Ko ha Foʻi Vitiō ʻOkú Ne Fakamamafaʻi ha Ngaʻunu Fakafaitoʻo Mahuʻinga
Ko e kau palōfesinale fakalao mo e tokangaʻi-moʻui fakafaitoʻó ʻoku nau fai ʻa e tokanga fakautuutu ki he ngaahi vakai mo e ngaahi totonu fakaʻēfika ʻa e kau mahaki ʻoku faitoʻó. Kuo pouaki ʻe he meʻá ni ʻa e ngaahi faitoʻo mo e ngaahi founga foʻou ʻa ia ʻoku lava ke maʻu ʻaonga mei ai ʻa e Kau Fakamoʻoni ʻa Sihová. (Ng. 15:28, 29) Ko e meʻa ia ʻoku fakahangataha ki ai ʻa e foʻi vitiō Transfusion-Alternative Health Care—Meeting Patient Needs and Rights. Sio ai, pea fakamanatu leva ʻa e meʻa kuó ke akó.—Fakatokanga: Koeʻuhi ko e foʻi vitioó ʻoku kau ki ai ʻa e ngaahi ʻata nounou fakafaitafa, ʻoku totonu ke ngāueʻaki ʻe he ngaahi mātuʻá ʻa e fakapotopotó ʻi heʻenau mamata mo e fānau īkí ʻi he foʻi vitioó.
(1) Ko e hā ʻoku toe fakapapauʻi ai ʻe he ngaahi kulupu fakafaitoʻó ʻa hono ngāueʻaki ʻo e huhu totó? (2) ʻOmai ha fakatātā ʻe tolu ʻo e ngaahi tafa fihi ʻa ia ʻe lava ke fakahoko ʻo ʻikai ha huhu totó. (3) Ko e kau toketā pea mo e kau toketā tafa ʻe toko fiha ʻi māmani lahi kuo nau fakahaaʻi ʻenau loto-lelei ke faitoʻo ʻa e kau mahakí ʻo ʻikai ha huhu totó? Ko e hā ʻoku nau loto-lelei ai ke fai peheé? (4) Ko e hā kuo fakahaaʻi ʻi he ngaahi ako fakafalemahaki ki muí ni ʻo fekauʻaki mo hono ngāueʻaki ʻo e totó? (5) Ko e hā ʻa e ngaahi fakatuʻutāmaki fakafaitoʻo ʻoku fekauʻaki mo e huhu totó? (6) Ko e hā ʻa e fakamulituku kuo aʻu ki ai ʻa e kau mataotao tokolahi ʻi he fekauʻaki mo e ʻaonga ʻo e ngaahi faitoʻo fetongi ʻo e huhu totó? (7) Ko e hā ʻokú ne fakatupunga ʻa e ʻanīmiá? Ko e hā hono lahi ʻo e malava ke matuʻuaki ia ʻe he tangatá? Ko e hā ʻe lava ke fetongiʻaki iá? (8) ʻE lava fēfē ke fakakake ʻa hono faʻu ʻo e sela-kulokulá ʻi he sino ʻo ha mahaki? (9) Ko e hā ʻa e ngaahi founga ʻoku ngāueʻaki ke fakasiʻisiʻiʻaki e mole ʻa e totó lolotonga ʻa e tafá? (10) ʻE lava ke ola lelei ʻa e ngaahi faitoʻo fetongi ʻo e huhu totó ki he fānau īkí pe ki he kakai ʻoku ʻi he tuʻunga fakatuʻutāmaki ʻenau moʻuí? (11) Ko e hā ʻa e taha ʻo e ngaahi tefitoʻi moʻoni fakaʻēfika tefito ʻo e tokangaʻi fakafaitoʻo leleí? (12) Ko e hā ʻoku mahuʻinga ai ki he kau Kalisitiané ke nau fai tokamuʻa ʻa e ngaahi fili fakafaitoʻo taʻekau ai ha totó? ʻE lava fēfē ke tau fai eni?
Ko hono tali ha niʻihi ʻo e ngaahi faitoʻo ʻoku fakaeʻa ʻi he foʻi vitioó ko ha fili fakafoʻituitui ia ʻo fakatatau ki he konisēnisi ʻo e toko taha taki taha kuo akoʻi ʻe he Tohi Tapú. Kuó ke fili pe ko fē ʻa e ngaahi fetongi ʻo e huhu totó ʻokú ke loto-lelei ke tali maʻau mo hoʻo fānaú? Ko e ngaahi mēmipa ʻo e fāmilí ʻa ia ʻoku ʻikai ko ha Fakamoʻoní ʻoku toe totonu foki ke nau lāuʻilo kakato ki hoʻo ngaahi filí pea mo e ngaahi ʻuhinga ki aí.—Sio ki he “Ngaahi Fehuʻi mei he Kau Lautohí” ʻi he ʻīsiu ʻo e Taua Leʻo ʻo Sune 15, 2004 mo ʻOkatopa 15, 2000.