Fakahāhā ʻa e Mahuʻingaʻia Fakafoʻituitui—ʻAki ʻa e Hoko ʻo Fakatokanga Meʻa
1 Ko Sihova ko e ʻOtuá mo Kalaisi Sīsū ʻokú na tuʻu-ki-muʻa ʻi hono ʻiloʻi ʻa e ngaahi fiemaʻu pau ʻa e kakaí pea mo hono ʻoange kiate kinautolu ʻa e tokoní. (2 Kal. 16:9; Mk. 6:34) ʻI heʻetau ʻiloʻi ʻa e ngaahi meʻa ʻoku tokanga mo hohaʻa ki ai ʻa e faʻahinga ʻoku tau fetaulaki mo ia ʻi heʻetau ngāue fakafaifekaú, ʻoku tau malava nai ai ke feliliuaki ʻa ʻetau founga fakamatalaʻi ʻo e ongoongo leleí ke feʻungamālie mo ia.
2 Tokanga ki he Ngaahi Fakaikiikí: Ko Sīsuú naʻe fakatokanga meʻa. (Mk. 12:41-43; Luke 19:1-6) ʻI he tuʻunga meimei tatau, ʻi he taimi ʻoku tau fakaofiofi ai ki he matapā ʻo e tokotaha-ʻapí ʻo ʻiloʻi ai ʻa e ngaahi teuteu fakalotú, kupuʻi lea ʻoku ʻasi ʻi he meʻalelé, pe ngaahi meʻa-vaʻinga ʻi he loto ʻataʻataá, ʻe malava nai ke tau fakatupunga ʻa e ngaahi faingamālie ke ʻoatu ai ha faifakamoʻoni ola lelei ʻo fekauʻaki mo e ongoongo leleí.
3 Ko e ngaahi fakafōtunga mo e tōʻonga ʻa ha taha te ne fakahaaʻi nai ai ha meʻa ʻo fekauʻaki mo ʻene ngaahi ongoʻí. (Pal. 15:13) Mahalo ko ha mole atu ʻa ha taha naʻe ʻofa ai pe ngaahi tuʻunga fakalotomamahi kehé kuo ʻai ai ia ke ne fiemaʻu ha fakafiemālie. Ko hano vahevahe atu ʻo ha ngaahi konga Tohi Tapu feʻungamālié te ne houngaʻia nai ai. (Pal. 16:24) ʻOku fakavavevave ʻa e tokotaha-ʻapí ke ʻalu pe ʻokú ne fua ha kiʻi pēpē ʻoku tangi? Kapau ʻoku pehē, mahalo ʻe lelei ange ke fokotuʻutuʻu ke ʻaʻahi ki ai ʻi ha toe taimi kehe. ʻI he hoko ʻo fakaʻatuʻi mo “fakahāhā ʻa e feongoʻiʻaki,” te tau malava nai ai ʻo ueʻi ʻa e tokotahá ke ne fanongo ʻi he taimi te tau foki atu aí.—1 Pita 3:8, NW.
4 Feliliuaki Hoʻo Ngaahi Fakamatalá: Naʻe fakatokangaʻi ʻe he ʻapositolo ko Paulá ko e kolo ko ʻAtenisí kuo ʻi ai ha ʻōlita ai naʻe fakatapui “Moʻo ha ʻOtua Teʻeki ʻIloa.” Naʻe tākiekina ʻe he meʻá ni ʻa e founga naʻá ne ʻoatu ai ʻa e ongoongo leleí, he naʻá ne pehē: “Ko e meʻa ʻoku mou lotu taʻe ʻilo ki ai, ko eni ia ʻoku ou fakahā ni kiate kimoutolu.” Ko e fakaofiofi fakapotopoto ʻa Paulá naʻe ueʻi ai ʻa e niʻihi ʻo e faʻahinga naʻe ʻi aí ke nau fakakaukau ki he pōpoaki ʻo e Puleʻangá pea ke hoko ai ko e kau tui.—Ng. 17:23, 34.
5 ʻI he tuʻunga meimei tatau, ko ʻetau hoko ko ia ʻo fakatokanga meʻá ʻokú ne tokoniʻi ai kitautolu ke tau ʻiloʻi ʻa e ngaahi meʻa ʻoku mahuʻingaʻia ai ha tahá pea fakaʻatā ai kitautolu ke feliliuaki ʻa ʻetau fakaofiofí. Ngāueʻaki ʻa e ngaahi fehuʻi ʻe malava ke ne fakaʻaiʻai ʻa e tokotaha-ʻapí ke ne fakahaaʻi ʻene ongoʻí. Fakakaukau ki he ngaahi konga Tohi Tapu ʻe lava ʻo ngāueʻaki ke fakalahi ai ʻa ʻene mahuʻingaʻiá. (Pal. 20:5) Ko ʻetau hoko ko ia ʻo fakatokanga meʻa pea fakahāhā ʻa e mahuʻingaʻia fakafoʻituitui loto-moʻoni ʻi he niʻihi kehé te ne tokoniʻi ai kitautolu ke tau vahevahe pōtoʻi atu ʻa e ongoongo leleí.