Maʻu ʻAonga mei Hono Ako ʻa e ʻUnuʻunu Ofi kia Sihova
1 ʻI he Fakataha-Lahi Fakavahe “Kau Fanongonongo Faivelenga ʻo e Puleʻangá,” naʻa tau fiefia ai ʻi hono maʻu ʻa e tohi ʻUnuʻunu Ofi kia Sihova. Naʻe vave hono lau ʻe he tokolahi ʻa e tohí. ʻOku ʻikai ha veiveiua ko e tokolahi ange naʻe ueʻi kinautolu ke fai pehē ʻe he konga tohi fakataʻu ki he 2003: “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu.”—Sem. 4:8.
2 ʻI Maʻasi te tau kamata ai ʻetau lāulea fekauʻaki mo e tohi ʻUnuʻunu Ofi kia Sihova, ʻi he Ako Tohi ʻa e Fakatahaʻangá. ʻE lava fēfē ke tau maʻu ʻa e meʻa lahi tahá mei heʻetau akó? ʻOku mātuʻaki fiemaʻu ʻa e teuteú. ʻE vaheʻi ʻa e uike ʻe ua ki he vahe taki taha, fakataha mo hono fakataimitēpileʻi ha ngaahi palakalafi ʻi ha tuʻunga siʻisiʻi ki he akó ʻi he uike taki taha. ʻE fakaʻatā ʻe he meʻá ni ʻa e taimi feʻunga ki hoʻo ngaahi tali ongoʻi mei he lotó makatuʻunga ʻi hoʻo ako mo fakalaulauloto ki he fakamatalá. Tānaki atu ki ai, ʻe lāulea ki ha ngaahi palakalafi siʻi ange lolotonga ʻa e ngaahi uike ko ia ʻoku fakamanatu ai ʻa e konga fakaʻosi ʻo ha vahé, ke fakaʻatā ai ʻa e taimi ke ngāueʻaki ha tafaʻaki makehe ʻo e tohí.
3 ʻI he kamata he vahe 2, ʻoku hā ai ha puha ʻoku fakakaveinga ko e “Ngaahi Fehuʻi ki he Fakalaulauloto” ofi ki he ngataʻanga ʻo e vahe taki taha. Hili e lāulea ki he palakalafi fakaʻosi ʻi he vahé, ʻe pau ai ke ʻai ʻe he ʻovasia ako tohí ke lāulea ʻa e kulupú ki he puhá. Te ne fakalototoʻaʻi ai ʻa e ngaahi mēmipa ʻo e kulupú ke ʻomai ʻenau fakakaukaú, ʻi he kumi ki he fua lelei ʻo ʻenau fakalaulauloto ki he ngaahi konga Tohi Tapú. (Pal. 20:5) Tānaki atu ki he ngaahi fehuʻi ʻoku ʻomai ʻi he puhá, te ne ʻeke nai ʻi he taimi ʻe niʻihi ʻa e ngaahi fehuʻi hangē ko ení: “Ko e hā ʻoku tala atu kia koe ʻe he fakamatala ko ení fekauʻaki mo Sihová? ʻOku anga-fēfē ʻene laveʻi ʻa hoʻo moʻuí? ʻE lava fēfē ke ke ngāueʻaki ia ke tokoniʻi ʻa e niʻihi kehé?” Ko ʻene taumuʻá ke tohoakiʻi mai ʻa e ngaahi tali ongoʻi mei he lotó, ʻo ʻikai ko hono siviʻi ʻa e kulupú fekauʻaki mo e ngaahi fakaikiiki ʻi ha tuʻunga iiki.
4 Ko e ʻUnuʻunu Ofi kia Sihova ʻoku makehe ia. Neongo ko e kotoa ʻo e ʻū tohi ʻa e “tamaioeiki agatonu mo boto” ʻoku fakalāngilangiʻi ai ʻa Sihova, ko e tohí ni ʻoku vaheʻi fakakātoa ia ki ha lāulea fekauʻaki mo e ngaahi ʻulungāanga ʻo Sihová. (Mt. 24:45-47, PM) Ko ha faingamālie fakafiefia ē ʻoku tatali mai kia kitautolú! Te tau maʻu ʻaonga lahi mei ha ako loloto ki he ʻulungāanga ʻo Sihová. ʻOfa ke tokoniʻi kitautolu ʻe he akó ke tau ʻunuʻunu ofi ange ai ki heʻetau Tamai fakahēvaní, pea ʻofa ke tau hoko ʻo ola lelei ange ʻi hono tokoniʻi ʻa e niʻihi kehé ke nau fai ʻa e meʻa tatau.