Tokoniʻi ʻa e Niʻihi Kehé Ke Nau Maʻu ʻAonga mei he Huhuʻí
Fakamanatu ʻo e Pekia ʻa Kalaisí ke Kātoangaʻi ʻi ʻEpeleli 12
1. Ko e hā ʻa e founga ʻe taha ʻoku fakahaaʻi ai ʻe he kakai ʻa e ʻOtuá ʻa ʻenau houngaʻia ki he huhuʻí?
1 “Fakafetaʻi muʻa ki he ʻOtua, heʻene meʻaʻofa ko ia ʻoku taʻemalaua.” (2 Kol. 9:15) ʻOku fakahaaʻi lelei ʻe he ngaahi lea ko iá ʻa e anga ʻo ʻetau ongoʻi fekauʻaki mo e lelei pea mo e ʻaloʻofa ʻoku fakahāhā ʻe he ʻOtuá ki hono kakaí fakafou ʻi hono ʻAló ʻa Sīsū Kalaisi. Ko e houngaʻia ko iá ʻe hā mahino tefito ia ʻi heʻetau fakatahataha fakataha ʻi ʻEpeleli 12 ke kātoangaʻi ʻa e Fakamanatu ʻo e pekia ʻa Kalaisí.
2. Ko hai ʻoku nau maʻu fakataha mo e kau sevāniti ʻa Sihová ʻa e kātoanga Fakamanatú, pea ko e hā ʻoku fiemaʻu ke nau fai koeʻuhi ke maʻu ʻaonga ai mei he huhuʻí?
2 ʻOku maʻu fakataha ʻe he kau sevāniti ʻa Sihová mo e niʻihi kehe fakafuofua ki he toko hongofulu milioná ʻa e kātoanga Fakamanatú ʻi he taʻu taki taha. ʻI he fai peheé, ʻoku nau fakahāhā ai ha tuʻunga ʻo e houngaʻia ki he feilaulau ʻa Kalaisí. Kae kehe, ke maʻu ʻaonga mei he huhuʻí, ʻoku fiemaʻu ke nau ngāueʻi ʻa e tui ki aí. (Sione 3:16, 36) ʻE lava fēfē ke tau tokoniʻi kinautolu ke fakatupulekina ʻa e tui ko iá? Lolotonga ʻa e faʻahitaʻu Fakamanatu ko ení, ʻe lava ke tau fakalototoʻaʻi ai kinautolu ke nau maʻu ha ako Tohi Tapu fakafoʻituitui pea ke maʻu ʻa e ngaahi fakataha fakauike ʻa e fakatahaʻangá. Fakakaukau angé ki he ngaahi fokotuʻu hokó.
3. ʻE lava fēfē nai ke tau kamata ha ako Tohi Tapu ʻi hono fakaaʻu ha fakaafe ki he Fakamanatú?
3 Ngaahi Ako Tohi Tapu: ʻI he taimi ʻokú ke fakaafeʻi ai ʻa e faʻahinga mahuʻingaʻiá ki he Fakamanatú, ko e hā ʻoku ʻikai te ke feinga ai ke kamata ha ako Tohi Tapu mo kinautolu ʻi he tohi Akoʻi ʻe he Tohi Tapú? Fokotuʻu ange ke fakamatalaʻi ʻa e kātoanga Fakamanatú ki he tokotahá ʻaki hono fakaava ki he peesi 206-8 pea lāulea ki he tuʻunga-lea “Ko e Kai Efiafi ʻa e ʻEikí—Ko ha Kātoanga ʻOku Fakalāngilangiʻi Ai ʻa e ʻOtuá.” Te ke malava nai ʻo lāulea ki he fakamatala ko iá ʻi ha ʻaʻahi ʻe taha pe ua, ʻi ha ako Tohi Tapu nai ʻi he matapaá. ʻI hoʻo fakakakato ʻa e fakamatala ko iá, ʻe loto-lelei nai ai ʻa e tokotahá ke lāulea ki he vahe 5, “Ko e Huhuʻí—Meʻaʻofa Lahi Taha ʻa e ʻOtuá.” ʻI hono fokotuʻu pē ha ako Tohi Tapu tuʻumaʻú, foki ʻo lāulea ki he ngaahi vahe kamata ʻe fā ʻo e tohí.
