Ngāuefakapotopotoʻaki ʻa ʻEtau Ngaahi Tohi Makatuʻunga Fakatohitapú
1, 2. ʻOku anga-fēfē ʻa e ongoʻi ʻa e kakai tokolahi ʻo fekauʻaki mo ʻetau ngaahi tohí, pea ko e hā ʻa e fehuʻi ʻoku langaʻi hake hení?
1 “Kuó u lau hoʻomou ngaahi tohí talu mei he 1965. ʻOku ou fakafehoanaki ia ki he Tohi Tapú ʻi heʻeku laú, pea ko e meʻa kotoa pē ʻi hoʻomou ngaahi tohí ʻoku fehoanaki ia mo e Tohi Tapú. Kuó u fiemaʻu maʻu pē ke ʻiloʻi ʻa e moʻoni totonu fekauʻaki mo e ʻOtuá mo Sīsuú, pea ʻoku lava ke u lea totonu atu ʻoku ou maʻu ʻa e ngaahi tali moʻoní fakafou ʻi hoʻomou ngaahi tohí mo e Tohi Tapú.” Ko e meʻa ia naʻe tohi ʻe ha tangata ʻe taha ki he ʻuluʻi ʻapitanga ʻo e Kau Fakamoʻoni ʻa Sihová. ʻI he tohi tatau, naʻá ne kole ange ai ki ha ako Tohi Tapu.
2 ʻI he hangē ko e tangata houngaʻia ko iá, ʻoku laui miliona ʻa e kakai takatakai he māmaní ʻoku nau houngaʻia ʻi he ngaahi tohi tokoni ako Tohi Tapu kuo tokonaki mai ʻe he “tamaioeiki agatonu mo boto.” (Mt. 24:45, PM) ʻI he taʻu taki taha, ʻoku faʻu ai ha ngaahi tohi lahi ʻaupito ke tokoniʻiʻaki ʻa e kakai loto-totonú ke nau “aʻusia ʻa e ʻilo kanokano ki he moʻoni.” (1 Tim. 2:4) ʻE lava fēfē ke tau ngāuefakapotopotoʻaki ʻa ʻetau ngaahi tohi makatuʻunga Fakatohitapú?
3. ʻE lava fēfē ke tau fakaʻehiʻehi mei hano maumauʻi ʻa e ngaahi tohí?
3 Fakaʻehiʻehi mei Hono Maumauʻí: ʻI he faai mai ha kiʻi vahaʻa taimi, ʻe lava ke tau tātānaki ai ha ngaahi tohi lahi ange ʻi he meʻa te tau ngāueʻaki moʻoní. Ko e hā ʻe lava ke tau fai ke fakaʻehiʻehi ai mei hono maumauʻi ʻa ʻetau ngaahi tohi mahuʻingá? ʻOku fiemaʻu ʻa e ʻiloʻilo ʻi heʻetau ʻave ʻa e ngaahi tohi ke ngāueʻaki ʻi he ngāue fakafaifekaú. ʻI he ʻikai ke ʻomai ha ngaahi tatau lahi ʻo ha tohi ʻa ia te tau tuʻuakí, te tau ʻave nai ha tatau pē ʻe taha pe ua pea toki foki ʻo ʻomai ha tatau lahi ange ʻi he hili hono tufaki atu kinautolú. ʻE taʻofi ai heni ha fokotuʻuna ʻo ha ngaahi tohi lahi ʻi hotau ʻapí. ʻI he tuʻunga meimei tatau, kapau ʻoku tau maʻu ha ngaahi makasini lahi ʻaupito ʻoku teʻeki tufa, ʻe feʻungamālie ke fakasiʻisiʻi ʻa e lahi ʻoku tau kolé.
4. Ko e hā ʻe lava ke fai kapau ʻoku fuʻu hulu ʻa e sitoka tohi ʻa ha fakatahaʻanga?
4 Ngaahi Sitoka Fuʻu Hulu: Kapau ʻoku fuʻu hulu ʻa e sitoka ʻo ha ngaahi tohi pau ʻi he fakatahaʻangá, ʻe fiemaʻu nai ʻe he kouʻotineita ʻo e ʻū tohí ke ne vakaiʻi ʻa e ngaahi fakatahaʻanga kehe ʻi he feituʻú ke sio pe ʻe lava ke nau ngāueʻaki ʻa e ngaahi tohi hulú. ʻE lava ke tuʻuaki ʻe he kau malangá ʻa e ngaahi tohi motuʻa angé ki he ngaahi mēmipa taʻetui ʻo e fāmilí, kau ako Tohi Tapú mo e niʻihi kehé. Ko e faʻahinga ko ia ʻoku nau toki feohi foʻou mo e fakatahaʻangá te nau saiʻia nai ke tuku ʻa e ngaahi tohi motuʻa ange ko ení ʻi heʻenau laipeli fakateokalati fakafoʻituituí.
5. ʻE lava fēfē ke tau fakahāhaaʻi ʻa e houngaʻia ʻi heʻetau ngaahi tohí?
5 ʻOku tau fiemaʻu ʻetau ngaahi tohí ke nau aʻusia ʻa e meʻa ʻoku fakataumuʻa ki ai kinautolú, ʻa ia ko hono tokoniʻi ʻa e kakai loto-moʻoní ke nau ako lahi ange ʻo kau ki he ngaahi taumuʻa fakaofo ʻa Sihová. Hangē pē ko e ʻikai ke maumauʻi ʻe Sīsū ʻa e toenga meʻakaí hili ʻene fafanga fakaemana ʻa e fuʻu kakaí, ʻoku totonu ko ʻetau taumuʻá ia ke tau ngāueʻaki ʻi he lelei tahá ʻa e ngaahi tohi makatuʻunga Fakatohitapu mahuʻinga ʻa ia kuo tokonaki maí. (Sione 6:11-13) Ko e pōpoaki fakahaofi-moʻui ʻoku maʻu ʻi heʻetau ngaahi tohí ʻe ʻikai lava ke aʻu ia ki he loto ʻo e kakai hehema totonú kapau ʻoku kei toe pē ia ʻi heʻetau tukuʻanga tohí pe ʻi heʻetau kato tohí. Ko ia ai, kuo pau ke tau fakaʻatuʻi ʻi hono ʻave ʻa e ngaahi tohí ki he ngāue fakafaifekaú pea ngāuefakapotopotoʻaki ia ke maʻu ʻaonga ai ʻa e niʻihi kehé.—Fili. 4:5.