Ko ha Feingangāue ʻOku Maʻu Ai ha Ngaahi Ola
ʻI he uike ʻe tolu ki muʻa ke kamata ʻenau fakataha-lahí, ko e ngaahi fakatahaʻangá te nau toe kau ʻi ha feingangāue ke fakaafeʻi ʻa e faʻahinga mahuʻingaʻia mei he feituʻu ngāué ke kau mai. ʻOku ʻi ai ʻa e ʻuhinga lelei ki he feingangāue fakataʻu ko ení. Ko kinautolu ʻoku nau tali ʻa e fakaafé pea haʻu ki he fakataha-lahí ʻoku faʻa maongo kiate kinautolu ʻa e ngaahi malanga Fakatohitapú, ko e fokotuʻutuʻu lelei ʻo e ngaahi potungāué ko e kau ngāue pole kotoa, mo e ʻulungaanga lelei mo e fāʻūtaha ʻoku tau fakahāhaá. (Saame 110:3; 133:1; ʻAi. 65:13, 14) Naʻa mo ia, ʻoku maʻu ha ngaahi ola ʻi heʻetau feingangāué, tautefito ki he ngaahi feituʻu ʻa ia kuo pau ki he faʻahinga mahuʻingaʻiá ke fononga mamaʻo ke kau ki he fakataha-lahí?
ʻI he ʻosi ʻa e fakataha-lahi fakavahe ʻo e 2011, naʻe maʻu ʻe ha ʻōfisi vaʻa ha tohi mei ha fefine naʻá ne maʻu ha tohi fakaafe ʻi hono matapaá. Naʻá ne faʻa toitoi ʻi he tukituki atu ʻa e Kau Fakamoʻoni ʻa Sihová. Naʻá ne tohi: “ʻOku ʻi ai hoku ʻapi fakaʻofoʻofa, husepāniti lelei pea naʻá ku fakakaukau ʻoku ou maʻu ʻa e meʻa kotoa te ne ʻai au ke u fiefiá. Ko e fakamamahí, naʻe ʻikai pē ke u fiefia, pea ko ʻeku moʻuí naʻe ʻikai hano taumuʻa moʻoni. Ko ia naʻá ku loto ke fakaʻuli ʻi he maile ʻe 200 (320 km) ke maʻu ʻa e polokalama he Tokonakí.” Naʻá ne fiefia lahi ʻi he fakataha-lahí ʻo ne telefoni ki hono husepānití ke fakahā ki ai te ne nofo ai pē ʻi he pō ko iá ke maʻu mo e Sāpaté foki. “Naʻá ku fanongo ki he ngaahi malangá kotoa, naʻá ku feʻiloaki mo e Kau Fakamoʻoni tokolahi, pea naʻá ku fakapapauʻi ke ʻoua ʻe ngata heni.” ʻI he hili ʻene foki ki ʻapí, naʻá ne kamata ako pea ʻi he ʻosi ʻa e māhina ʻe fā naʻá ne hoko ko ha tokotaha malanga teʻeki papitaiso. “ʻOku ou fiefia ʻaupito ʻi heʻeku maʻu ʻa e tohi fakaafe ʻi hoku matapaá koeʻuhi he taimi ní ko ʻeku moʻuí ʻoku ʻi ai moʻoni hono taumuʻa!”
Ko ha niʻihi ʻoku nau maʻu ha tohi fakaafe te nau haʻu. Ko ia ai, kau faivelenga ʻi he feingangāue mahuʻingá ni. ʻOmai e toenga ʻo e ngaahi tohi fakaafé ki he kolo faiʻanga fakataha-lahí, pea ngāueʻaki ia ke faifakamoʻoni ʻi he founga ʻikai anga-mahení.
[Puha ʻi he peesi 5]
ʻE Anga-Fēfē ʻEtau Tuʻuaki ʻa e Tohi Fakaafé?
Koeʻuhi ke ʻosiki hotau feituʻu ngāué, ʻoku totonu ke tau lea nounou pē. Te tau pehē nai: “Mālō e lelei. ʻOku mau kau ki ha feinga fakamāmani lahi ke tufaki ʻa e tohi fakaafe ko ení. Ko hoʻo tatau eni. Te ke maʻu ʻa e ngaahi fakaikiiki lahi ange ʻi he tohi fakaafé.” Faivelenga. ʻI he kau ki he feingangāue ʻi he ngaahi fakaʻosinga ʻo e uiké, ʻoku totonu ke tau toe tuʻuaki ʻa e ngaahi makasiní ʻi ha faingamālie.