ʻOkú Ke Tautoloi?

Tautoloi ʻa e hā? ʻA hono fakafonu ʻo e kaati HCD (Fakahinohino ki he Tokangaʻi ʻo e Moʻuí) ʻoku ʻoange ki he Kau Fakamoʻoni ʻosi papitaisó. Koeʻuhi ko e ‘ikai te ke ilo aia e hoko abogibogí,’ ʻoku mātuʻaki mahuʻinga ke ke fakapapauʻi ki muʻa pea fakahaaʻi ʻi ha tohi ʻa e ngaahi faitoʻo mo e ngaahi founga fakafaitoʻo te ke tali ʻi he hoko ha meʻa fakavavevave fakafaitoʻo. (Sem. 4:14, PM; Ng. 15:28, 29) Ke tokoniʻi koe, kuo faʻu ai ʻa e foʻi vitiō Transfusion-Alternative Health Care—Meeting Patient Needs and Rights. Sio ai, pea fakamanatu fakataha mo e lotu ʻa e meʻa kuó ke akó ʻo ngāueʻaki ʻa e ngaahi fehuʻi ʻoku ʻoatu ʻi laló.—Fakatokanga: Koeʻuhi ko e foʻi vitioó ʻoku kau ki ai ʻa e ngaahi ʻata nounou fakafaitafa, ʻoku totonu ke ngāueʻaki ʻe he ngaahi mātuʻá ʻa e fakapotopotó ʻi heʻenau mamata mo e fānau īkí ʻi he foʻi vitioó.

(1) Ko e hā ʻoku toe sivisiviʻi ai ʻe he kau ngāue fakafaitoʻo ʻe niʻihi ʻa hono ngāueʻaki ʻo e huhu totó? (2) ʻOmai ha fakatātā ʻe tolu ʻo e ngaahi tafa fihi ʻa ia kuo lava ke fakahoko ʻo ʻikai ha huhu totó. (3) Ko e kau toketā pea mo e kau toketā tafa ʻe toko fiha ʻi māmani lahi kuo nau fakahaaʻi ʻenau loto-lelei ke faitoʻo ʻa e kau mahakí ʻo ʻikai ha huhu totó? Ko e hā ʻoku nau loto-lelei ai ke fai peheé? (4) Ko e hā kuo fakahaaʻi ʻi he ngaahi ako fakafalemahaki ki muí ni ʻo fekauʻaki mo hono ngāueʻaki ʻo e totó? (5) Ko e hā ʻa e ngaahi fakatuʻutāmaki fakafaitoʻo ʻoku fekauʻaki mo e huhu totó? (6) Ko e hā ʻa e fakamulituku kuo aʻu ki ai ʻa e kau mataotao tokolahi ʻi he fekauʻaki mo e ʻaonga ʻo e ngaahi faitoʻo fetongi ʻo e huhu totó? (7) Ko e hā ʻokú ne fakatupunga ʻa e ʻanīmiá (siʻi ʻa e totó)? Ko e hā hono lahi ʻo e malava ke matuʻuaki ia ʻe he tangatá? Ko e hā ʻe lava ke fai ke tokoniʻi ha tokotaha ʻanīmia? (8) ʻE lava fēfē ke fakakake ʻa hono faʻu ʻo e sela kulokulá ʻi he sino ʻo ha mahaki? (9) Ko e hā ʻa e ngaahi founga ʻoku ngāueʻaki ke fakasiʻisiʻiʻaki e mole ʻa e totó lolotonga ʻa e tafá? (10) ʻE lava ke ola lelei ʻa e ngaahi faitoʻo fetongi ʻo e huhu totó ki he fānau īkí pe ki he kakai ʻoku ʻi he tuʻunga fakatuʻutāmaki ʻenau moʻuí? (11) Ko e hā ʻa e taha ʻo e ngaahi tefitoʻi moʻoni fakaʻēfika tefito ʻo e tokangaʻi fakafaitoʻo leleí? (12) Ko e hā ʻoku mahuʻinga ai ki he kau Kalisitiané ke nau fai tokamuʻa ʻa e ngaahi fili fakafaitoʻo taʻekau ai ha totó? ʻE lava fēfē ke tau fai eni?

Ko hono tali ha niʻihi ʻo e ngaahi faitoʻo ʻoku fakaeʻa ʻi he foʻi vitioó ko ha fili fakafoʻituitui ia ʻo fakatatau ki he konisēnisi ʻo e tokotaha taki taha kuo akoʻi ʻe he Tohi Tapú. Kuó ke fili pe ko fē ʻa e ngaahi fetongi ʻo e huhu totó ʻokú ke loto-lelei ke tali maʻau mo hoʻo fānaú? Ki ha lāulea lahi ange ki he ngaahi meʻa ko ʻení, sio ki he “Ngaahi Fehuʻi mei he Kau Lautohí” ʻi he ʻīsiu ʻo e Taua Leʻo ʻo Sune 15, 2004 mo ʻOkatopa 15, 2000, pea mo e fakalahi “Ko e Hā ʻEku Fili ʻo Kau ki he Fanga Kiʻi Konga Iiki ʻo e Totó mo e Founga Fakafaitoʻo ʻOku Fekauʻaki mo Hoku Totó Tonu?” ʻi he ʻīsiu ʻo ʻEtau Ngāue Fakafaifekau ʻo e Puleʻanga ʻo Nōvema 2006. ʻOku totonu ke fakahā mahino hoʻo ngaahi filí ki he faʻahinga ʻoku hā ʻi hoʻo kātí pea ki ha mēmipa pē ʻi he fāmilí ʻoku ʻikai ko ha Fakamoʻoní.