Fakahāhā ʻa e Mahuʻingaʻia Fakafoʻituitui—ʻAki ʻa e Hoko ʻo Feʻunuʻaki
1 Naʻe fokotuʻu ʻe he ʻapositolo ko Paulá ha faʻifaʻitakiʻanga lelei ʻi heʻene feʻunuʻaki maʻu pē ʻa ʻene tuʻuaki ʻo e ongoongo leleí ki he puipuituʻa mo e fakakaukau ʻo ʻene kau fanongó. (1 Kol. 9:19-23) ʻOku totonu ke tau feinga mālohi ke fai ʻa e meʻa tatau. Fakataha mo ha kiʻi tomuʻa fakakaukau, ʻoku faʻa lava ke tau feʻunuʻaki ʻa e ngaahi sīpinga tuʻuaki ʻa ia ʻoku hā ʻi he ʻEtau Ngāue Fakafaifekau ʻo e Puleʻanga ke feʻunga mo e ngaahi fiemaʻu ʻa e kakai ʻi hotau feituʻú. ʻI heʻetau fakaofiofi ki ha matapā, te tau fakatokangaʻi nai ai ʻa e ngaahi fakaʻilonga ʻo e ngaahi meʻa ʻoku mahuʻingaʻia ai ʻa e tokotaha-ʻapí pea fakakau ʻa e ngaahi meʻá ni ʻi heʻetau tuʻuakí. Kae kehe, ʻoku toe ʻi ai ha founga ʻe taha ʻe lava ke tau feʻunuʻaki ai ʻi heʻetau ngāue fakafaifekaú.
2 Langa ʻi he Meʻa ʻOku Leaʻaki ʻe he Niʻihi Kehé: ʻI hono tuʻuaki ʻa e ongoongo leleí, ʻoku tau faʻa langaʻi ai ha fehuʻi pea fakaafeʻi ʻa e ngaahi ʻapí ke nau fai ha tali. ʻOku anga-fēfē hoʻo vakai ki he talí? ʻOkú ke hehema ke kehe pē ʻokú ke fai ha fakamālō peá ke hokohoko atu pē koe ʻi hoʻo tuʻuaki kuo ʻosi teuteú? Pe ʻoku tapua atu nai ʻe he meʻa ʻokú ke leaʻakí ʻokú ke fakakaukau moʻoni ki he ngaahi tali ʻa e ngaahi ʻapí? Kapau te ke fakahaaʻi ha mahuʻingaʻia loto-moʻoni ʻi he meʻa ʻoku leaʻaki ʻe he niʻihi kehé, te ke malava nai ai ʻo ngāueʻaki ha toe ngaahi fehuʻi pōtoʻi ke ʻiloʻi ai ʻa e meʻa moʻoni ʻoku ʻi honau ʻatamaí. (Pal. 20:5) Ko ia te ke lava ai ʻo fakahanga ʻa e tokangá ki he ngaahi tafaʻaki ʻo e pōpoaki ʻo e Puleʻangá ʻoku fakamatala fakahangatonu taha ki he ngaahi meʻa ʻoku tokanga ki ai ʻa e tokotaha fanongó.
3 ʻOku fiemaʻu heni ke tau loto-lelei ke talanoa ʻo kau ki he ngaahi kaveinga kehe, ʻo ʻikai ko e ngaahi kaveinga naʻa tau tomuʻa palani ke lāulea ki aí. Kapau te tau kamataʻaki ʻetau fakamatala ki ha palopalema ʻoku ʻi he ongoongó pea lave ʻa e tokotaha-ʻapí ia ki ha ʻīsiu fakalotofonua pe fakafoʻituitui ʻa ia ʻokú ne tokanga ki ai, ʻe ueʻi kitautolu ʻe heʻetau mahuʻingaʻia loto-moʻoni ke feau ʻa e ngaahi fiemaʻu ʻa e tokotaha-ʻapí ke fakatefito ʻa e lāulea Fakatohitapú ʻi he ngaahi meʻa ʻoku mahuʻinga taha kiate iá.—Fili. 2:4.
4 Ko Hono Feʻunuʻaki ʻEtau Fakaleá: ʻI hono langaʻi ʻe he tokotaha-ʻapí ha fehuʻí, te tau ʻiloʻi nai ʻe ʻaonga ke hokohoko atu ʻa e fetalanoaʻakí ʻi ha taimi ʻamui ange, hili ia ʻetau malava ke fekumi ki ha ngaahi fakamatala lahi ange ʻi he kaveingá. ʻE lava ke tau toe tuʻuaki ʻa e ngaahi tohi ʻa ia ʻoku ʻi ai ha lāulea fakaʻāuliliki ange ki he tuʻunga-leá. ʻOku tapua kotoa atu ʻe he meʻá ni ʻetau mahuʻingaʻia loto-moʻoni ʻi hono tokoniʻi ʻa e niʻihi kehé ke nau hoko ʻo ʻiloʻi ʻa Sihová.—2 Kol. 2:17.