Founga ke Ngāueʻaki Ai ʻa e Meʻa Tuʻuaki Tohí ʻi he Faifakamoʻoní

Ko e faifakamoʻoni ʻo ngāueʻaki ʻa e meʻa tuʻuaki tohi fakavaʻe pe tēpilé ʻoku fakamoʻoniʻi ʻene ola lelei ʻaupito ʻi hono tohoakiʻi mai ʻa e faʻahinga loto-totonú ki he moʻoní. (Sione 6:44) Ko ia ai, kuo fakalototoʻaʻi ʻa e kau mātuʻá ke nau fokotuʻutuʻu ʻa e faifakamoʻoni ʻi he feituʻu kakaí ʻi he feituʻu ngāue ʻa e fakatahaʻangá ʻa ia ʻoku lahi ai ʻa e feʻaluʻaki ʻa e kakaí. Koeʻuhi ko e ʻikai ke tuʻumaʻu ʻa e meʻa tuʻuakí, ko e anga-mahení ʻoku ʻikai fiemaʻu ia ke kole ha ngofua mei he kau maʻu mafaí. Ko hai ʻoku taau ke kau ki aí? Ko e kau malanga ʻoku nau fakahāhā ʻa e fakafuofua leleí, fakahaaʻi ʻenau fakakaukaú ʻi ha founga fakanānā pea pōtoʻi fakafetalanoaʻaki. Ko e ngaahi meʻa eni ke fai mo ʻikai totonu ke fai ʻa ia te ne tokoniʻi ʻa e kau malangá ke nau lavameʻa ange.

Meʻa ke Fai:

Hoko ʻo fakakaumeʻa, anga-talitali kakai pea tokoni ki he kau feʻaluʻakí. Ko e kau malanga ʻe niʻihi ʻoku nau malimali loto-māfana mo loto-moʻoni pea lea fakafeʻiloaki anga-fakakaumeʻa. Kapau ʻe sio ha taha ki he meʻa tuʻuakí ʻi heʻene lue haké, te ke pehē nai, “Kapau ʻokú ke saiʻia ha meʻa peá ke toʻo pē.”
Tuʻu ʻo mamaʻo feʻunga mei he meʻa tuʻuakí. ʻI he ngaahi feituʻu ʻe niʻihi ʻoku faʻa ola lelei ki he kau malanga ʻe niʻihi ʻi heʻenau tuʻu ʻo kiʻi mamaʻo mei he meʻa tuʻuakí. ʻOku fakatokangaʻi ʻe he niʻihi ko e founga ko ení ʻoku ʻai ai ʻa e kau lue haké ke nau veiveiua ke afe mai, ko ia ʻoku nau tuʻu ʻo kiʻi mamaʻo ange pea tatali ki he taimi ʻe afe ange ai ha taha ki he meʻa tuʻuakí. ʻI he taimi ʻoku fakaofiofi atu ai ha taha ki he meʻa tuʻuakí, feinga ke fetalanoaʻaki mo ia, hangē ko hano ʻeke ange, “Kuó ke fakakaukau ʻo fekauʻaki mo e fehuʻi ko iá?”
Ngāueʻaki ʻa e Tohi Tapú ʻi he lahi taha ʻe ala lavá.
Fakamatala ʻa e fokotuʻutuʻu ki he ako Tohi Tapú ki ha taha pē ʻokú ne ʻave ha taha ʻo ʻetau ʻū tohi akó, ʻo hangē ko e tohi Akoʻi ʻe he Tohi Tapú. Tuʻuaki ke huluʻi ange ʻa e foʻi vitiō Ko e Hā ke Ako Ai ʻa e Tohi Tapú? ʻi ha meʻangāue fakaʻilekitulōnika.
Feinga ke maʻu ʻa e tuʻasila ʻo e tokotaha mahuʻingaʻiá ʻo ka faingamālie. Kapau ʻoku ʻikai nofo ʻa e tokotahá ʻi ho feituʻu ngāué, fetuʻutaki ki ha tokotaha malanga ʻi hono feituʻú ʻa ia ʻe lava ke toe foki ki he tokotaha mahuʻingaʻiá.

Meʻa ke ʻOua ʻe Fai:

Hoko ʻo fakamālohi, fakamatematē pe tuʻu ʻi he veʻe meʻa tuʻuakí ʻo hangē ha sikiulitií.
Vakai ki he founga faifakamoʻoni ko ení ko ha founga pē ke tufa atu ai ʻa e ʻū tohí. ʻI he taimi ʻoku tau kau ai ʻi he ngāue fakafaifekaú, ko ʻetau taumuʻá ke kamata ha ngaahi ako Tohi Tapu, ko ia ʻoku totonu ke tau feinga ke fetalanoaʻaki mo e niʻihi kehé.
Fakapuliki ʻa e meʻa tuʻuakí pe femoʻuekina pē he talanoa mo ho hoá. Kapau ʻoku fuʻu fiemaʻu ke ke ngāueʻaki hoʻo telefoni toʻotoʻó, ʻoku faʻa lelei tahá ke ke kiʻi mavahe mei he meʻa tuʻuakí.
Fakafekiki mo e kau fakafepakí. Kapau ʻoku ʻita ange ʻa e tokotaha fakafepakí, ʻe fiemaʻu nai ke ke mavahe ki ha feituʻu ʻe taha.