Ko ha Founga Foʻou mo Fakafiefia ki he Faifakamoʻoni ʻi he Feituʻu Kakaí
1. Ko e hā kuo fakalototoʻaʻi ke fai ʻe he ngaahi fakatahaʻanga ʻoku ʻi ai ʻa e ngaahi feituʻu ʻoku lahi ai ʻa e feʻaluʻaki holo ʻa e kakaí?
1 Kuo fakalototoʻaʻi ʻa e ngaahi fakatahaʻanga ko ia ʻoku ʻi ai ʻa e ngaahi feituʻu ʻoku lahi ai ʻa e feʻaluʻaki holo ʻa e kakaí, ke ngāueʻaki ʻa e founga faifakamoʻoni ʻi he feituʻu kakaí, ʻo ngāueʻaki ʻa e tēpile pe meʻa tuʻuaki-tohi fakavaʻé. Kapau ʻoku ngāueʻaki ʻa e meʻa tuʻuaki-tohi fakavaʻé, ʻe tuʻu pe tangutu nai ha tokotaha malanga ʻo ofi ki ai. Kae kehe, ʻoku totonu ke ʻi ai ha ongo malanga ʻe toko ua ʻi he veʻe tēpile tuʻuakí. Ko e faʻahinga ʻoku vaheʻi ke nau tuʻu ʻi he feituʻu ʻoku fokotuʻu ai ʻa e meʻa tuʻuakí ke nau feinga mālohi ke hoko ʻo vēkeveke, anga-fakakaumeʻa, mo anga-talitali kakai. Kapau ʻoku ʻi ai ha taha ʻoku tokanga ki he meʻa tuʻuakí, ʻe lava ke kamata ʻe ha taha ʻi he ongo malangá ʻa e fetalanoaʻakí, ʻaki ʻene pehē nai, “Kuó ke fifili nai ki he meʻa ʻoku leaʻaki ʻe he Tohi Tapú fekauʻaki mo e kaveinga ko ení?” ʻE lava ke tokangaʻi ʻe ha tokotaha malanga ʻe taha pe toko ua ʻa e meʻa tuʻuakí lolotonga ʻa e kau atu he faifakamoʻoni ʻi he founga ʻikai anga-mahení.
2. Fakamatala ki he hokosia ʻoku fakatātaaʻi ai ʻa e mahuʻinga ʻo e faifakamoʻoni ʻi he feituʻu kakaí fakataha mo e meʻa tuʻuaki tohí.
2 Kuo hoko ʻa e founga ko ení ke maʻu ai ha ngaahi ako Tohi Tapu foʻou. Ko ha tokotaha ako ʻunivēsiti naʻá ne fili ke fai ha fekumi fekauʻaki mo e Kau Fakamoʻoni ʻa Sihová, ka naʻe ʻikai malava ke ne ʻiloʻi ha Fale Fakatahaʻanga. ʻI he uike hono hokó naʻá ne fakatokangaʻi ha tēpile tuʻuaki ʻi he ʻapiakó. Naʻe kamata ha ako Tohi Tapu, pea ko e tokotaha ako ko ení kuó ne hoko ko ha tokotaha malanga ʻosi papitaiso pea ʻoku kau mo ia ʻi he founga faifakamoʻoni ko ení.
3. ʻOku anga-fēfē ʻa e ongoʻi ʻa e niʻihi fekauʻaki mo e founga faifakamoʻoni ʻi he feituʻu kakaí?
3 Ko ha tuofefine ʻe taha naʻá ne fiefia ʻi he founga ko eni ʻo e faifakamoʻoni ʻi he feituʻu kakaí naʻá ne pehē: “ʻOku afe mai ha niʻihi ki he meʻa tuʻuakí ʻo ʻave ʻa e ngaahi makasini fakamuimui tahá. Ko e niʻihi naʻe teʻeki ai ke nau fanongo ʻi he Kau Fakamoʻoni ʻa Sihová ki muʻa. ʻOku ou sio ko e founga ko ení ʻoku lava ke aʻu ai ki he kakai tokolahi.” Naʻe toe pehē ʻe ha tuofefine ʻe taha, “Ko ha founga foʻou mo fakafiefia eni ʻo e faifakamoʻoní koeʻuhi ko e kakaí ʻoku nau haʻu kiate koe, pea kapau ʻoku ʻikai te nau mahuʻingaʻia, ʻoku nau fieʻilo.”
4. Ko e hā ʻoku ʻaonga ai ke fokotuʻu ʻa e meʻa tuʻuaki tohí ʻi he taimi tatau mo e feituʻu tatau ʻi he uike taki taha?
4 ʻOku ʻi ai e ʻaonga hono fokotuʻu ʻa e meʻa tuʻuakí ʻi he feituʻu tatau, ʻaho tatau pea ʻi he taimi tatau ʻi he uike taki taha. Ko e olá, ʻe hoko ʻo anga ʻa e kakaí ʻi he sio ki he meʻa tuʻuakí pea faai atu pē te nau ongoʻi fiemālie ke fakalea mai pea ʻeke ha ngaahi fehuʻi mo ʻave ha tohi. Kuo fokotuʻutuʻu ʻe hoʻo fakatahaʻangá ha faifakamoʻoni ʻi he feituʻu kakaí? Kapau ko ia, ʻe lava ke ke kau nai ʻi he founga fakafiefia mo ola lelei ko ení ke “talaki atu ʻa e Puleʻanga ʻo e ʻOtuá.”—Luke 9:60.