Founga Foʻou ki he Faifakamoʻoni ki he Kakaí
1. Ko e hā ʻa e faʻifaʻitakiʻanga naʻe fokotuʻu ʻe he kau Kalisitiane ʻi he ʻuluaki senitulí?
1 Ko e kau Kalisitiane ʻi he ʻuluaki senitulí naʻe ʻikai ke nau malanga mei he fale ki he fale pē. Naʻa nau toe malanga ʻi he ʻao ʻo e kakaí. (Ngā. 20:20) Ko e fakatātaá, naʻa nau ō ki he temipalé ʻa ia naʻa nau ʻiloʻi te nau maʻu ai ʻa e kakai tokolahi. (Ngā. 5:42) ʻI heʻene ʻi ʻAtenisí, ko e ʻapositolo ko Paulá naʻá ne malanga ʻi he ʻaho kotoa pē ki he niʻihi ʻi he māketí. (Ngā. 17:17) ʻI he ʻahó ni, ko ʻetau founga tefito ʻoku kei hokohoko atu ki hono fanongonongo ʻa e ongoongo leleí ko e ngāue fakafaifekau fale ki he falé. Kae kehe, ʻoku tau toe ʻalu foki ki he ngaahi tauʻanga meʻalelé, pisinisí, paʻaké, hala lahi femoʻuekiná pea mo e ngaahi feituʻu kehe koeʻuhí ke malanga ki he kakaí ʻi ha feituʻu pē ʻoku lava ke maʻu ai kinautolu. Lolotonga iá, ʻoku fakalototoʻaʻi ʻa e tokotaha malanga kotoa pē ke kau atu ʻi he malanga ki he kakaí ʻo ka malava, ʻe maʻu ʻe he tokolahi ʻa e faingamālie ke kau atu ʻi he ongo founga foʻou ʻoku fakatoʻoaloto ki he faifakamoʻoni ki he kakaí.
2. Ko e hā naʻe kamata ʻahiʻahiʻi ʻi Nōvema 2011?
2 Feituʻu Makehe ʻi he Loto Koló ki he Faifakamoʻoni ki he Kakaí: Hangē ko ia naʻe fakamatalaʻi ʻi he 2013 Yearbook, ʻo e peesi 16 mo e 17 naʻe muʻaki ʻahiʻahiʻi ʻa e faifakamoʻoni ki he kakaí ʻo kamata ʻi Niu ʻIoke ʻi Nōvema 2011. Ko e ngaahi tēpile mo e meʻa tuʻuaki-tohi fakavaʻe ʻoku fakaʻaliʻali ai ʻa e ʻū tohi ʻi he lea kehekehé, naʻe fokotuʻu fakapotopoto ia ʻi he loto koló ʻi he feituʻu ʻoku lahi ai ʻa e feʻaluʻakí. ʻI he ʻaho taki taha ko e kakai ʻe laui afe ʻoku nau felueʻaki aí, kau ai ʻa e tokolahi ʻoku nau nofo ʻi he ngaahi fale nofo totongi ʻoku maluʻi malu mo kinautolu ʻoku ʻikai ke nau faʻa ʻi ʻapí. Ko hono olá naʻe tokolahi ʻa e mahuʻingaʻiá. ʻI he māhina pē ʻe taha mei ai, naʻe tufa ai ʻa e makasini ʻe 3,797 mo e tohi ʻe 7,986. Naʻe tokolahi ʻa e faʻahinga naʻa nau fakalaka hake pea nau kole ki ha ako Tohi Tapu. Hili hono fakamamafaʻi ke kamata ha ngaahi ako Tohi Tapú, ko e ngaahi tuʻasila naʻe tuku mai mei he faʻahinga naʻa nau mahuʻingaʻia aí naʻe ʻave leva ia ki he ngaahi fakatahaʻanga ʻoku feʻungamālié ke nau toe foki ki he faʻahinga mahuʻingaʻiá.
3. ʻOku anga-fēfē hono fakalahi atu ʻa e founga ko ení?
3 ʻI he vakai ki he lavameʻa ʻa e founga foʻoú, kuo kamata ke fakalahi atu ia ʻi māmani lahi ʻi he taimí ni ki he ngaahi feituʻu loto koló. Ko e ʻōfisi vaʻa fakalotofonuá te ne fakapapauʻi ʻa e ngaahi kolo ʻe ʻaonga ki aí. ʻOku anga-maheniʻaki, ko e ngaahi koló ni ʻoku ʻi ai ʻa e ngaahi senitā ʻo e fefonongaʻakí pe ʻoku ʻi ai ʻa e ngaahi ʻōfisi pe ngaahi fale nofo totongi ʻa ia ʻoku lahi ai ʻa e femoʻuekina ʻi he feʻaluʻakí. Hili iá, ʻe fetuʻutaki ʻa e ʻōfisi vaʻá ki he ngaahi fakatahaʻanga te nau kau ki aí pea ʻoange mo e ngaahi fakahinohino. ʻOku faʻa ngāueʻaki ʻa e kau tāimuʻa tuʻumaʻú mo e tāimuʻa makehé neongo ia ʻoku kau ki ai mo e kau tāimuʻa tokoní ʻi he feituʻu ʻe niʻihi.
