Puha Fehuʻi
◼ ʻOku totonu ke fēfē hono maʻu ʻa e ngaahi tatau fakafoʻituitui ʻo e Taua Leʻo mo e ʻĀ Hake!?
Koeʻuhi ko e fokotuʻutuʻu tukuhau fakatouʻosi ki he ngaahi pulusinga ʻoku paaki mo hiki tepi ʻo e Taua Leʻo mo e ʻĀ Hake! ʻi he lea kotoa pē naʻe ʻikai toe hoko atu ia ʻo fuoloa, ko e kau malanga kotoa pē ʻoku totonu ke nau maʻu ʻenau ngaahi makasiní, ngaahi tepi kāseté mo e sītī MP3 fakafou ʻi he fakatahaʻanga fakalotofonuá. Tuku kehe pē mei ai ʻa e ngaahi makasini mo e tepi kāsete ki he kau kuí, ʻa ia ʻoku meiliʻi taʻetotongi ia ki he faʻahinga tāú. Kātaki ʻo fakatokangaʻi ange ʻe lava ke kole ʻe he ngaahi fakatahaʻangá ha ngaahi makasini ʻi he tepi kāseté pe sītī MP3 ʻi ha foomu Congregation Requests (M-202). Ko e ngaahi pulusinga lea mulí mo e pulusi mata-lalahí ʻoku totonu ke toe kole pē mo ia ʻo ngāueʻaki ʻa e foomu ko ení.
Kapau ʻoku ʻi ai ha taha ʻi ho feituʻú ʻokú ne kole ke maʻu tuʻumaʻu ʻa e makasiní, kātaki angé ʻo fakapapauʻi ke fai leva ki he kole ko iá koeʻuhi ke ʻoua ʻe liʻaki naʻa mo ha ʻīsiu ʻe taha. Ko e faʻahinga ʻoku tuʻusí ʻe lava ke nau maʻu ʻa e ngaahi makasiní pe ʻū tohi kehe ke nau ngāueʻaki fakafoʻituituí ʻi he kānita makasiní mo e ʻū tohí ʻi he Fale Fakatahaʻangá. ʻOku ʻikai totonu ke fakakau ʻa e faʻahinga tuʻusí ʻi ha tukuʻanga makasini pau ʻa ha taha.
Ko e ngaahi tukuhau pē ʻe tauhi maʻu ʻe he vaʻá ʻoku maʻá e faʻahinga ia ʻa ia ʻe ʻikai lava ke tokangaʻi ʻe ha tokotaha malanga ʻi he fakatahaʻangá fakafou ʻi ha tufaʻanga makasini pau. Kapau ʻe ʻoatu ʻe he Kōmiti Ngāue ʻa e Fakatahaʻangá ha kole ki ha ngaahi tukuhau maʻa ha taha ʻa ia ʻe ʻikai lava ke ne maʻu ia ʻi ha founga kehe, ʻoku totonu ke fakakau ʻe he sekelitalí ha nouti nounou ʻo fakapapauʻi ai ko e kole tukuhau ko ení kuo ʻosi vakaiʻi pea tali ia ʻe he Kōmiti Ngāue ʻa e Fakatahaʻangá.
ʻOku ʻuhinga ení ʻoku ʻikai totonu ke tohi ʻa e kau malangá ki he ʻōfisi vaʻá ke kole ha ngaahi tukuhau fakafoʻituitui. Ko ha ngaahi kole pehē ki ha ngaahi tukuhau ʻoku fai ʻe he kau malangá pe ko e faʻahinga mahuʻingaʻiá ʻe toe fakafoki pē ia ki he fakatahaʻangá.
◼ ʻE lava fēfē ke maʻu ʻe ha tokotaha tuku pilīsone ha tatau fakafoʻituitui ʻo e ngaahi makasiní?
Kapau ko e fakatahaʻanga ʻokú ne tokangaʻi ʻa e ngāue fakamalanga ʻi ha pilīsoné ʻe lava ke ne tokonaki ʻa e ngaahi makasiní ki he faʻahinga ʻoku tuku pilīsone ʻi aí, ʻoku totonu leva ai ki he tokotaha tuku pilīsoné ke ne maʻu ʻa ʻene ngaahi tatau fakafoʻituitui ʻo e Taua Leʻo mo e ʻĀ Hake! fakafou ʻi he kau malanga ʻoku ʻaʻahi angé. ʻI he taimi ʻoku ʻikai malava ai ení, ʻe lava nai ke kole fakafoʻituitui ʻe he tokotaha tuku pilīsoné ʻa e tukuhaú ʻaki ʻene tohi ki he ʻōfisi vaʻá. Kātaki angé ʻo fakatokangaʻi ko e kau tuʻusi ʻoku nofo pilīsoné te nau lava ʻo maʻu ha tatau fakafoʻituitui ʻo e ngaahi makasiní ʻi he founga tatau mo ia ʻoku fokotuʻu ʻi he palakalafí ni.