Fakahāhā ʻa e Mahuʻingaʻia Fakafoʻituitui—ʻAki ʻa e Hoko ʻo Teuteu
1 Ko e teuteu lelei ki he ngāue fakafaifekaú ʻoku tokoniʻi ai kitautolu ke fakahāhaaʻi ʻa e mahuʻingaʻia fakafoʻituitui ʻi he niʻihi kehé. Anga-fēfē? ʻI heʻetau teuteu leleí, ʻoku siʻi ai ʻetau nōfoʻi ʻi heʻetau tuʻuakí pea ʻoku lava ke tau fai ai ha tokanga lahi ange ki he tokotaha-ʻapí. Tānaki atu ki ai, ʻoku tokoniʻi ai kitautolu ke tau ikuʻi ʻa e manavasiʻí pea fakaʻatā ai kitautolu ke lea mei he lotó. Ka, ʻe lava fēfē ke tau teuteu ki ha tuʻuaki ola lelei?
2 Ngāueʻaki ha Tuʻuaki ʻOku Feʻungamālie: Fili mei he ʻEtau Ngāue Fakafaifekau ʻo e Puleʻanga ʻo Sanuali 2006, ha taha ʻo e ngaahi tuʻuaki ʻoku fokotuʻu mai aí ʻa ia ʻoku feʻungamālie ki ho feituʻú, pea fakakaukau ki he founga ʻe lava ke ke fakalea ai ia ʻi hoʻo lea pē ʻaʻaú. Liliu ia fakatatau ki ho feituʻu ngāué. Ko e fakatātaá, kapau ʻokú ke faʻa fetaulaki mo e kakai ʻo ha ʻātakai fakalotu pe fakafaʻahinga pau, fakakaukau ki he founga ʻe lava ke ke ʻai ai hoʻo tuʻuakí ke fakamānako kiate kinautolú. ʻI hono liliu hoʻo tuʻuakí ki he faʻahinga tāutaha ko ia ʻokú ke lea ki aí ʻoku tapua atu ai ʻa hoʻo mahuʻingaʻia loto-moʻoni ʻiate kinautolú.—1 Kol. 9:22.
3 ʻI hoʻo kamata ngāueʻaki ʻa e tuʻuakí, hokohoko atu hono fakaleleiʻí. Koeʻuhi ko e mātuʻaki mahuʻinga ʻa e ngaahi lea kamatá, tokanga ki he anga ʻo e tali ʻa e kakaí ki hoʻo talateú. ʻOku mahuʻinga ʻa e tuʻunga-leá kiate kinautolu? ʻOku ʻomai ʻe he ngaahi fehuʻi ʻokú ke langaʻi atú ha tali? Kapau ʻoku ʻikai, fai ha ngaahi fakatonutonu kae ʻoua leva kuó ke ongoʻi ʻoku ola lelei ha tuʻuaki.
4 Ngaahi Tokoni ki he Manatú: ʻOku ʻiloʻi nai ʻe he tokolahi ko ha pole ia ke manatuʻi ha tuʻuaki ʻi he taimi ʻoku nau ʻi he matapaá ai. Kapau ʻokú ke ʻiloʻi hifo ʻoku pehē, kuó ke feinga ke ʻahiʻahiʻi ʻa e tuʻuakí ʻo leaʻaki leʻo-lahi ia ki ha tokotaha kehe? ʻE lava ke tokoni ʻeni kiate koe ke ke maʻu lelei ʻa e ngaahi foʻi fakakaukaú ʻi ho ʻatamaí pea fakahoko kinautolu ʻi ha founga faingofua mo totonu. ʻE lava ke toe teuteuʻi ai koe ke ke lavaʻi ʻa e ngaahi tali kehekehe nai ʻe fai mai.
5 Ko e toe tokoni ʻe taha ki he manatú ko hono tohi fakanounou ʻo e tuʻuakí ʻi ha kiʻi lauʻipepa pea hila ki ai ʻi he ki muʻa siʻi pē ʻi hoʻo fakalea ʻi he matapaá. ʻOku ʻiloʻi ʻe he niʻihi ko e kiʻi fakamanatu nounou ko ʻení ʻoku tokoni ia kiate kinautolu ke nau nonga ange mo malava lelei ange ai ke fetalanoaʻaki mo e kakaí. ʻI he ngaahi foungá ni, ʻe lava ʻe he teuteu leleí ʻo tokoniʻi kitautolu ke fakahāhaaʻi ʻa e mahuʻingaʻia fakafoʻituitui ʻi he niʻihi kehé pea fakaleleiʻi ai ʻetau tuʻuaki ʻa e ongoongo leleí.