4. ʻOku anga-fēfē hono fai ʻa e faifakamoʻoni ki he kakaí ʻi he feituʻu makehe ʻi he loto koló?
4 Founga Hono Fai ʻa e Faifakamoʻoní: Ko e faʻahinga naʻa nau kau atu ki he faifakamoʻoni ki he kakaí ʻi he feituʻu makehe ʻi he loto koló ʻoku nau anga-maheniʻaki ʻa e talitali pē ke haʻu ha taha ki he tēpilé pe ko e meʻa tuʻuaki-tohi fakavaʻé. ʻI he taimi ʻoku fakaofiofi mai ai ha taha, ʻoku fakaafeʻi ia ke ne toʻo pē ha tohi ʻoku mahuʻingaʻia ai. ʻOku fiefia ʻa e kau tāimuʻá ke tali mei he Tohi Tapú ha faʻahinga fehuʻi te ne ʻeke nai. Kapau te ne ʻave ha tohi, ʻoku ʻikai ke lave ʻa e kau tāimuʻá ki he fokotuʻutuʻu ʻo e tokoni meʻaʻofá. Kapau te ne ʻeke ange fekauʻaki mo e founga hono fakapaʻanga ʻetau ngāué, te nau fakamatala nai ko e ngaahi tokoní ʻe lava ke ʻave ia ki he tuʻasila ʻoku fakahokohoko ʻi he tohí. Kapau ʻoku lava, te nau ʻeke: “Te ke saiʻia ke ʻaʻahi atu ha taha ki ho ʻapí?” pe “ʻOkú ke ʻiloʻi ko e tohí ni ʻoku mau toe tuʻuaki ai mo ha ako Tohi Tapu taʻetotongi?”
5. Ko e hā ko ha tāpuaki ai ki ha ongo meʻa mali ʻi heʻena kau atu ki he founga foʻou ko ení?
5 Ko e kau ki he founga faifakamoʻoni ko ení kuo maʻu ai ʻa e tāpuaki lahi. Naʻe tohi ʻe ha ongo meʻa mali: “Ko e tuʻu ʻi he tafaʻaki ʻo e tēpilé ʻo vakai ki he kakai ʻe laui afe ʻoku nau feʻaluʻaki ʻi he ʻaho taki taha ʻoku maongo ia ki homa lotó ʻa e ngāue lahi kuo fai ke aʻu ai ki he kakai kotoa ʻi he māmaní. ʻI he sio ki he fuʻu tokolahi ʻa e kakaí pea fakakaukau ki he anga ʻo e tokanga moʻoni mai ʻa Sihova ki he tokotaha taki taha ʻoku fakaivimālohiʻi ai ʻema fakapapau ke hokohoko atu hono ʻai ʻa e ngāue fakamalangá ko e meʻa tefito ia ʻi heʻema moʻuí. ʻOkú ma sioloto atu ki hono sivi ʻe Sihova ʻa e ngaahi loto ʻo kinautolu kotoa ʻoku nau fakalaka hake he tēpilé, ʻokú ne kumi ʻa e faʻahinga ʻoku tāú. ʻOkú ma ongoʻi ofi ange ai ki homa kaungāngāue ko e kau ʻāngeló.”
6. (a) Ko e hā ʻa e founga foʻou ʻoku toe tānaki atu ki he faifakamoʻoni ki he kakai ʻoku fokotuʻutuʻu ʻi he ngaahi fakatahaʻanga lahi, pea ʻoku anga-fēfē ʻene kehe mei he faifakamoʻoni ki he kakaí ʻi he feituʻu makehe ʻi he loto koló? (e) ʻE fāitaha fēfē nai ʻa e ngaahi fakatahaʻangá ʻi he kau atu ki he faifakamoʻoni ki he kakaí?
