Fakahaaʻi e Mahuʻingaʻia Fakafoʻituitui—ʻAki Hono Fai ha Fakaongoongolelei
1 Ko e fakaongoongolelei loto-moʻoní ʻoku fakalototoʻaʻi ai ʻa e kakaí, ueʻi kinautolu ke fai ha meʻa, pea ʻai ke nau fiefia. Kuo ʻiloʻi ʻe he kau malanga tokolahi ko hano fai ʻo ha kiʻi fakaongoongolelei loto-moʻoni ʻoku faʻa iku ia ki he loto-lelei ʻa e kakaí ke nau fanongo mai lolotonga ʻa e ngāue fakafaifekaú. ʻE lava fēfē ke tau fakaongoongoleleiʻi ʻa e kakaí ʻi heʻetau feinga ke vahevahe atu ʻa e ongoongo leleí kia kinautolú?
2 Fakatokanga Meʻa: Ko Sīsū Kalaisi, ʻi he hili ʻene foki hake ki hēvaní, naʻá ne fakatokangaʻi ʻa e ngaahi ʻulungāanga lelei ʻi he ngaahi fakatahaʻanga ʻe fitu ʻi ʻĒsia Mainá. (Fkh. 2:2, 3, 13, 19; 3:8) ʻI he tuʻunga meimei tatau, ʻe ueʻi kitautolu ʻe he mahuʻingaʻia moʻoni ʻi he kakai ʻoku tau fetaulaki mo ia ʻi heʻetau ngāue fakafaifekaú ke tau fakasio ha ngaahi faingamālie ke fai ai ha fakaongoongolelei. Ko e fakatātaá, ko ha loto-ʻapi ʻoku maʻa mo maau, ko ha mātuʻa ʻokú ne fakahāhā ʻa e ʻofa māfana ki heʻene fānaú, pe ko e malimali anga-fakakaumeʻa mo e lea fakafeʻiloaki mai ʻa ha tokotaha-ʻapí, ʻoku ʻomai kotoa ʻe he ngaahi meʻá ni kia kitautolu ʻa e faingamālie ke fai ai ha fakaongoongolelei. Ko e kotoa ʻo e ngaahi meʻá ni ko e faingamālie ia kia kitautolu ke fai ai ha fakaongoongolelei. ʻOkú ke loto-lelei ke siofi mo ngāueʻaongaʻaki ʻa e ngaahi faingamālie peheé?
3 Hoko ko ha Tokotaha Fanongo Lelei: ʻI he malanga ki he niʻihi kehé, fakaafeʻi kinautolu ke fakahaaʻi ʻenau fakakaukaú ʻaki hono ʻeke ha ngaahi fehuʻi feʻungamālie. Fakahaaʻi ʻa e fakaʻapaʻapa kia kinautolu ʻaki ʻa e tokanga lelei ki he meʻa ʻoku nau leaʻakí. (Loma 12:10) ʻOku ngalingali te ke ʻiloʻi ai ha meʻa ʻa ia ʻe lava ke ke fai ai ha fakaongoongolelei loto-moʻoni pea te ke lava leva ai ʻo hoko atu ʻi he tuʻunga felotoi kuó ke fokotuʻú.
4 Ngāueʻaki ʻa e ʻIloʻilo: Ko e hā ʻoku totonu ke tau faí kapau ʻe leaʻaki ʻe ha tokotaha-ʻapi ha meʻa ʻoku ʻikai ke fehoanaki mo e moʻoni ʻi he Tohi Tapú? ʻI he ʻikai ke fakafepakiʻi ha fakamatala taʻetotonú, fakahaaʻi ʻa e houngaʻia ki he fakamatala ʻa e tokotaha-ʻapí peá ke hoko atu ʻaki ʻa e fakalea ko ení “ʻOku lava ke u fakatokangaʻi ʻokú ke mahuʻingaʻia moʻoni ʻi he kaveinga ko ení.” (Kol. 4:6) Pea kapau ʻoku aʻu ʻo fakakikihi mai ha tokotaha, ʻoku lava ke tau toutou fakaongoongoleleiʻi ia ʻi heʻene mahuʻingaʻia moʻoni ʻi he kaveingá. Ko ha fakalea anga-malū pehē ʻe fakavaivaiʻi nai ai ʻa e tokotaha ʻoku hā ngali fakafepaki mālohi ki he ongoongo leleí.—Pal. 25:15.
5 Ke hoko ʻo fakalototoʻa, ko e fakaongoongolelei ʻoku tau faí kuo pau ke fai loto-moʻoni ia. Ko hono ngāueʻaki ʻo e lea fakatupu langa hake peheé ʻoku fakalāngilangiʻi ai ʻa Sihova pea ʻe lava nai ai ke tohoakiʻi mai ʻa e niʻihi kehé ki he pōpoaki ʻo e Puleʻangá.