Fakafetaʻi kia Sihova ʻi he Fakatahaʻanga Lahí
1, 2. Ko e hā ʻa e faingamālie ʻoku ʻomai kia kitautolu ʻe he fakataha-lahi fakavahé, pea ʻi he ngaahi founga fē ʻe lava ke tau fakahoko ai ení?
1 ʻOku tokonaki mai maʻa kitautolu ʻe heʻetau ngaahi fakataha-lahi fakavahe ʻi he taʻu taki taha ha faingamālie fakaofo ke fakahīkihikiʻi ai ʻa Sihova. Ko ʻetau ngaahi ongoʻí ʻoku hangē ko ia naʻe maʻu ʻe Tēvitá, ʻa ia naʻá ne hiva: “Kau fakafetaʻi atu ʻi he fakataha[ʻanga] lahi: te u fakamālō ki he ʻAfiona ʻi he lotolotonga ʻo ha fuʻu kakai.” (Sāme 35:18) ʻI he Fakataha-Lahi Fakavahe “Talangofua Fakaʻotua” ko ia ʻoku tuʻunuku maí, ʻe lava fēfē ke tau fakapapauʻi ʻi he tuʻunga ko ha kakai fāʻūtahá ʻoku tau ʻoatu ʻa e fakahīkihikí kia Sihova?
2 Ko e founga ʻe taha ʻe lava ai ke tau fai ení ko e fakafou ʻi hotau ʻulungāangá. Naʻe pehē ʻe ha tokotaha tokangaʻi fale faiʻanga fakataha-lahi ʻe taha: “Makatuʻunga ʻi hoʻomou ngaahi fakataha-lahí, kuo mau tala ki he ngaahi kulupu fakalotu kehe ko ia ʻoku nau fiemaʻu ke totongi ʻa e falé ki hono ngāueʻakí ke nau ō mai ʻo sio ʻi he founga ʻoku fokotuʻutuʻu ai ʻe he Kau Fakamoʻoni ʻa Sihová ha fakataha-lahi, he ʻoku nau maʻu ha fokotuʻutuʻu haohaoa.” Fakafou ʻi hotau fōtunga hāmaí, ʻi heʻetau fāitahá, pea ʻi hotau ʻulungāangá, ko e tokotaha taki taha ʻo kitautolu ʻoku tau kau ʻi hono ʻomai ʻa e ngaahi fakahāhā fakalotomāfana pehē ʻo e fakahīkihikí, ʻa ia ʻoku ʻoatu totonu ki hotau ʻOtuá.—1 Pita 2:12.
3, 4. ʻE anga-fēfē hono tokoniʻi kitautolu ʻe he anga-fakanānaá ke tau ʻai vala ʻi ha founga ʻoku hoa mo e kau faifekau Kalisitiané, fakatouʻosi ʻi he fakataha-lahí pea mo e hili ʻa e ngaahi kongá?
3 Fōtunga Hāmai Fakafoʻituituí: Ke tau ʻai vala mo teuteuʻi kitautolu ʻi ha founga ʻoku ʻoatu ai ʻa e fakahīkihikí kia Sihová ʻoku fiemaʻu ki ai ʻa e anga-fakanānā. (1 Tim. 2:9) ʻOku pehē ʻe he tohi Ako Fakafaifekau, ʻi he peesi 132: “Ko ha taha ʻa ia ʻoku anga-fakanānā ʻoku tokanga ia fekauʻaki mo e ʻikai ke fakaʻitaʻi taʻetotonu ʻa e niʻihi kehé pea ʻoua ʻe tohoaki mai ha tokanga taʻetotonu kiate ia.” ʻI he ngaahi fonua lahi, kuo hoko ʻo anga-maheniʻaki ʻa e teuteu ʻikai anga-fakanānaá. Kae kehe, ʻoku fakamahuʻingaʻi ʻe Sihova ʻa e feinga ʻoku tau fai ke fakafofongaʻi totonu iá. (Ng. 15:14) Neongo ʻe fakahoko nai ʻa e fakataha-lahí ʻi ha feituʻu faiʻanga sipoti pe fale faiʻanga fakafiefia, ʻoku hoko ʻa e fakatahatahá ko ʻetau “fakataha[ʻanga] lahi” lolotonga ʻa e ʻaho ʻe tolu ʻo e fakataha-lahí. Ko ia ai, ʻi heʻetau fakatahataha ʻi he ʻao ʻo Sihová, ʻoku totonu ke tau ʻai vala ʻaki ʻa e ngeia ʻoku taau mo e Tokotaha māʻolunga taha ʻi he ʻunivēsí.—1 Kal. 29:11.
