatātā ʻi he peesi 3]
Vaʻa ʻi Siela Leone, fakafuofua ke fakakakato ʻi he faʻahitaʻu māfana ko ʻení
[Fakatātā ʻi he peesi 4]
Fale ʻAsemipilī ʻikai hano holisi ʻi Maulītiasi, fakataha mo e ngaahi fale ʻo e vaʻaá, ke fakakakato ʻi he faʻahitaʻu matala ʻo e 1997
[Fakatātā ʻi he peesi 4]
Vaʻa ʻoku lolotonga langa ʻi Simipāpuē
[Fakatātā ʻi he peesi 4]
Fale ʻAsemipilī ʻikai hano holisi pea mo e vaʻa foʻou ʻoku langa ʻi Sinikala
[Fakatātā ʻi he peesi 4]
Vaʻa foʻou ʻi Keniā, ʻi he kolomuʻa, Nairobi
[Fakatātā ʻi he peesi 4]
Vaʻa ʻi Matakasikā, ke fakakakato vavé ni mai
[Fakatātā ʻi he peesi 4]
Fokotuʻutuʻu ke langa ʻa e vaʻa ʻi Malauií