ʻOkú Ke Kole ki ha Ngaahi Fakafeʻiloaki?

Kapau ʻokú ke lolotonga fai ha ako Tohi Tapu, ko e hā ʻoku ʻikai te ke ʻeke ai ki he tokotaha akó pe ʻe fiefia ha taha ʻo hono ngaahi kaungāmeʻá, kāingá pe ngaahi mahení ke ako mo ia foki ki he meʻa ʻoku akoʻi ʻe he Tohi Tapú? ʻOku faʻa ʻomai ai ha ngaahi hingoa. ʻI hano fakangofua ʻe he tokotaha akó, ʻe lava ke ke lave ki hono hingoá ʻi hoʻo ʻaʻahi ki he faʻahinga tāutaha ko iá ke tuʻuaki ha ako Tohi Tapú. Te ke pehē nai, “Kuo fiefia ʻa [Hingoa ʻo e tokotaha akó] ʻi hono ako ʻa e Tohi Tapú, pea naʻá ne fakakaukau te ke saiʻia mo koe foki ke ke maʻu ʻaonga mei heʻemau polokalama ako Tohi Tapu taʻetotongí.” Fakahāhā nounou ange leva ʻa e founga ʻo hono fai ʻo e akó, ʻo ngāueʻaki ʻa e tohi Akoʻi ʻe he Tohi Tapú.

Kapau ʻoku ʻi ai haʻo ako ʻoku fakalakalaka lelei, ʻe lava ke ke fakalotolahiʻi ke ne fakamatalaʻi ʻa e fokotuʻutuʻu ʻo e akó ki he ngaahi kaungāmeʻá mo e ngaahi mēmipa ʻo e fāmilí ʻa ē nai te nau mahuʻingaʻiá. ʻE lava ke ne fakaafeʻi kinautolu ke nau kau ʻi heʻene akó. Pe kapau ʻoku ʻikai faingamālie ia, ʻe lava ke ne fokotuʻutuʻu ke ke fetaulaki mo kinautolu ke fakahāhā ʻa e fokotuʻutuʻu ʻo e akó. Ko hono fai ení ʻe fakalotolahiʻi ai ʻa e tokotaha akó ke ne kamata vahevahe atu ʻa ʻene ʻilo Fakatohitapú ki he niʻihi kehé.

Ko e faʻahinga ko ia ʻokú ke fai ki ai ʻa e ngaahi toe ʻaʻahi tuʻumaʻú ʻe lava ke nau toe fakafeʻiloaki atu ha niʻihi kiate koe, neongo kapau kuo teʻeki ai ke nau tali ʻe kinautolu ha ako Tohi Tapu tuʻumaʻu. ʻI hoʻo ʻoange kia kinautolu ha tatau ʻo e tohi Akoʻi ʻe he Tohi Tapú, ʻe lava pē ke ke ʻeke, “ʻOkú ke ʻiloʻi ha taha te ne saiʻia ke maʻu ha tatau ʻo e tohi ko ení?”

ʻI he vakai ki he fakavavevave ʻo e taimí, ʻoku tau loto ke ngāueʻaki ʻa e ngaahi founga kotoa pē ʻoku ala lavá ke tokoniʻiʻaki ʻa e kakaí ke nau fanongo pea tali ʻa e ongoongo leleí. ʻOkú ke kole ki ha ngaahi fakafeʻiloaki?