4 ʻOku toe fiemaʻu ke tau fai ha tokanga ki hotau fōtungá hili ʻa e konga fakaʻosí ʻi he ʻaho taki taha. Neongo te tau loto nai ke tui ha ngaahi vala ʻoku tō lelei ange lolotonga ʻa e taimi mālōloó pe lolotonga ha taimi kai ʻi ha falekai, ʻoku mahuʻinga ke kei hoa hotau valá mo e teuteú pea mo e faʻahinga “oku nau fakaha koe kau lotu akinautolu ki he Otua.” (1 Tim. 2:10, PM) ʻOku ʻikai ke fakapapauʻi ʻa e vala ʻoku ala talí ʻe he meʻa ʻoku manakoa ʻi he māmaní. (1 Sione 2:16, 17) Ko ʻetau ngaahi tohi faka-Kalisitiané ʻoku tokonaki mai ai e ngaahi fakatātā ʻaonga ʻo e vala anga-fakanānā mo maau ʻo e kau tangata mo e kau fefine ʻi he ngaahi tuʻunga kehekehe. Ko hono tui hotau ngaahi kaati fakaʻilongá ʻi he kolo ʻo e fakataha-lahí ʻe hoko ia ko ha fakamanatu ko e kau faifekau Kalisitiane kitautolu ʻi he taimi kotoa pē.—2 Kol. 6:3, 4.
5, 6. ʻE lava fēfē ke tau fakahaaʻi ʻoku tau tokaʻi ʻa e tēpile fakalaumālie ʻa Sihová?
5 Tokaʻi ʻa e Tēpile ʻa Sihová: Ko e ʻEiki Hau ʻo e ʻunivēsí kuó ne teuteuʻi maʻa kitautolu ha kātoanga kai. (Ai. 25:6; 1 Kol. 10:21) Kapau te tau koloaʻaki lahi ʻa ʻetau kau ki he tēpile fakalaumālie ʻa Sihová, ko ʻetau taumuʻá leva ia ke maʻu ʻa e kotoa ʻo e ʻaho ʻe tolu ʻo e fakataha-lahí. Kuó ke fokotuʻutuʻu ki ha nofoʻanga, meʻalele mo e taimi ʻatā mei he ngāue fakamāmaní? Kuó ke vahevahe lelei ha taimi feʻunga ki he teuteú mo e fefonongaʻakí koeʻuhi ke ke lava ai ʻo aʻu tōmuʻa feʻunga ki he feituʻu faiʻanga fakataha-lahí ke maʻu ha nofoʻanga, ke feohi ai mo ho ngaahi tokouá pea ke kau ai mo kinautolu ʻi he fai ʻa e fakahīkihiki kia Sihova ʻi he hiva mo e lotu kamatá?—Sāme 147:1.
6 Ko hono tokaʻi ʻa e tēpile ʻa Sihová te ne ueʻi ai kitautolu ke tau tokanga lelei ki he polokalamá pea ke fakaʻehiʻehi mei he talanoa ʻikai fiemaʻu mo e niʻihi kehé, kaí pe lue takai holo ʻi he ngaahi hala vahaʻa lokí. Fakafou he kalasi tamaioʻeiki anga-tonu mo potó, ʻoku tokonaki mai ʻe Sihova ʻa e meʻakai fakalaumālie ʻa ia ʻoku tau fiemaʻu he taimi ní. (Mt. 24:45) ʻOku ʻikai totonu ke tau tō ʻi ha taha ʻo e polokalamá. ʻOku totonu ke tangutu fakataha ʻa e ngaahi mātuʻá mo ʻenau fānaú pea tokoniʻi kinautolu ke nau maʻu ʻaonga kakato.—Teu. 31:12.
7. Ko e hā ʻa e meʻa ʻoku kole mai ke tau fai ʻi he houa kai hoʻataá, pea ko e hā hono ʻuhingá?
7 ʻOku kole mai ke tau ʻomai ha kai hoʻatā kae ʻikai mavahe mei he feituʻu faiʻanga fakataha-lahí ke maʻu ha meʻakai lolotonga ʻa e mālōlō hoʻataá. He lelei moʻoni ia kapau ʻe fai ia ʻe he tokotaha kotoa he taʻú ni! (Hep. 13:17) Ko e fokotuʻutuʻu ko ení ʻoku tokonaki ai ha faingamālie lelei ke fiefia ai ʻi he feohi fakatupu langa hake mo hotau fanga tokouá pea tānaki atu ki ha ʻatimosifia ʻo e fāʻūtaha mo e melino ʻa ia ʻoku ʻoatu ai ʻa e fakaʻapaʻapa kia Sihova.—Sāme 133:1.
