Ko ha Fakaafe Fakahangatonu

1. Ko fē taimi ʻe kamata ai ʻa e feingangāue tufa tohi fakaafe ki he fakataha-lahí?

¹ Kapau ʻokú ke palani ki ha houa kai makehe ki ha fāmili pe ngaahi kaumeʻa, ʻoku fiemaʻu ki ai ʻa e ngāue lahi mo e fakamole ke teuteu ki ai, ngalingali te ke loto-māfana ʻi he taimi te ke fai ai ʻa e fakaafé. ʻI he tuʻunga meimei tatau, ko e ngāue lahi kuo fai ki hono teuteu ʻo e kātoanga kai fakalaumālie ʻa ia ʻe fakahoko ʻi heʻetau fakataha-lahi ka hoko maí. ʻI he uike ʻe tolu ki muʻa ke kamata ʻetau fakataha-lahí, ʻoku ʻomai ʻe Sihova ʻa e monū ke tau fakaafeʻi ʻa e niʻihi kehé ke nau haʻu ki ai. Ko e hā te ne tokoniʻi kitautolu ke tau ʻoatu ʻa e fakaafé fakataha mo e loto-māfana?

2. Ko e hā te ne ueʻi kitautolu ke tau kau kakato ki he feingangāué?

² ʻE ueʻi kitautolu ke tau kau kakato ki he feingangāué kapau ʻoku tau fakahāhā ʻa e houngaʻia lahi ʻi he ʻaonga fakafoʻituitui kuo tau maʻu mei he fakahinohino fakaivifoʻou ʻoku tokonaki mai ʻe Sihova ʻi heʻetau ngaahi fakataha-lahí. (ʻAi. 65:13, 14) ʻOku totonu ke tau manatuʻi foki, ko ʻetau feingangāue fakataʻú ʻoku ʻi ai hono ngaahi ola. (Sio ki he puha “Ola Lelei.”) Ko e niʻihi ʻo e kakai te tau fakaafeʻí te nau maʻu ʻa e fakataha-lahí fakataha mo kitautolu, kae ʻikai pehē ʻa e niʻihi. Kae kehe, neongo pe ko e hā e tokolahi ʻo e faʻahinga ʻe maʻu fakatahá, ko ʻetau ngaahi feinga tōtōivi ʻi he lolotonga ʻo e feingangāué ʻe ʻoatu ai ʻa e fakahīkihikí kia Sihova pea tapua atu ai ʻene nima-homó.—Saame 145:3, 7; Fkh. 22:17.

3. ʻE anga-fēfē hono tufaki ʻo e ngaahi tohi fakaafé?

³ ʻOku totonu ke fakapapauʻi ʻe he kulupu taki taha ʻo e kau mātuʻá ʻa e founga ʻe tufaki atu ai ʻa e ngaahi tohi fakaafé ki he tokolahi taha ʻe ala lavá pe ʻe tuku ʻi he ngaahi ʻapi-ʻikai-ha-tahá pe tuʻuaki ia ʻi he faifakamoʻoni ʻi he feituʻu kakai ʻi heʻenau feituʻu ngāué. ʻI he fakaʻosinga ʻo e uiké ʻoku totonu ke tuʻuaki ʻa e makasiní fakataha mo e tohi fakaafé ʻi he taimi faingamālié. ʻI he ʻosi ʻa e feingangāué, he fiefia lahi ē ko kitautolu ʻi he ʻiloʻi naʻa tau kau faivelenga ʻi hono fakaafeʻi ʻa e kakai tokolahi ʻe malavá ke kau mo kitautolu ʻi he kātoanga fakalaumālie kuo tokonaki ʻe Sihová!

• ʻI he ngaahi taʻu kuo maliu atú naʻe kau atu ha tuofefine ʻi he feingangāue tufa tohi fakaafé, naʻá ne fifili pe naʻe ʻaonga ʻa e ngaahi feinga kotoa naʻe faí. Naʻá ne fakakaukau, ‘ʻE tali ʻe he kakaí pea nau maʻu ʻa e fakataha-lahí fakataha mo kitautolu?’ ʻI he pongipongi Tokonaki ʻi he fakataha-lahí, naʻá ne fakatokangaʻi ha tangata lotu-Siiki naʻe tangutu ofi mai, ko ia naʻá ne fakalea ki ai. Naʻe hā mahino naʻá ne ʻi he fakataha-lahí he naʻá ne maʻu ha taha ʻo ʻetau tohi fakaafé. Naʻe lahi ʻene ngaahi fehuʻi naʻe malava ʻe he tuofefiné ke tali. Naʻá ne fakamatala ki heʻene fiefia lahi ʻi he polokalamá mo e anga e maongo kiate ia ʻa e fōtunga hā mai mo e tōʻonga ʻa e kau maʻu fakatahá. Ki mui ai ʻi he ʻaho tatau, naʻe kamataʻi ʻe he tuofefiné ha fetalanoaʻaki mo ha ongo meʻa mali naʻá na tangutu ofi ange ki ai. Naʻá na maʻu foki ha tohi fakaafe peá na haʻu ki he fakataha-lahí ʻi he pasi. Naʻá na fiefia lahi ʻi he fakataha-lahí peá na palani ke na toe haʻu ʻi he Sāpaté. Naʻe toki fakatokangaʻi ʻe he tuofefiné ʻa e mahuʻinga ʻo ʻetau feingangāue fakataʻú.

ʻI ha fakataha-lahi ki muí ni, ko ha husepāniti mo hono uaifí ko ha ongo tāimuʻa tuʻumaʻu naʻá na fakafeʻiloaki ki ha ongo meʻa mali matuʻotuʻa. Naʻe fakamatala ange ʻa e ongo meʻa malí ko e fuofua taimi eni ke na haʻu aí. “Ko hai naʻá ne fakaafeʻi kimouá?” ko e ʻeke ange ia ʻe he ongo tāimuʻá. Naʻá na tali ange, “ʻI heʻema foki ki ʻapi ʻi he ʻaho ʻe taha naʻá ma maʻu ha tohi fakaafe ʻi homa lalo matapaá.” Naʻá na lau ʻa e tohi fakaafé pea fakafonu mo e kūponí. Naʻe vahevahe ʻe he kau maʻu fakataha kehé ʻenau kai hoʻataá mo e ongo meʻa malí. Naʻá na fiefia lahi ʻi he polokalamá pea palani ke toe haʻu ʻi he ʻaho hokó. Naʻe fai ha fokotuʻutuʻu ke toe foki ki ai pea fakatupulekina ʻena mahuʻingaʻiá.