Ko e Mahuʻinga Māʻolunga Ange ʻo e Poto Fakaʻotuá
1 ʻOku fakakaukau ʻa e kakai ʻe niʻihi ʻoku totonu ki he Kau Fakamoʻoni ʻa Sihová ke toe fakahangataha ange ʻenau ngaahi feingá ʻi he tokoni ke fakasiʻisiʻi ʻa e ngaahi palopalema ʻoku fehangahangai he ʻahó ni mo e faʻahinga ʻo e tangatá. Ko e faʻahinga peheé ʻoku ʻikai lava ke nau sio ki he mahuʻinga māʻolunga ange ʻo ʻetau ngāue fakaeako Tohi Tapú. ʻOku hangē ia ko e meʻa naʻe tohi ʻe he ʻapositolo ko Paulá: “Koe malaga aki ae akau nae tutuki ia ki ai koe vale ia kiate kinautolu oku malaia: ka koe malohi ia oe Otua kiate kitautolu kuo fakamoui.” (1 Kol. 1:18, PM) Ko e moʻoni, ʻoku tau ʻiloʻi ko e ngāue fakafaifekau faka-Kalisitiané ʻa e ngāue mahuʻinga taha ʻoku fai ʻi māmani he ʻaho ní.
2 Ko ha Moʻui Lelei Ange he Taimí Ni: Ko e ngaahi feinga fakaetangata ke solova ʻa e ngaahi palopalema ʻa e faʻahinga ʻo e tangatá kuo ʻomi ai ʻa e ngaahi ola mātuʻaki fakangatangata. Kuo ʻikai taʻofi ʻe he laó ʻa e fakautuutu ʻo e faihiá. Ko e ngaahi talite fakamelinó mo e ngaahi kongakau tauhi melinó kuo ʻikai te nau fakangata ʻa e taú. Kuo ʻikai lava ʻe he ngaahi polokalama fakasōsialé ke toʻo ʻosi ʻa e masivá. (Sāme 146:3, 4; Sel. 8:9) ʻI hono kehé, kuo liliuʻi ʻe he pōpoaki ʻo e Puleʻangá ʻa e moʻui ʻa e laui miliona ʻi hono tokoniʻi kinautolu ke ʻai ʻa e tangata foʻou ʻa ia ʻoku fakahōifua ki he ʻOtuá. (Loma 12:2; Kol. 3:9, 10) ʻI hono fai iá, ʻoku nau maʻu ai ha tuʻunga moʻui fakalakalaka ʻi he taimí ni.—1 Tim. 4:8.
3 Ko ha Kahaʻu Fiefia: Tānaki atu ki hono tokoniʻi kitautolu ke tau lavameʻa ʻi he ngaahi pole tonu ʻo e moʻuí, ʻoku fakamafeia kitautolu ʻe he poto fakaʻotuá ke tau palani ola lelei ki he kahaʻú. (Sāme 119:105) ʻOkú ne fakahaofi kitautolu mei he feinga taʻeʻaonga ke fakaleleiʻi ʻa e fokotuʻutuʻu lolotonga ʻo e ngaahi meʻá. (Koh. 1:15; Loma 8:20) He houngaʻia ē ko kitautolu ʻi he ʻikai fakamoleki noa ʻetau moʻuí ʻi he tuli ki he ngaahi taumuʻa ʻa ia ko ha ʻata loi pē! ʻI hono kehé, ʻoku tau fakahangataha ʻetau ngaahi feingá ki he talaʻofa papau ʻa Sihova ʻo fekauʻaki mo e “ngaahi langi foʻou mo ha fonua foʻou” ʻa ia ʻe nofo ai ʻa e māʻoniʻoní. ʻI he taimi ʻe aʻu mai ai ʻa e ʻaho fakamaau ʻo Sihová, ʻe hā mahino taʻetoefehālaaki ko e faʻahinga naʻa nau falala ki he poto fakaʻotuá naʻa nau fai ʻa e fili totonú.—2 Pita 3:10-13; Sāme 37:34.
4 Neongo ko e poto fakaʻotuá ʻe hā ngali taʻeʻaonga nai ki he faʻahinga ʻoku nau mātuʻaki nōfoʻi ʻi he “boto oe mamani,” ko hono moʻoní, ko e ʻalunga ʻaonga pē ia ʻe taha ke muimui aí. (1 Kol. 1:21; 2:6-8, PM) Ko ia ai, ʻoku tau hokohoko atu hono fanongonongo ʻi he māmaní kotoa ʻa e pōpoaki ʻoku tupu mei he ʻOtuá, ʻa ia ʻoku “aʻana toko taha ʻa e poto.”—Loma 16:27.