Fakahāhā ʻa e Laumālie Tāimuʻá
1. ʻE anga-fēfē haʻo fakamatalaʻi ʻa e laumālie tāimuʻá?
1 Pe te nau lava ke ngāue ko ha kau tāimuʻa ʻi he lolotongá ni pe ʻikai, ʻe lava ʻe he kau malanga kotoa pē ʻo e Puleʻangá ke fakahāhā ʻa e laumālie tāimuʻá. ʻOku nau tokanga moʻoni ki he fekau ke malanga mo ngaohi ākongá. (Mt. 28:19, 20; Ng. 18:5) ʻOku nau tokanga fekauʻaki mo e kakaí pea fai mo e ngaahi feilaulau koeʻuhi ke fakahoko ʻenau ngāue fakafaifekaú. (Mt. 9:36; Ng. 20:24) ʻOku loto-lelei ʻa e kau sevāniti ʻa Sihová ke fai ha meʻa pē ʻoku fiemaʻu ke tokoniʻi ai ʻa e niʻihi kehé ke ako ʻa e moʻoní. (1 Kol. 9:19-23) Tau lāulea ki ha faʻifaʻitakiʻanga ʻo ha tokotaha naʻá ne fakahāhā ha laumālie pehē, ko Filipe ko e ʻevangelioó.
2. ʻE lava fēfē ke faʻifaʻitaki ʻa e kau mātuʻá mo e kau sevāniti fakafaifekaú ki he faivelenga ʻa Filipe ʻi he ngāue fakafaifekaú?
2 Malanga mo e Faiako: Naʻe tokanga ʻa Filipe ki ha ngaahi fatongia mafatukituki ʻi he fakatahaʻanga he ʻuluaki senitulí. (Ng. 6:1-6) Ka, naʻá ne ngāue tefito ko ha tokotaha malanga faivelenga ʻo e ongoongo leleí. (Ng. 8:40) Ko ia ai, ʻi he ʻahó ni, lolotonga ʻa e tokanga ki honau ngaahi fatongia kuo vaheʻi angé, ʻe lava ke fakahāhā ʻe he kau mātuʻá mo e kau sevāniti fakafaifekaú ʻa e laumālie tāimuʻá ʻaki ʻa e takimuʻa loto-māfana ʻi he ngāue fakafaifekaú. He fakaivia moʻoni ʻeni ʻa e laumālie ʻi he fakatahaʻangá!—Loma 12:11.
3. ʻE lava fēfē ke tau fakahāhā ʻa e laumālie tāimuʻá ʻi he taimi ʻoku tau fehangahangai ai mo e ngaahi ʻahiʻahí?
3 Hili ʻa e mate ʻa Sitīvení, naʻe fakatupunga ʻe ha fakatanga fakautuutu vave ha hohaʻa lahi ʻi he moʻui ʻa e kau ākongá. Kae kehe, naʻe hokohoko atu pē ʻa Filipe ia ke malanga, pea naʻá ne fakahoko ha konga mahuʻinga ʻi hono kamata ʻa e ngāue ʻi he lotolotonga ʻo e kau Samēliá. (Ng. 8:1, 4-6, 12, 14-17) ʻE lava ke tau faʻifaʻitaki ki heʻene faʻifaʻitakiʻangá ʻaki ʻa e hokohoko atu ke ʻai ke ʻiloa ʻa e ongoongo leleí ʻi he taimi ʻoku tau hokosia ai ha ngaahi ʻahiʻahi pea ʻaki ʻa e malanga taʻefilifilimānako ki he faʻahinga kotoa ʻoku tau fetaulakí.—Sione 4:9.
4. Ko e hā ʻa e faʻifaʻitakiʻanga naʻe fokotuʻu ʻe Filipe ʻi he tuʻunga ko ha faiakó?
4 Ko e pōtoʻi ʻa Filipe ʻi he tuʻunga ko ha faiako ʻo e Folofola ʻa e ʻOtuá ʻe lava ke ʻiloʻi ia ʻi he fakamatala fekauʻaki mo e ului ʻa e ʻIunoke ʻItiopeá. (Ng. 8:26-38) Ko hono fakatupulekina ʻa e malava ke ngāueʻaki ʻa e Tohi Tapú pea ke ‘fakaʻuhinga mei he ngaahi Konga Tohi Tapú’ ko e founga ia ʻe taha ʻoku tau fakahāhā ai ʻa e laumālie tāimuʻá. (Ng. 17:2, 3, NW) ʻI he hangē ko Filipé, ʻoku tau kumi ke vahevahe atu ʻa e ongoongo leleí ʻi ha feituʻu pē ʻoku ʻi ai ʻa e kakaí pea ʻi he faingamālie kotoa pē.
5. Ko e hā ʻe lava ke tokoni ki he ngaahi mātuʻa Kalisitiané ke fakahūhū ʻa e laumālie tāimuʻá ki heʻenau fānaú?
5 Fāmilí mo e Fakatahaʻangá: Ko e fakakaukau mo e faʻifaʻitakiʻanga ʻa Filipé ʻoku ʻikai ha veiveiua naʻe ʻi ai ʻene ʻaonga moʻoni ki hono ngaahi ʻofefiné. (Ng. 21:9) ʻI he tuʻunga meimei tatau, ko e ngaahi mātuʻa Kalisitiane ʻoku fakatefito ʻenau moʻuí ʻi he ngaahi meʻa mahuʻinga ʻo e Puleʻangá ʻoku fakalototoʻaʻi ai ʻenau fānaú ke fai ʻa e meʻa tatau. Neongo ʻa e helaʻia he fakaʻosinga ʻo e uiké, ko ha mātuʻa ʻokú ne malanga loto-vēkeveke ki he niʻihi kehé ʻe lava ke ʻai ke maongo tuʻuloa ia ki he loto ʻo ha kiʻi tama.—Pal. 22:6.
6. ʻE lava fēfē ke tau fakahāhā ʻa e houngaʻia ʻi he kau tāimuʻa ʻi heʻetau fakatahaʻangá?
6 Naʻe fakaaʻu atu ʻe Filipe ʻa e talitali kakaí kia Paula mo Luke, ko e ongo Kalisitiane faivelenga naʻá na ngāue mālohi ʻi he ngāue ʻa Sihová. (Ng. 21:8, 10) ʻE lava fēfē ke tau fakahāhā ʻetau houngaʻiá mo e poupou ki he faʻahinga faivelenga he ʻaho ní? Mahalo ʻe lava ke tau fokotuʻu ange ke ngāue mo e kau tāimuʻá ʻi ha pongipongi pe ko ha efiafi ʻi ha ʻaho ʻoku tokosiʻi ai ʻa e kau ki he ngāue fakafaifekaú. (Fili. 2:4) ʻE lava ke tau toe fakaafeʻi kinautolu ki hotau ngaahi ʻapí ki ha feohi fakatupu langa hake. Pe ko e hā pē hotau ngaahi tuʻungá, ʻofa ke tau feinga kotoa ke fakahāhā ʻa e laumālie tāimuʻá.