6 ʻOku Fokotuʻutuʻu Fakalotofonua ʻa e Faifakamoʻoni ki he Kakaí: Tānaki atu ki he faifakamoʻoni ki he kakaí ʻi he feituʻu makehe ʻi he loto koló ʻoku toe ʻi ai ʻa e founga foʻou ʻoku fokotuʻutuʻu ʻe he kulupu ʻo e kau mātuʻá ʻi honau feituʻu ngāue fakalotofonuá. Ko e founga foʻou ko ení, ʻoku ngāueʻaki ʻe he kau malangá ʻa e tēpile pe ko ha meʻa tuʻuaki fakavaʻe ʻi he feituʻu femoʻuekina ʻoku tokolahi ai ʻa e kakaí ka ʻi he feituʻu ngāue pē ʻa e fakatahaʻanga ko iá. ʻOku kehe eni ia mei he faifakamoʻoni ki he kakaí ʻi he feituʻu makehe ʻi he loto koló, ʻa ia ʻoku fili ʻa e faʻahinga mei he ngaahi fakatahaʻangá ke malanga ʻi he feituʻu tatau ʻoku lahi ai ʻa e feʻaluʻakí ʻi he ngaahi kolo lalahí ʻa ia ʻoku fili ia ʻe he ʻōfisi vaʻá.—Sio ki he puha “Fiemaʻu ʻa e Fāitaha.”
7. Ko fē feituʻu ʻoku feʻungamālié pea ʻe anga-fēfē hono fokotuʻutuʻu fakalotofonua ʻe he kau mātuʻá ʻa e faifakamoʻoni ki he kakaí?
7 ʻE lāulea ʻa e kau mātuʻá pe ʻoku ʻi ai ha feituʻu ngāue ʻi heʻenau fakatahaʻangá ʻoku lahi ai ʻa e femoʻuekina ʻi he feʻaluʻakí pea fakapapauʻi pe ʻoku feʻungamālie ki he fokotuʻutuʻu ʻo e faifakamoʻoni ki he kakaí. Ko e ngaahi feituʻu ia ʻe malava ke fokotuʻu ai ʻa e tēpilé mo e meʻa tuʻuaki fakavaʻé ʻo kau ai ʻa e tauʻanga meʻalele lahi, feituʻu tefito ʻo e koló ki he kakaí, ngaahi paʻaké, hala femoʻuekiná, ngaahi senitā fefakatauʻaki, ʻapiako ʻunivēsití, malaʻe vakapuna mo e feituʻu faiʻanga kātoanga fakataʻú. ʻOku ʻi ai ʻa e ʻaonga ʻi hono fokotuʻu ʻo e tēpilé ʻi he feituʻu tatau, ʻaho tatau pea ʻi he taimi tatau. Kuo ʻiloʻi ai ko e ngaahi tēpile ʻoku fokotuʻu ʻi he ngaahi senitā fefakatauʻakí ʻoku ola lelei ange ia ʻi he fale koloa lalahí ʻa ia ʻe toki ʻalu pe ki ai ha taha ʻi ha fiemaʻu ha meʻa pau. ʻI he feituʻu ʻe niʻihi, hangē ko e ngaahi ʻaluʻanga femoʻuekiná, ʻoku feʻungamālie nai ia ki hono ngāueʻaki ʻa e meʻa tuʻuaki fakavaʻe īkí. ʻOku lava ke hiki ʻe he kau mātuʻá mei heʻetau Uepisaití ʻa e ngaahi faile makehe ki hono fakaʻaliʻali ʻo e makasini Taua Leʻó mo e ʻĀ Hake! mo e tohi Akoʻi ʻe he Tohi Tapú. Ko e ngaahi faile ko ení kuo ʻosi teuteuʻi makehe ke ngāueʻaki pē ia ki he founga faifakamoʻoni ki he kakaí. Ko e faʻahinga ʻoku nau fakahoko ʻa e ngāué te nau fai ia ʻi he founga lahi tatau ʻo hangē ko kinautolu ʻoku nau kau ʻi he faifakamoʻoni ki he kakaí ʻi he feituʻu makehe ʻi he loto koló pea muimui ofi ki he ngaahi fakahinohino ʻa e ʻovasia ngāué. Kapau te nau maʻu ha tuʻasila ʻo ha tokotaha mahuʻingaʻia ʻoku ʻikai ke nofo ʻi honau feituʻu ngāué ʻoku totonu ke nau fakafonu leva ʻa e Please Follow Up (S-43) pea ʻave ia ki he sekelitalí.
8. Kapau ʻoku ʻikai ke ʻi ai ha ngaahi fokotuʻutuʻu ʻi he fakatahaʻangá ki he faifakamoʻoni ki he kakaí, ko e hā ʻa e ngaahi faingamālie ʻoku kei malava nai ke ke malanga aí?
