Fōtunga Fakafoʻituitui Maʻa mo Taau
1. ʻI he teuteu atu ki he fakataha-lahi fakavahé, ko e hā ʻoku totonu ai ke tau fai ha fakakaukau ki hotau fōtungá?
1 “Ko e Kau Fakamoʻoni ʻa Sihová ʻa e kakai lelei tahá! Ko homou kakaí ʻa e faʻahinga anga-ʻofa mo teunga leleí, pea ʻoku nau fakahaaʻi ʻa e ʻapasia lolotó.” Ko e lea ia ʻa ha fakafofonga hōtele fekauʻaki mo e fanga tokoua mo e fanga tuofāfine ʻi he taha ʻo e fakataha-lahi fakavahe he taʻu kuo ʻosí. ʻI ha fakataha-lahi ʻe taha, naʻe fakamatala ai ha tokotaha ngāue hōtele: “ʻOku hā mahino ko homou kakaí ʻoku nau ʻai vala ke fakahōifuaʻi ʻa e ʻOtuá.” ʻIo, ʻoku fakatokangaʻi ʻe he niʻihi kehé ʻa e kau maʻu fakataha-lahí. Ko ia ai, ʻoku fiemaʻu ke tau ʻai vala ke “tāu ia mo e Kosipeli,” pea ʻoku faʻa ueʻi ai heni ʻa e faʻahinga ʻoku ʻikai ko e Kau Fakamoʻoní ke nau fai ha fakamatala lelei fekauʻaki mo kitautolu pea ʻai ia ke hā mahino ai ko e kau faifekau kitautolu ʻa e ʻOtuá. (Fili. 1:27) ʻI heʻetau teuteu atu ki he fakataha-lahi fakavahé, ʻoku feʻungamālie ke fai ha fakakaukau tokamuʻa ki hotau fōtungá.
2. Ko e hā ko ha pole ai ke te ʻai vala mo teuteu ʻi ha founga maʻa?
2 “Ko e poto ʻoku mei ʻolunga, ko hono anga tuʻu muʻa ko e maʻa,” ko e tohi ia ʻa e ākonga ko Sēmisí. (Sem. 3:17) Ko hono tapua atu ʻa e maʻa ʻi hotau fōtungá ʻe lava ke hoko ia ko ha meʻa faingataʻa. ʻOku tākiekina ʻa e kakaí ʻe he māmani ʻulungāanga taʻetaau ʻo Sētané ke nau ohi ʻa e ngaahi sitaila taʻefakanānā, fakakakano mo matamatakehe ʻoku ʻikai ke totonu. (1 Sione 2:15-17) Ko ia ai, ʻi hono fai ha fili fekauʻaki mo e valá mo e teuteú, ʻoku fiemaʻu ke tau tokanga ki he akonaki ʻa e Tohi Tapú ke “jiaki ae aga taefaka-Otua moe gaahi holi fakamama, ka tau moui aga fakabotoboto . . . i he mamani.” (Tai. 2:12, PM) ʻOku ʻikai ʻaupito te tau fiemaʻu ke fakahohaʻasi ʻa e niʻihi kehé ʻaki hotau fōtungá, pe ko hotau fanga tokouá, kau ngāue hōtelé mo e falekaí, pe ko ha kau mamata kehe.—1 Kol. 10:32, 33.
3. Ko e hā ʻa e ngaahi fehuʻi te ne tokoniʻi kitautolu ke sivisiviʻi ai hotau fōtunga fakafoʻituituí?
3 Kofu Fakanānā mo Napanapangamālie: ʻI he teuteu ki he fakataha-lahí, ʻeke hifo kiate koe: ‘ʻOku fakanānā hoku valá, pe ʻokú ne tohoakiʻi mai ha tokanga taʻetotonu kiate au? ʻOku fakahaaʻi atu ai ha tokaʻi ʻa e ngaahi ongoʻi ʻa e niʻihi kehé? ʻOku fuʻu ʻāpanga pe fuʻu nounou hoku soté? ʻOku aata mo manoʻonoʻo hoku ngaahi kofú? ʻOku maʻa mo namu lelei hoku valá? ʻI hano maʻu ha tokonaki kai pongipongi taʻetotongi ʻi ha hōtele pe mālōlō hili ʻa e polokalamá, te u fōtunga maau mo maʻa ko ha faifekau, pe ʻe taʻemaau hoku valá, sitaila tōtuʻa, fuʻu ʻaiʻainoaʻia mo taʻefeʻunga ki ha kau maʻu fakataha-lahi ʻoku nau tui ha kaati fakaʻilonga? ʻE ʻai au ʻe he vala ʻoku ou tui he lolotonga ʻo e taimi mālōloó ke u mā ke faifakamoʻoni ʻikai ʻi he founga anga-mahení?’—Loma 15:2, 3; 1 Tim. 2:9.
4. ʻE lava fēfē ke tokoniʻi kitautolu ʻe he niʻihi kehé ke tau fōtunga maʻa?
4 ʻE lava ke tau maʻu ʻaonga mei he ngaahi fakakaukau ʻa e kau Kalisitiane matuʻotuʻá. ʻOku totonu ke ʻeke ʻe he ngaahi uaifí ki honau ngaahi husepānití ʻa e anga ʻo e vakai mai ʻa e niʻihi kehé ki honau valá? ʻE lava ke tokoniʻi ʻe he ngaahi mātuʻa anga-fakaʻotuá ʻenau fānau taʻu hongofulu tupú ʻi he fekauʻaki mo e meʻá ni. ʻIkai ngata aí, ʻe lava ʻe he fanga tuofāfine anga-ʻapasiá ke nau “ako ki he kau fine mui ke aga fakabotoboto . . . ke nau fai boto, mo angatonu [pe maʻa]” ʻi honau fōtungá koeʻuhi “ke oua naa lauikovi ae folofola ae Otua.” (Tai. 2:3-5, PM) ʻOku ʻomai ʻe heʻetau ngaahi tohí ʻa e ngaahi fakatātā ʻaonga ʻoku fakahaaʻi ai ʻa e kofu fakanānā mo napanapangamālié.
5. ʻE lava fēfē ke ʻomai ʻe kitautolu kotoa ha fakahīkihiki kia Sihova he lolotonga ʻo e fakataha-lahí?
5 ʻOmai Ai ʻa e Fakahīkihiki kia Sihova: ʻOku tokonaki mai ʻe he ngaahi fakataha-lahi fakavahé ha ngaahi faingamālie lelei maʻa kitautolu kotoa, ʻo ʻikai ko e faʻahinga pē ʻoku nau kau ki he polokalamá, ke fakahīkihikiʻi ai ʻa Sihova. Ko e moʻoni, ʻe fakalāngilangiʻi Ia ʻe hotau ʻulungāanga mo e lea faka-Kalisitiané. Ka ko e ʻuluaki meʻa ʻoku fakatokangaʻi ʻe he kau mamatá fekauʻaki mo kitautolú ko hotau valá mo e teuteú. ʻOfa ke ʻomai ʻe kitautolu kotoa ha fakahīkihiki kia Sihova ʻaki hotau fōtunga fakafoʻituitui maʻa mo tāú.—Sāme 148:12, 13.
[Puha ʻi he peesi 6]
Ngaahi Tokoni ki he Fōtunga Tāú
◼ Folofola ʻa e ʻOtuá
◼ Sivisiviʻi-kita
◼ Ngaahi fakakaukau ʻa e niʻihi kehé
◼ Ngaahi tohi faka-Kalisitiané