8, 9. Ko e hā ʻa e toe faingamālie ki hono fakahīkihikiʻi ʻo Sihová ʻoku ʻomai ʻe he fakataha-lahí?
8 Faifakamoʻoni ʻi he Founga ʻIkai Anga-Mahení: Lolotonga ʻetau feʻaluʻaki mo e foki mei he feituʻu faiʻanga fakataha-lahí, ʻoku tau maʻu ai ʻa e ngaahi faingamālie lahi ke fakahīkihikiʻi ʻa Sihova ʻaki hotau loungutú. (Hep. 13:15) Tatau ai pē pe ʻoku tau kai ʻi ha falekai pe fetalanoaʻaki mo e kau ngāue mōtelé, ʻai ke tau kumi ki ha ngaahi founga ke fai ai ha fakamoʻoni. ʻE fonu hotau ʻatamaí mo e lotó ʻi he ngaahi koloa fakalaumālie mei he fakataha-lahí. ʻAi ke tau vahevahe atu ʻa e ngaahi meʻa lelei ko ení ki he faʻahinga ʻoku tau fetaulaki mo ia ʻi he founga ʻikai anga-mahení.—1 Pita 3:15.
9 ʻOku tau fakatuʻotuʻa atu mo e fakatuʻamelie ki he faingamālie ko eni ke fakamālōʻiaʻi ai ʻa Sihova “i he gaahi fakataha oe kakai.” (Sāme 26:12, PM) ʻOfa ke tau fakahīkihikiʻi fāʻūtaha ʻa Sihova ʻi he Fakataha-Lahi Fakavahe “Talangofua Fakaʻotua.”
[Puha ʻi he peesi 4]
Ngaahi Fakamanatu ki he Fakataha-Lahi Fakavahé
◼ Taimi ʻo e Polokalamá: ʻE kamata ʻa e polokalamá ʻi he 9:30 pongipongi ʻi he kotoa ʻo e ʻaho ʻe tolú. ʻE ava ʻa e ʻū matapaá ʻi he 8:00 pongipongi. Ko ha ngaahi miniti siʻi ki muʻa pea kamata ʻa e kongá, ʻe tangutu ʻa e tokotaha seá ʻi he peletifōmú lolotonga ʻa hono tā ʻa e fasi talateu ʻo e Puleʻangá. Ko e kotoa ʻo kitautolú ʻoku totonu ke tau tangutu ʻi he taimi ko iá koeʻuhi ke lava ai ʻa e polokalamá ʻo kamata ʻi ha tuʻunga ngeia. ʻE fakaʻosi ʻa e polokalamá ʻi he 5:05 efiafi ʻi he Falaité mo e Tokonakí pea ʻi he 4:10 efiafi ʻi he Sāpaté.
◼ Tauʻangá: ʻI he kotoa ʻo e ngaahi feituʻu faiʻanga fakataha-lahi ko ia ʻa ia ʻoku maʻu ai hano puleʻi malu ʻo e ngaahi feituʻu tauʻangá, ʻe ala maʻu taʻetotongi ʻa e ngaahi ʻataá ʻo makatuʻunga pē ʻi he ʻuluaki aʻu ki aí. Ko e ʻū kaati fakaʻilonga ʻo e fakataha-lahí ʻe hoko ia ko ha fakaʻilonga ki hono tau ʻo e meʻalelé. Ko e faʻahinga pē ʻoku nau maʻu ha ngofua tauʻanga meʻalele mei he kōmiti pulé ʻe fakangofua ke tau ʻi he tauʻanga ʻoku fakaʻatā ki he faʻahinga faingataʻaʻia fakaesinó. Koeʻuhi ʻoku faʻa siʻisiʻi ʻa e ʻatā ki he tauʻangá, ʻoku totonu ke heka ʻi ha meʻalele pē ʻe taha ʻo aʻu ki heʻene tokolahi taha ka ala lavá ʻo ʻikai ko e heka pē ʻa ha toko taha pe toko ua ʻi he kā ʻe taha.
◼ Taʻofi ʻo e Nofoʻangá: ʻE taʻofi nai ʻa e ngaahi nofoʻangá maʻá e faʻahinga pē ʻoku nau fononga mo koe ʻi he meʻalele tatau pe nofo mo koe ʻi he ʻapi tatau.
