Ngāueleleiʻaki ʻEtau ʻŪ Tohí
1. Te tau faʻifaʻitaki fēfē nai ki he faʻifaʻitakiʻanga ʻo e houngaʻia ʻa Sīsū ʻi he tokonaki ʻa Sihová?
1 ʻI he ʻosi hono fafangaʻi fakaemana ʻe Sīsū ha fuʻu kakai tokolahi, naʻá ne fokotuʻutuʻu leva ke tānaki fakalelei ʻa e toengá. (Mt. 14:19-21) Ko e houngaʻia pehē ʻi he tokonaki ʻa Sihová ʻoku fokotuʻu mai ai ʻa e faʻifaʻitakiʻanga lelei kia kitautolu ke tau “hoko ko e kau fai fakafetaʻi” ʻi hono ngāueleleiʻaki ʻa e kotoa ʻo e ʻū tohi ʻa ia ʻoku tokonaki mai ʻe Sihova fakafou ʻi he “setuata faitōnungá.”—Kol. 3:15; Luke 12:42, NW; Mt. 24:45-47.
2. Te tau fakaʻehiʻehi fēfē mei hono ʻai ke fokotuʻunga ʻa e makasiní?
2 Makasini: ʻE lavangofua ke hoko ʻo fokotuʻunga ʻa e ngaahi makasiní. Kapau ʻoku toe maʻu pē ʻetau makasiní, ʻoku totonu ke fakasiʻisiʻi ʻa e lahi ʻo e makasini ʻoku tau kolé. Ko e hā ʻe fai ki he ngaahi makasini motuʻa angé? ʻOku ʻikai ke mole ʻa honau mahuʻingá ʻi he ʻalu ʻa e taimí. Kapau ʻoku ʻi ai haʻatau fokotuʻunga makasini motuʻa, mahalo ʻe lava ke tokoniʻi kitautolu ʻe he ʻovasia ngāué pe ko ha toe mātuʻa kehe ke maʻu ha ngaahi founga ola lelei ki hono tufá.
3, 4. Ko e hā e ngaahi meʻa ʻoku totonu ke tau manatuʻi ʻi heʻetau ʻomi ʻa e ʻū tohi mei he Fale Fakatahaʻangá?
3 Tohi Kehe: ʻI he taimi ʻe liliu ai ʻa e tuʻuakí ki ha tohi kehe, ʻuluaki vakaiʻi ke ʻiloʻi pe kuó ke ʻosi maʻu ʻi ʻapi ha ʻū tohi pehē ki he ngāue fakafaifekaú ki muʻa ke toe ʻomi ha ʻū tohi mei he Fale Fakatahaʻangá. Manatuʻi ke ʻomi pē ʻa e tohi ʻoku fiemaʻu ki he uike ko iá, pea toki foki pē ki he kānita tohí ʻi he taimi ʻoku fiemaʻu ai ha tohi lahi ange hili hono tufa ʻa e ʻū tohí.
4 Ki he ʻū tohi ke ngāueʻaki fakafoʻituituí, kole pē ʻa e tohi ʻokú ke fiemaʻu moʻoní. Tohi ho hingoá ʻi he ʻatā ʻoku ʻoatú. ʻE tokoni eni kapau ʻe mole hoʻo tohí ke toe fakafoki atu. Kapau ʻokú ke ngāueʻaki ʻa e Watchtower Library ʻi he CD-ROM pea tauhi ai ʻa e ngaahi makasini ʻokú ke ngāueʻaki fakafoʻituituí, ʻe ʻikai nai ke toe fiemaʻu ia ke ke kole haʻo voliume fakafoʻituitui ʻo e Taua Leʻo mo e ʻĀ Hake!
5. Ko e hā ʻoku totonu ke tau manatuʻi ʻi he taimi ʻoku tau tufa ai ʻetau ʻū tohí?
5 Tufa ʻo e ʻŪ Tohí: ʻOku tau feinga ke tufa ʻetau ʻū tohí ki he faʻahinga pē ko ē ʻoku nau fakahaaʻi ʻa e mahuʻingaʻia moʻoní. Manatuʻi ko e fatongia tefito ia ʻo kitautolu ke tau totongi ʻa e fakamole ki he ngaahi meʻangāue mahuʻinga ko ení ʻi heʻetau ngāue fakafaifekaú. ʻI he taimi ʻoku tuku ai ha tohi ʻi he faʻahinga mahuʻingaʻiá, ʻoua ʻe toumoua ke fakahā ange ko ha faingamālie ia ʻoku nau maʻu ke poupou ai ki he ngāue ʻi māmani lahí ʻaki ʻenau fai ha tokoni fakapaʻanga.
6. Ko e hā ʻoku tau fakamahuʻingaʻi lahi ai ʻa ʻetau ʻū tohí, pea ko e hā te ne ueʻi kitautolu ke tau fai ki aí?
6 Naʻe tokonaki fakaemana ʻe Sīsū ha meʻakai fakamatelie ki he niʻihi kehé, ka naʻe faʻa lahi ange ʻa ʻene fafangaʻi fakalaumālie ʻa e kakaí. Naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mt. 4:4) Ko ʻetau ʻū tohí ʻoku akoʻi ai ʻa e moʻoni ʻi he Tohi Tapú ʻoku mātuʻaki mahuʻinga ki hono maʻu ʻa e moʻui taʻengatá. (Sione 17:3) ʻOku fuʻu mahuʻinga ia ke fakamoleki noaʻia!