“Mou ʻOfa kia Sihova, ʻEne Kau Lotu”
Ke Fakamanatu ʻa e Pekia ʻa Sīsuú ʻi ʻEpeleli 4
1 ʻI he ngaahi taʻu kuo maliu atú, ʻi he taimi naʻe ʻi he malumalu ai ʻo e pule faka-Kominiusí ʻa ʻIukalainé, naʻe siofi ofi ʻe he kau maʻu mafaí ʻa e fanga tokouá—tautefito ʻi he taimi ʻoku fakaofiofi mai ai ʻa e ʻaho ʻo e Kai Efiafi ʻa e ʻEikí—koeʻuhi naʻa nau ʻamanaki ke ʻiloʻi ʻa honau feituʻu fakatahá. Naʻe hoko maʻu pē eni ko ha palopalema, koeʻuhi naʻe ʻiloʻi ʻe he kau maʻu mafaí ʻa e ʻaho fakafuofua ki he fakamanatú. Ko e hā naʻe lava ke fai ʻe he fanga tokouá? Ko e ʻapi ʻo e tuofefine ʻe taha naʻe tāfea ʻa e fakavaʻé. Koeʻuhi ʻe ʻikai ʻamanekina ʻe he kau maʻu mafaí ʻe fakatahataha ai ʻa e fanga tokouá, naʻe langa ai ʻe he fanga tokouá ha peletifoomu ʻi ʻolunga ʻi he vai naʻe loloto ʻo aʻu ki he tuí. Neongo naʻe pau ke nau tangutu hanoku ʻi he peletifōmú ʻi lalo ʻi ha holisi māʻulalo, naʻe ʻikai fakahohaʻasi kinautolu ʻe ha taha ʻi hono kātoangaʻi fiefia ʻe he fakatahaʻangá ʻa e Fakamanatú.
2 Ko e fakapapau ʻa hotau fanga tokoua ʻIukalainé ke talangofua ki he fekau ke fakamanatu ʻa e pekia ʻa Sīsuú ko ha fakahāhā fakaofo ia ʻo ʻenau ʻofa ki he ʻOtuá. (Luke 22:19; 1 Sione 5:3) ʻI ha taimi pē ʻoku tau fehangahangai ai mo e ngaahi fakafaingataʻaʻiaʻanga ʻi heʻetau moʻuí, ʻofa ke tau maʻu ʻa e fakalototoʻa mei he ngaahi faʻifaʻitakiʻanga peheé pea hoko ʻo fakapapauʻi ke ʻi ai ke kātoangaʻi ʻa e Kai Efiafi ʻa e ʻEikí ʻi ʻEpeleli 4. ʻI hono fai iá, ʻoku tau fakahāhā ai ʻoku tau kau ʻi he fakakaukau ʻa e tokotaha-tohi-sāmé ʻa ia naʻá ne hiva: “ʻE, mou ʻofa kia Sihova, ʻene kau lotu [pe kau mateakí.]”—Sāme 31:23.
3 Tokoniʻi ʻa e Niʻihi Kehé Ke Nau Tupulaki ʻi he ʻOfa ki he ʻOtuá: Ko e ʻofa ki he ʻOtuá ʻokú ne toe ueʻi kitautolu ke tau fakaafeʻi ʻa e niʻihi kehé ke nau kātoangaʻi ʻa e fakamanatú fakataha mo kitautolu. Ko e fakalahi ʻo ʻEtau Ngāue Fakafaifekau ʻo e Puleʻanga ʻo Fepuelí naʻe fakalototoʻaʻi mai ai kitautolu taki taha ke ʻai ha lisi ʻo e faʻahinga ʻoku tau palani ke fakaafeʻi ki he Fakamanatú. ʻOkú ke tutui tōtōivi atu ʻi hono fakaaʻu ha fakaafe ki he tokotaha taki taha ʻi hoʻo lisí? Vaheʻi ha taimi ke fakamatalaʻi ai ʻa e mahuʻinga ʻo e kātoangá kia kinautolu. Ko ha fakamanatu anga-fakakaumeʻa ʻo e ʻaho mo e taimi ʻo e Fakamanatú, pea kapau ʻe faingamālie, ko ha tala ange ke ʻalu fakataha mo kinautolú ʻe fakalototoʻaʻi nai ai kinautolu ke nau maʻu ia.
