Ko Hono Ako ʻa e Tohi Lotu ki he ʻOtua
1 ʻOku faʻufaʻu ʻa e tohi Lotu ki he ʻOtua Moʻoni Pē Tahá ke fai ai ha ako mo e faʻahinga foʻoú hili ʻenau ako ʻa e tohi Akoʻi ʻe he Tohi Tapú. Ko ʻetau lāulea ki he tohí ni ʻi he Ako Tohi ʻa e Fakatahaʻangá ʻe teuʻi ai kitautolu ke ngāueʻaki ʻa e tohí ni ʻi he ngāue fakafaifekaú pea ʻe tokoniʻi ai kitautolu ke toe lahi ange ʻetau ʻofa mo e houngaʻia ʻia Sihova mo ʻene kautahá. ʻE lava fēfē ke tau maʻu ʻaonga kakato mei heʻetau ako ʻa e tohi Lotu ki he ʻOtua?
2 Ko Hono Fai ʻo e Akó: Koeʻuhi te tau lāulea ki ha vahe kakato ʻi he uike taki taha, ʻe fiemaʻu ki he kau ʻovasia ako tohí ke nau vahevahe fakapotopoto ʻa e taimí. Te nau loto ke hoko atu ʻa e akó ʻo ʻikai fai ha ngaahi fakamatala lōloa he lolotonga ʻa e ngaahi palakalafi kamatá kae lava ke ʻi ai ha taimi lahi ange ki he fakamatala ʻoku mahuʻinga angé, ʻa ia ʻoku toki faʻa hā ʻamui ange ʻi he vahé. Ko e lāulea nounou ki he puha fakamanatu ʻi he fakaʻosinga ʻo e ako taki taha ʻe tokoniʻi ai ʻa e faʻahinga ʻoku ʻi aí ke nau manatuʻi ʻa e ngaahi poini tefitó.
3 Ko e ngaahi fehuʻi ke ngāueʻaki ki he fakalaulaulotó pea ke lāulea ki aí ʻe hā ia ʻi he vaeuaʻanga nai ʻo e ngaahi vahe ʻo e tohi Lotu ki he ʻOtua. ʻE lava ke maʻu ha fakatātā ʻi he peesi 48-9. ʻOku ʻikai fiemaʻu pau ia ke lau fakataha ʻa e ngaahi fehuʻi peheé mo e ngaahi palakalafí. ʻI he lāulea ki ai mo e kulupú, ʻoku totonu ke ʻai ʻe he ʻovasiá ʻa e ngaahi konga Tohi Tapu ʻoku haá ke lau pea lāulea ki ai ʻo fakatatau ki he taimí.
4 Teuteu ki Muʻa: Ko e teuteu lelei ki he akó ʻoku kau ki ai ʻa e meʻa lahi ange ia ʻi hono laineʻi pē ʻa e ngaahi talí. Ko e fakalaulauloto mo lotu fekauʻaki mo e ngaahi konga Tohi Tapu ʻoku haá ʻe ʻai ai ke tau malava ʻo teuteuʻi ʻo ʻikai ko ʻetau ngaahi talí pē, ka ko e meʻa mahuʻinga angé, ko hotau lotó. (Esela 7:10) Ko kitautolu kotoa ʻe lava ke tau tokoni ki ha fefakalototoʻaʻaki ʻaki hono fai fakanānā ʻetau ngaahi talí.—Loma 1:11, 12.
5 Ko ʻetau ako ʻa e tohi Lotu ki he ʻOtua te ne tokoniʻi kitautolu ke tau ʻunuʻunu ofi kia Sihova pea ʻe teuʻi ai kitautolu ke tokoniʻi ʻa e faʻahinga loto-totonú ke nau kau fakataha mo kitautolu ʻi he lotu kiate iá. (Sāme 95:6; Sem. 4:8) ʻOfa ke tau maʻu ʻaonga kakato kotoa mei he tokonaki fakalaumālie lelei ko ʻení.