4. Ko hai ʻe lava ke tau kamata ha ako Tohi Tapu mo ia lolotonga ʻa e faʻahitaʻu Fakamanatu ko ení?
4 Ko hai ʻe lava ke tau kamata ha ako Tohi Tapu mo ia ʻi hono ngāueʻaki ʻa e fakalea ko ení? Mahalo pē ko e niʻihi ʻo ho ngaahi kaungāngāué, kaungāakó pe ngaahi kaungāʻapí te nau loto ki he ngaahi fetalanoaʻaki peheé. Ko e fanga tokouá te nau fakalea nai ki he ngaahi husepāniti taʻetui ʻo e fanga tuofāfine ʻi he fakatahaʻangá. Pea ʻoua naʻa ngalo ʻa ho ngaahi kāinga tonu ʻikai ko e Fakamoʻoní. Tānaki atu ki ai, te tau loto ke fai ha feinga makehe ke fakaaʻu atu ha fakaafe Fakamanatu ki he faʻahinga ʻa ia naʻa nau feohi longomoʻui ki muʻa mo e fakatahaʻangá. (Luke 15:3-7) ʻOfa ke tau feinga ke tokoniʻi ʻa e faʻahinga peheé kotoa ke nau maʻu ʻaonga mei he huhuʻí.
5. ʻE lava fēfē ke tau fakalototoʻaʻi ʻa e kau ako Tohi Tapú mo e faʻahinga mahuʻingaʻia kehé ke nau maʻu ʻa e ngaahi fakataha fakauike ʻa e fakatahaʻangá?
5 Ngaahi Fakataha ʻa e Fakatahaʻangá: Ko e Fakamanatú ʻa e ʻuluaki fakataha ʻoku maʻu ʻe he kau ako Tohi Tapu tokolahi mo e faʻahinga mahuʻingaʻia kehé. Ko ia, ʻe lava fēfē ke tau fakalototoʻaʻi kinautolu ke nau maʻu ʻaonga mei heʻetau ngaahi fakataha kehe fakaefakatahaʻangá? Ko ʻEtau Ngāue Fakafaifekau ʻo e Puleʻanga ʻo Mē 2005, peesi 8, ʻoku ʻomai ai ʻa e ngaahi fokotuʻu ko ení: “Lave ki he kaveinga ʻo e malanga hoko maʻá e kakaí. Fakahaaʻi ange ʻa e tohi ʻe fai ʻa e lāulea ki ai ʻi he Ako Taua Leʻo pea ʻi he Ako Tohi ʻa e Fakatahaʻangá. Fakamatalaʻi ʻa e Ako Fakafaifekau Fakateokalatí mo e Fakataha Ngāué. ʻI hoʻo fai ha konga ʻi he akó, mahalo te ke ʻahiʻahi nai ia mo kinautolu. Vahevahe ʻa e ngaahi poini tuʻu-ki-muʻa naʻe fakahoko ʻi he ngaahi fakatahá. Ngāueʻaki ʻa e ʻū tā ʻi heʻetau ngaahi tohí ke tokoniʻi kinautolu ke nau fakakaukauloto ki he meʻa ʻoku hokó. ʻI he fuofua akó pē, fakaafeʻi kinautolu ke nau maʻu ia.”
6. ʻI he founga ʻe ua fē ʻe lava ke tau tokoniʻi ai ʻa e faʻahinga loto-totonú ke nau maʻu ʻaonga mei he huhuʻí?
6 ʻI he taimi ʻoku maʻu ai ʻe he faʻahinga loto-totonú ha ako Tohi Tapu tuʻumaʻu pea maʻu tuʻumaʻu ʻa e ngaahi fakataha ʻa e fakatahaʻangá, ʻoku nau faʻa fai ai ha fakalakalaka vave fakalaumālie. Ko ia ai, ʻofa ke tau fakalototoʻaʻi ʻa e niʻihi kehé ke nau maʻu ʻaonga mei he ngaahi tokonaki fakalaumālie ko ení pea ke maʻu ʻaonga mei he meʻaʻofa lahi taha ʻa e ʻOtuá—ʻa e huhuʻí.