4 ʻI he fakamanatú, fai ha feinga makehe ke fakafeʻiloaki ki he faʻahinga kuo nau tali ʻetau fakaafé, pea ʻai ke nau ongoʻi ʻoku talitali lelei kinautolu. ʻE lava fēfē ke ke tokoniʻi kinautolu ke tupulaki ʻa ʻenau ʻofa kia Sihová? Fakafaingamālieʻi koe ke tali ʻenau ngaahi fehuʻí. Tokanga ke tuʻuaki ha ako Tohi Tapu kapau ʻe feʻungamālie. Fakaafeʻi kinautolu ke nau maʻu ʻetau ngaahi fakataha fakauike ʻa e fakatahaʻangá. Tautefito ki he kau mātuʻá te nau loto ke fai ha tokanga ki he kau Kalisitiane ʻikai longomoʻui ʻoku ʻi aí. ʻE lava ke nau fokotuʻutuʻu ke ʻaʻahi ki he faʻahinga peheé ʻo fakalototoʻaʻi kinautolu ke nau toe foki ʻo longomoʻui, ʻo langa hake nai ʻi he ngaahi fakakaukau naʻe ʻomai ʻi he malanga Fakamanatú.—Loma 5:6-8.
5 Fakaloloto ʻEtau ʻOfa Tonu kia Sihová: Ko e fakakaukau ki he meʻaʻofa ʻo e huhuʻí ʻe lava ke ne fakaloloto ʻetau ʻofa kia Sihova mo hono ʻAló. (2 Kol. 5:14, 15) Naʻe pehē ʻe ha tokotaha-maʻu Fakamanatu taimi fuoloa: “ʻOku tau fakatuʻotuʻa atu ki he Fakamanatú. ʻOku hoko ia ʻo makehe ange ʻi he taʻu taki taha. ʻOku ou manatuʻi ʻa ʻeku tuʻu ʻi he ʻapi-putú ʻi he taʻu ʻe 20 kuo maliu atú, ʻo sio ki siʻeku tangataʻeikí pea hoko ai ʻou houngaʻia fakamātoato moʻoni ʻi he huhuʻí. Naʻe hoko ia ko ha ʻilo pē ki ai ʻi he ʻatamaí ki muʻa ʻi he meʻa ko iá. ʻOi, naʻá ku ʻiloʻi ʻa e ngaahi konga Tohi Tapú kotoa mo e founga ke fakamatalaʻi ʻaki kinautolú! Ka ko e toki taimi ko ē naʻá ku ongoʻi ai ʻa e maongo mālohi ʻo e maté naʻe fiefia moʻoni ai ʻa hoku lotó ʻi he meʻa ʻe fakahoko maʻatautolu fakafou ʻi he huhuʻi mahuʻinga ko iá.”—Sione 5:28, 29.
6 ʻI he fakaofiofi mai ʻa e ʻaho fakamanatu ʻo e taʻu ko ení, vaheʻi ha taimi ke teuʻi ai ho lotó ki he kātoangá. (2 Kal. 19:3) Fakalaulauloto ki he lau Tohi Tapu Fakamanatu makehé, ʻa ia ʻoku fokotuʻu mai ʻi he Vakaiʻi Fakaʻaho ʻa e Tohitapú—2004 pea ʻi he 2004 Calendar. ʻOku fiefia ʻa e niʻihi ʻi hono fakamanatu ʻa e vahe 112-16 ʻi he tohi Moʻungaʻi Tangata Lahi Taha lolotonga ʻenau ako fakafāmilí. ʻOku fai ʻe he niʻihi kehe ʻa e fekumi fakalahi ʻo ngāueʻaki ʻa e ngaahi tohi tokoni ako kehe ʻoku ʻomai fakafou ʻi he kalasi tamaioʻeiki anga-tonu mo potó. (Mt. 24:45-47) Ko kitautolu kotoa ʻe lava ke tau ʻai ʻa e meʻaʻofa ʻo e huhuʻí ko ha meʻa ia ke fai ki ai ʻa e lotu fakamātoato. (Sāme 50:14, 23) ʻIo, lolotonga ʻa e faʻahitaʻu Fakamanatu ko ení, ʻofa ke tau fakakaukauloto hokohoko ki he ʻofa ʻa Sihova kia kitautolú pea kumi ki ha ngaahi founga ke fakahāhā ai ʻetau ʻofa kiate iá.—Mk. 12:30; 1 Sione 4:10.