8 Faifakamoʻoni ki he Kakaí ʻi Hoʻo Ngāue Fakafaifekau Fakafoʻituituí: Ko e ngaahi fakatahaʻanga ʻe niʻihi ʻoku ʻikai nai ke ʻi ai ha feituʻu femoʻuekina feʻunga ki he feʻaluʻaki ʻi honau feituʻu ngāué ʻa ia ʻe malava ai ke fokotuʻu ʻa e tēpilé pe ko hono ngāueʻaki ʻa e meʻa tuʻuaki tohi fakavaʻé ke fakaʻaliʻali ai ʻa e ʻū tohí. Kae kehe, naʻa mo e ngaahi fakatahaʻanga ko iá, ʻoku fakalototoʻaʻi ai ʻa e kau malangá ke nau fakakaukau ki hono fakakau ʻa e malanga ki he kakaí ʻi heʻenau ngāue fakafaifekau fakafoʻituituí. ʻOku ʻi ai ha ngaahi feituʻu faiʻanga fakatau, pe ko ha falekoloa femoʻuekina ʻi ho feituʻu ngāué? ʻOku ʻi ai ha paʻake pe ko ha feituʻu ʻoku faʻa fakataha ki ai ʻa e kakaí? ʻOku ʻi ai ha feituʻu ʻoku faʻa fakatahataha ki ai ʻa e kakaí ki ha kātoanga pe meʻa fakapuleʻanga ʻoku faʻa fakahoko ʻi ha ngaahi taimi ʻi he feituʻu ngāué? Kapau ko ia, te ke kei malava nai ke kau ki he faifakamoʻoni ki he kakaí.
9. Ko e hā ʻoku totonu ke tau fakamākukanga ai ʻi he malanga ki he kakaí ʻi ha feituʻu pē nai te nau ʻi ai?
9 Ko e finangalo ia ʻo Sihová ke hoko ʻa e “faʻahinga kakai kotoa pē ʻo fakahaofi pea ke nau aʻusia ha ʻilo totonu ki he moʻoní.” (1 Tīm. 2:4) Ko ia ai, ʻoku tau feinga ke aʻu ki he kakai tokolahi ʻe malavá mo e pōpoaki ʻo e Puleʻangá ki muʻa pea hoko mai ʻa e ngataʻangá. (Māt. 24:14) ʻI he ngaahi feituʻu lahi ko ha pole ia ke maʻu atu ʻa e kakaí ki honau ʻapí. Neongo ia, ʻoku malava ke tau lea kia kinautolu ʻi he taimi te nau mavahe ai mei ʻapí ʻi ha feituʻu kakai. Ko e faifakamoʻoni ki he kakaí ko e founga nai pē ia ʻe maʻu ai ʻe he kakai ʻe niʻihi ʻa e faingamālie ke fanongo ki he ongoongo leleí. Ko ia ai, ʻe malava nai ke tau kau kakato ki he ngāue fakafaifekaú ʻaki ʻa e malanga ki he kakaí ʻi ha feituʻu pē nai te nau ʻi ai.—2 Tīm. 4:5.
[Puha ʻi he peesi 5]
Fiemaʻu ʻa e Fāitaha
Kuo maʻu ʻa e fakamatala ko e kau malanga mei he ngaahi fakatahaʻanga kaungāʻapí naʻa nau kau atu ʻi ha taimi ʻe niʻihi ki he faifakamoʻoni ki he kakaí ʻi he hala tatau pē, ko e tauʻanga meʻalele tatau, ʻi muʻa ʻi he ngaahi pisinisi tatau pe tauʻanga meʻalele lahi. Ko e kau malanga mei he ngaahi fakatahaʻanga kehekehe naʻa nau tuku ʻa e ngaahi makasiní ʻi he ngaahi loki talitali kakai tatau, fale fō tatau pea malanga ki he ngaahi pisinisi tatau. ʻOku hoko ai eni ʻo fakatupu ʻita ki he kakai pisinisí mo e ngaahi kaungāʻapi ofi atu aí naʻa mo e taimi ʻoku ʻikai ke nau malanga atu ai ʻi he taimi tataú. Ko ia ai, ʻoku faʻa lelei taha ke nofo maʻu pē ʻi he feituʻu ngāue ʻoku vaheʻi ki he fakatahaʻangá ʻi he faifakamoʻoni ki he kakaí.
Kapau ʻoku loto ha kau malanga ke nau faifakamoʻoni ki he kakaí ʻi ha feituʻu ngāue ʻa ha fakatahaʻanga kaungāʻapi, ʻoku totonu ke nau talanoa ki heʻenau ʻovasia ngāué. ʻE lava ke ne toki fetuʻutaki leva ki he ʻovasia ngāue ʻa e fakatahaʻanga ʻe tahá ke maʻu ha ngofua ki muʻa ke nau toki kamata. Ko e ngaahi fakatahaʻanga lea kehé ʻoku vaheʻi ke nau malanga ʻi he feituʻu tatau, ko e kau ʻovasia ngāué ʻoku totonu ke nau fetuʻutaki lelei ʻi he feongoongoi ke fakaʻehiʻehi ai mei he fakaʻitaʻi ʻa e kakai ʻi he ngaahi kaungāʻapi ʻoku ʻikai ke nau kaunga ki aí. ʻI hoko ʻo fāitahá, ko e ngaahi meʻá ʻe hoko ʻo “taau mo maau.”—1 Kol. 14:40.