Kuo Nau Fokotuʻu ha Faʻifaʻitakiʻanga ʻo e Faitōnungá
1 Naʻe kamata ʻi he taʻu 1937 ha tafaʻaki foʻou ʻo e ngāue taimi-kakató—ko e ngāue tāimuʻa makehé. Naʻe tali lelei ai ʻe he kau tangata mo e kau fefine taau, naʻa nau taukei ʻi he ngāue faka-Kalisitiané ʻa e ngaahi vāhenga-ngāue ke nau ngāue ʻi ha feituʻu pē ʻoku vaheʻi kinautolu ki ai ʻe he kautahá. ʻI he taimí ni, ko e ngaahi hongofuluʻi taʻu ia ki mui ai, ʻoku kei hokohoko atu ʻa e kau tāimuʻa makehé ʻi hono fokotuʻu ha faʻifaʻitakiʻanga ʻo e faitōnungá ʻa ia ʻoku taau ke faʻifaʻitaki ki ai.—Hep. 6:12.
2 Naʻa Nau Takimuʻa: ʻI he kamatá, naʻe tamuʻomuʻa ai ʻa e kau tāimuʻa makehé ʻi he ngāue fakamalangá ʻaki hono ngāueʻaki ʻa e kalamafoni toʻotoʻó ʻi he matapā ʻo e kakaí. Naʻa nau toe ngāueʻaki ʻa e ngaahi malanga kuo hikí ko e makatuʻunga ia ki he ngaahi fetalanoaʻaki Fakatohitapu ʻi he ngaahi toe ʻaʻahí. Naʻe fai ʻeni ʻi he ngaahi kolo lalahi ʻa ia kuo ʻosi fokotuʻu ai ʻa e ngaahi fakatahaʻangá. Ki mui ai, naʻe fekauʻi atu ʻa e kau tāimuʻá ki he ngaahi feituʻu naʻe lahi ange ai ʻa e fiemaʻu ki he kau fanongonongo ʻo e Puleʻangá. Naʻa nau toe foki ki he kakai mahuʻingaʻia kotoa pē pea fai mo e ngaahi ako Tohi Tapu. Ko e ola ʻo ʻenau ngaahi feinga fakamātoató, naʻe fokotuʻu ai ʻa e ngaahi fakatahaʻanga foʻou ʻe laui ngeau. Ko ʻenau ngāue fakaʻevangeliō taʻeongosiá naʻe tokoni ia ki he tupu lahi fakaʻulia ʻa e kautahá ʻa ia ʻoku tau mātā he ʻaho ní. (Ai. 60:22) ʻOku hokohoko atu ʻa e kau tāimuʻa makehé ʻi hono fakahoko ʻa e ngafa mahuʻinga ʻi hono fakamafola ʻa e ongoongo leleí “ki he meʻa moʻui kotoa pe ʻi he lalo langi.”—Kol. 1:23.
3 Taau ke Faʻifaʻitaki ki Ai: Kuo ngāue ʻa e kau tāimuʻa makehe ʻe niʻihi ʻi he ngāue fakafaifekau taimi-kakató ʻi he ngaahi hongofuluʻi taʻu. ʻI he faai mai ʻa e ngaahi taʻú, kuo siviʻi ai ʻa e tui ʻa e kau tangata mo e kau fefine mateakí ni ʻi he ngaahi tuʻunga kehekehe. (1 Pita 1:6, 7) Kuo nau loto-lelei ke feilaulauʻi ʻenau ngaahi fiemālie ʻi he tuʻunga fakamatelié ka nau ngāue ʻi he ngaahi feituʻu ʻoku ʻi ai ha fiemaʻu makehé. Kuo taʻumotuʻa he taimí ni ʻa e niʻihi pea hokosia ʻa e mahamahaki, pe fetaulaki mo e ngaahi tuʻunga faingataʻa kehe. (2 Kol. 4:16, 17) Neongo ia, ʻoku nau “fua ai pe ʻi heʻenau motuʻa.” (Sāme 92:14) ʻOku nau falala kia Sihova pea aʻusia ʻa ʻene tāpuakí.—Sāme 34:8; Pal. 10:22.
4 ʻOku tuha moʻoni mo e kau tāimuʻa makehé ʻa ʻetau fakaongoongoleleiʻi loto-māfaná. Kapau ʻokú ke maʻu monū ʻi hono vaheʻi atu ʻa e kau tāimuʻa makehé ki hoʻo fakatahaʻangá, ngāueleleiʻaki ʻa e faingamālié ke fakamoleki ha taimi mo kinautolu pea maʻu ʻaonga mei heʻenau taukeí. Fakahaaʻi ʻa e houngaʻia ki heʻenau ngāue ʻi he tuʻunga ko e kau fanongonongo faitōnunga ʻo e Puleʻangá. Maʻu ha loto-toʻa ʻi heʻenau tuʻumaʻú. Ko e faʻahinga kotoa ʻoku faʻifaʻitaki ki heʻenau tuí ʻoku lava ke nau toe maʻu ʻa e hōifua mo e tāpuaki ʻa Sihová koeʻuhí he “ʻilonga ha fai moʻoni ko hono mamana ia.”—Pal. 12:22.