◼ Ngaahi Tokoní: ʻOku kau ki hono fokotuʻutuʻu ʻo ha fakataha-lahi ha fakamole lahi ʻaupito. ʻE lava ke tau fakahaaʻi ʻetau houngaʻiá ʻaki hono fai ʻa e ngaahi tokoni loto-fiefoaki ki he ngāue ʻi māmani lahí ʻi hotau Fale Fakatahaʻangá pe ʻi he fakataha-lahí. Ko ha sieke pē ʻe tokoniʻaki ʻi ha fakataha-lahi ʻoku totonu ke ʻai ʻo ala totongi ia ʻi Nuʻu Sila ki he “Watch Tower Society,” pe ʻi Tongá ni ki he “Jehovah’s Witnesses.”
◼ Palopalema Fakafanongo: ʻI he ngaahi fakataha-lahi lalahi angé ʻe fakamafola ʻa e polokalamá ʻi he ngaahi feituʻu takatakai ʻo e holó ʻi ha letiō FM. ʻE fai ha fanongonongo ʻo fekauʻaki mo e meʻá ni ʻi he kamataʻanga ʻo e konga pongipongí. Ke maʻu ʻaonga mei he tokonaki ko ení, ʻe fiemaʻu ke ke ʻomai ha kiʻi tepi FM mo ha meʻa fanongo.
◼ Houa Kai Hoʻataá: Kātaki ʻomai ha kai hoʻatā kae ʻikai ko e mavahe mei he feituʻu faiʻanga fakataha-lahí ke maʻu ha meʻakai lolotonga ʻa e mālōlō hoʻataá. ʻE ngāueʻaki nai ha kiʻi kula ʻa ia ʻoku lava ʻo tuku ʻi ha lalo sea. Ko e ngaahi fuʻu kula lalahí, ngaahi meʻa faʻoʻanga sioʻatá mo e ngaahi inu ʻolokaholó ʻoku ʻikai ngofua ia ʻi he fale faiʻanga fakataha-lahí.
◼ Hiki: Ko ha faʻahinga pē ʻo e meʻa hikí ʻoku totonu ke ʻoua ʻe fakahoko ia ki he sisitemi fakaʻuhila mo e meʻalea ʻo e falé pea ʻe ngāueʻaki pē ia ʻi ha founga ʻoku ʻikai ke fakahohaʻasi ai ʻa e niʻihi kehé.
◼ Faitā: Kapau te ke faitā, ʻoku ʻikai totonu ke ngāueʻaki ʻa e tapa ʻo e māmá lolotonga ʻa e ngaahi kongá.
◼ Pipa mo e Telefoni Toʻotoʻo: ʻOku totonu ke seti ʻa e ongo meʻá ni ke ʻoua ʻe fakatupunga ai ha fakahohaʻa.
◼ Fakatuʻutāmakí mo e Meʻa Fakavavevavé: Kapau ʻe fiemaʻu ha meʻa fakavavevave fakafaitoʻo ʻi he feituʻu faiʻanga fakataha-lahí, kātaki ʻo fetuʻutaki ki ha tokotaha fakanofonofo ofi mai, ʻa ia te ne fakahā leva ia ki he Potungāue ʻUluaki Tokoní koeʻuhi ke lava ʻe heʻetau kau ngāue taau ki he ʻuluaki tokoní ʻi he feituʻú ʻo vakaiʻi ʻa e mafatukituki ʻo e tuʻungá pea fai ha tokoni. ʻO ka fiemaʻu, te nau fetuʻutaki ki he ngaahi tokoni fakavavevavé.
◼ Mōtele: (1) ʻOua ʻe taʻofi ha ngaahi nofoʻanga lahi ange ʻi he meʻa ʻe fiemaʻu moʻoní, pea ʻoua ʻe ʻai ha kakai ke nau nofo ʻi ho lokí ʻo tokolahi ange ia mei he meʻa ʻoku fakaʻataá. (2) Kapau kuo pau te ke kaniseli ho nofoʻangá, fakahaaʻi leva ia ki he mōtelé. (3) ʻOua ʻe feimeʻakai ʻi he ngaahi loki ʻoku ʻikai ke fai ai ha feimeʻakaí. (4) ʻOua ʻe ngāuehalaʻaki ha kai pongipongi taʻetotongi, kofi pe ngaahi tokonaki ʻaisi pē ʻoku ʻai ʻo ala maʻu ʻe he kau ʻaʻahí ke nau ngāueʻaki lolotonga ʻoku nau ʻi he mōtelé. (5) Fakahāhaaʻi ʻa e fua ʻo e laumālié ʻi he feangai mo e kau ngāue mōtelé, tautautefito ki he lolotonga ʻo e ongo taimi femoʻuekina ʻo e lēsisita ke hū ki aí mo e totongi ke mavahé.