Feingangāue ʻi Māmani Lahi ke Tuʻuaki ʻa e Fakataha-Lahi Fakavahe “ʻOku Ofi ʻa e Fakahaofí!”
Tufaki ʻe he Kau Malanga ʻi he Fakatahaʻanga Taki Taha ha Lauʻipepa-Tuʻuaki Makehe
1 ʻE fakahoko ha feingangāue ʻi māmani lahi ki hono tuʻuaki ʻa e ngaahi fakataha-lahi fakavahé ʻaki ha lauʻipepa-tuʻuaki makehe, ʻa ia ʻe fakahoko ʻi he ngaahi fonua nai ʻe 155 ʻo kamata ʻi he faʻahitaʻu failau ʻo e 2006 ʻi he Hemisefia Tokelaú pea hokohoko atu ai pē kae ʻoua kuo ʻosi ʻa e ngaahi fakataha-lahi fakavahe hokohoko, takatakai he māmaní. ʻE kau ʻi he feingangāue ko ení ʻa e ngaahi fakataha-lahi makehe kuo fakataimitēpileʻi ke fakahoko ʻi Siamane, Lepupilika Sekí mo Pōlani lolotonga ʻa Siulai mo e ʻuluaki uike ʻo ʻAokosi 2006.
2 Koeʻuhi ʻoku tau lolotonga moʻui ʻi he konga fakaʻosi ʻo e ngaahi ʻaho fakamuí, ʻoku totonu ke maongo loloto ki he kakai ʻoku nau hehema totonú ʻa e ngaahi fakataha-lahí, he ʻe fakamamafaʻi ai ʻa e faifakahaofi mei he fokotuʻutuʻu fulikivanu ko ení ʻa ia kuo talaʻofa ʻe he ʻOtuá. ʻOku totonu ke ueʻi kinautolu ʻe he pōpoakí ke nau fakakaukau ki he meʻa ʻoku toka mei muʻá. Ke ʻoange ha faingamālie ki he kakai ʻe laui miliona ke nau fanongo ai ki ha pōpoaki ʻo e fakafiemālie mo e ʻamanakí, ʻoku fakaʻaiʻai ai ʻa e ngaahi fakatahaʻanga laka hake he 98,000 ʻo e Kau Fakamoʻoni ʻa Sihová takatakai he māmaní ke nau kau faivelenga ʻi hono tuʻuaki ʻa e fakataha-lahi kuo fakaafeʻi kinautolu ki aí.
3 ʻE ʻoatu ki he ngaahi fakatahaʻangá ʻa e ngaahi lauʻipepa-tuʻuaki feʻunga ke malava ai ʻo maʻu ʻe he tokotaha malanga taki taha ʻo aʻu ki he lauʻipepa-tuʻuaki ʻe 50 nai. Ko ha toenga mei ai ʻe lava ke ngāueʻaki ia ʻe he kau tāimuʻa ʻi he fakatahaʻangá. ʻI he fakatahaʻanga taki taha, ʻe kamata ʻa e feingangāué ʻi he uike ʻe tolu ki muʻa he ʻaho kamata ʻo e fakataha-lahi ʻa ia ʻoku vaheʻi ki ai ʻa e fakatahaʻangá. ʻOku totonu ke fakaʻatā heni ha taimi feʻunga ke ngāueʻi ai ʻo ka malava ʻa e lahi taha ʻo e ngaahi feituʻu ngāue fakamalanga ʻa e fakatahaʻangá.
4 ʻO ka malava, ʻoku fakaongoongoleleiʻi atu ke tuku ha lauʻipepa-tuʻuaki ʻi he tokotaha-ʻapi taki taha. Kae kehe, kapau ʻoku ʻikai ha taha ʻi ʻapi, ʻe lava ke tuku fakapotopoto ha lauʻipepa-tuʻuaki ʻi he matapaá. ʻOku totonu ke fai ha feinga tōtōivi ke tufaki ʻa e ngaahi lauʻipepa-tuʻuakí kotoa lolotonga ʻa e vahaʻa taimi ko e uike ʻe tolu.
5 ʻOku mau ongoʻi loto-falala ʻe fai ha fakamoʻoni lahi ko ha ola ia ʻo e feinga fakaemāmanilahi ko ia ke tuʻuaki ʻa e Fakataha-Lahi Fakavahe “ʻOku Ofi ʻa e Fakahaofí!” hangē ko ia kuo lave ki ai ʻi he kupu ko ení. ʻOku mau lotu ke ʻi hoʻomou ngaahi feinga fakafoʻituitui ʻi he kau ki he feingangāue fakaemāmanilahi ko ení ʻa e tāpuaki fakakoloa ʻa Sihová.