Ko ha Tohi Fakaafe Makehe
1. Ko fē taimi ʻe kamata ai ʻa e feingangāue tufa tohi fakaafe ki he fakataha-lahi 2014?
1 Kapau ʻokú ke palani ki ha houa kai makehe ki ha ngaahi kaumeʻa pe fāmili, ʻoku fiemaʻu ki ai ʻa e ngāue lahi mo e fakamole ke teuteu ki ai, ngalingali te ke loto-māfana ʻi he taimi te ke fai ai ʻa e fakaafé. ʻI he tuʻunga meimei tatau, ko e ngāue lahi kuo fai ki hono teuteu ʻo e kātoanga kai fakalaumālie ʻa ia ʻe fakahoko ʻi heʻetau fakataha-lahi fakavahé mo e fakataha-lahi fakavahaʻapuleʻanga 2014. ʻI he uike ʻe tolu ki muʻa ke kamata ʻetau fakataha-lahí, te tau maʻu ai ʻa e monū ki hono fakaafeʻi ʻa e niʻihi kehé ke nau haʻu ki ai. Ko e hā te ne tokoniʻi kitautolu ke tau ʻoatu ʻa e fakaafé fakataha mo e loto-māfana?
2. Ko e hā te ne ueʻi kitautolu ke tau kau kakato ki he feingangāué?
2 ʻE ueʻi kitautolu ke tau kau kakato ki he feingangāué kapau ʻoku tau fakahāhā ʻa e houngaʻia lahi ʻi he ʻaonga fakafoʻituitui kuo tau maʻu mei he kātoanga fakalaumālie ʻoku tokonaki mai ʻe Sihova ʻi heʻetau ngaahi fakataha-lahí. (ʻAi. 65:13, 14) ʻOku totonu ke tau manatuʻi foki, ko ʻetau feingangāue fakataʻú ʻoku ʻi ai hono ngaahi ola. Ko e niʻihi ʻo e kakai te tau fakaafeʻí te nau maʻu ʻa e fakataha-lahí fakataha mo kitautolu. Kae kehe, neongo pe ko e hā e tokolahi ʻo e faʻahinga ʻe maʻu fakatahá, ko ʻetau ngaahi feinga tōtōivi ʻi he lolotonga ʻo e feingangāué ʻe ʻomai ai ʻa e fakahīkihikí kia Sihova pea tapua atu ai ʻene nima-homó.—Saame 145:3, 7; Fkh. 22:17.
3. ʻE anga-fēfē hano tufaki ʻo e ngaahi tohi fakaafé?
3 ʻOku totonu ke fakapapauʻi ʻe he kulupu taki taha ʻo e kau mātuʻá ʻa e founga ʻe tufaki atu ai ʻa e ngaahi tohi fakaafé ki he tokolahi taha ʻe ala lavá pe ʻe tuku ʻi he ngaahi ʻapi-ʻikai-ha-tahá pe tuʻuaki ia ʻi he faifakamoʻoni ʻi he feituʻu kakai ʻi heʻenau feituʻu ngāué. ʻI he fakaʻosinga ʻo e uiké ʻoku totonu ke tuʻuaki ʻa e makasiní fakataha mo e tohi fakaafé ʻi he taimi faingamālié. Kapau ko e ʻuluaki Tokonaki ʻo e māhiná ʻoku feʻunga tonu ia mo e ngaahi ʻaho ʻo e feingangāué, ʻoku totonu ke fai ʻa e fakamamafá ʻi hono tufaki ʻo e ngaahi tohi fakaafé kae ʻikai ko hono kamata ʻo e ngaahi Ako Tohi Tapú. ʻI he ʻosi ʻa e feingangāué, he fiefia lahi ē ko kitautolu ʻi he ʻiloʻi naʻa tau kau faivelenga ʻi hono fakaafeʻi ʻa e kakai tokolahi ʻe malavá ke kau mo kitautolu ʻi he kātoanga fakalaumālie kuo tokonaki ʻe Sihová!