Faifakamoʻoni Ola Lelei ʻi he Ngaahi Feituʻu Kakaí
1. ʻI he faʻifaʻitaki ki he kau Kalisitiane ʻi he ʻuluaki senitulí, ʻoku anga-fēfē ʻa e faifakamoʻoni ʻa e kau Kalisitiane ʻi he ʻaho ní ʻi he ngaahi feituʻu kakaí, pea ko e hā ʻa e ngaahi olá?
1 Hangē ko e muʻaki kau ākonga ʻa Sīsuú, ʻoku feinga ʻa e kau Kalisitiane ʻi he ʻaho ní ke vahevahe atu ʻa e ongoongo lelei ki he kakaí ʻi ha feituʻu pē ʻe lava ke maʻu ai kinautolú. (Ng. 16:13; 17:17; 20:20, 21) Ko hono ola ʻo ʻenau ngaahi feinga ke faifakamoʻoni ʻi he ngaahi feituʻu kakaí, ʻoku nau maʻu ai ʻa e kakai mahuʻingaʻia ʻi he lotolotonga ʻo e kakai naʻe teʻeki ai pē nai ke fetuʻutaki mo kinautolu ʻi he ngāue fakafaifekau fale-ki-he-falé.
2. Ko e hā ʻoku fiemaʻu ai ʻa e ʻiloʻiló ki he faifakamoʻoni ʻi he ngaahi feituʻu kakaí, pea ʻe lava ke tau tokoni fēfē ki he māú?
2 ʻOku fiemaʻu ʻa e ʻiloʻilo ʻi he faifakamoʻoni ʻi he feituʻu kakaí. ʻOku faʻa lelei tahá pē ke ʻoua ʻe ʻai ke fuʻu tekeutua atu ʻa e ngāué. Ko e fakatātaá, kapau ʻe fuʻu tokolahi ʻa e kau malanga ʻoku nau faifakamoʻoni ʻi ha ʻēlia tatau pe ʻaʻahi ki ha ngaahi pisinisi tatau, ʻe ongoʻi nai ʻe he niʻihi ʻo e kakaí ʻoku lōmekina kinautolu ʻi heʻetau ʻi aí. ʻE toʻo ai ʻe he meʻá ni ʻa e ngeia ʻo ʻetau ngāué pea fakangatangata nai ai ʻa ʻetau ola leleí. Ko e hā ʻa e meʻa ʻe lava ke fai ke taʻofi ai ʻa e hoko ʻa e meʻá ni? Kuo ʻiloʻi ʻe he niʻihi ʻo e ngaahi fakatahaʻanga ko ia ʻoku nau maʻu ʻa e ngaahi ʻēlia lahi ki he faifakamoʻoni ʻi he feituʻu kakaí ʻoku ʻaonga ke fokotuʻutuʻu eni ki he ngaahi feituʻu fakatāutaha. (1 Kol. 14:40) Tānaki atu ki ai, ʻe lava ke tau tokoni ki he māú kapau te tau ngāue ʻi he feituʻu pē kuo ʻosi vaheʻi ki hotau fakatahaʻangá tuku kehe ka kuo fai ha ngaahi fokotuʻutuʻu fakafou he Kōmiti Ngāue ʻa e Fakatahaʻangá ke tokoni ki ha toe fakatahaʻanga ʻe taha.—Sio ki he ʻEtau Ngāue Fakafaifekau ʻo e Puleʻanga ʻo Nōvema 1998, p. 6, pal. 18-19.
3. Ko e hā ʻa e fakaofiofi kuo ʻiloʻi ʻe he niʻihi ʻoku ola lelei ki he faifakamoʻoni ʻi he ngaahi feituʻu kakaí?
3 Fakaofiofi ki he Kakaí: ʻI he taimi naʻe talanoa ai ʻa Sīsū mo ha fefine ʻi he vaikelí, naʻá ne kamataʻaki ha kiʻi fakamatala nounou peá ne fakatupulekina fakalakalaka ai ʻa e fetalanoaʻakí ʻi he kamata ke hā mahino ʻa e mahuʻingaʻiá. (Sione 4:7-26) Ko e fakaofiofi ko ení ʻoku toe ola lelei foki ia ʻi he ngaahi feituʻu pau he ʻahó ni. ʻOku ʻiloʻi ʻe he kau malanga ʻe niʻihi ke hoko ʻo ola lelei ange ʻi he faifakamoʻoni ʻi he feituʻu kakaí, ʻoku ʻaonga ke fakamoleki ha ngaahi miniti siʻi ke fakafeʻiloaki ai ki he kakaí pea fakahaaʻi ha mahuʻingaʻia fakafoʻituitui ʻia kinautolu ki muʻa ke fakahaaʻi ʻa e pōpoaki ʻo e Puleʻangá. ʻOku nau fakamatalaʻi ha tuʻunga-lea ʻoku fakamānako fakalotofonua, ʻa ia ʻoku faʻa taki atu ai ki ha fetalanoaʻaki. ʻI hono fakahaaʻi ʻe he niʻihi kehé ʻenau hohaʻá, ʻoku nau fanongo tokanga. ʻIkai fuoloa, kuo nau vahevahe atu ʻa e fakafiemālie mei he Folofola ʻa e ʻOtuá.—Loma 15:4.
4. ʻE lava fēfē ke tau fakatupulekina ʻa e mahuʻingaʻia ʻoku tau maʻú?
4 Fakatupulekina ʻa e Mahuʻingaʻiá: Ko e taimi taki taha ʻokú te fai ai ha fetalanoaʻaki lelei, ʻoku totonu ke tau feinga ke fai ha ngaahi fokotuʻutuʻu ke fakatupulekina ai ʻa e mahuʻingaʻiá. ʻE lava fēfē ke tau fai eni? ʻI he ofi ke ʻosi ʻa e fetalanoaʻakí, te ke toʻo hake nai hoʻo kiʻi pepa noutí pea leaʻaki: “Kuó u fiefia ʻi heʻeta fetalanoaʻakí. ʻOku ʻi ai nai ha founga ʻe lava ai ke ta hoko atu ʻi ha toe taimi kehe?” Pe leaʻaki: “ʻOku ou saiʻia ke ke lau ha kupu ʻoku ou tuipau te ke mahuʻingaʻia ai. ʻE sai pē ke u haʻu mo ia ki ho ʻapí pe ʻōfisí?” Ko e kau malanga ia ʻe niʻihi ʻoku nau ʻeke pē: “ʻE lava ke ke ʻomai hoʻo fika telefoní?” ʻOku faʻa fakatupunga ʻe he meʻá ni ha tali lelei.
5. Ko e hā ʻa e taumuʻa ʻoku totonu ke tau maʻu ʻi heʻetau faifakamoʻoni ʻi he ngaahi feituʻu kakaí?
5 Ko e tokolahi ʻo e kakai naʻe ʻuluaki fetuʻutaki mo ia ʻi he ngaahi feituʻu kakaí kuo nau tali ʻa e ngaahi ako Tohi Tapu. ʻE lava ke fai ʻa e ngaahi ako Tohi Tapu peheé ʻi he ʻapi ʻo e tokotahá, ʻi hono feituʻu ngāueʻangá, ʻi ha feituʻu kakai feʻungamālie, pe fakafou he telefoní. ʻOfa ke tau ʻai ko ʻetau taumuʻá ia ke kamata ha ngaahi ako Tohi Tapu ʻi heʻetau faifakamoʻoni ola lelei ʻi he ngaahi feituʻu kakaí.